TSÜCHITAO 8 - SHEEYU BAIBEL (BSI)

Ratsü ye Paoshoyu

¹ Keikhaio! Ratsü sünou maiye kua bure. Tsüsüyu nanou pai pa-a bure.

² Kuyu bukinou, ludu pe kinou, ae maibo kinou honapai nou lah-a bue;

³ nuhdu vei rokhubomü pe hinou, rokhubomü kinou shusou sha-a bure:

⁴ “Oh maitaore, neye Enou kua bue, Enou shusou-a rayu hai deiphao mai hrülai donoue.

⁵ Oh memeh soutaore, kaozü souyu nasü doulo; Oh voyu maitaore, leikeia keilo.

⁶ Mutei shoyu avei chipao khesü keilo; Enou paoyu veishi sü veikhai-a baie.

⁷ Enou paoyu sü cheche-e; madayu hai Enou ngaora-e.

⁸ Amü nou paopayu chipao veishi sü cheche-a baie; dayu moa khiyu lia sühisü hae.

⁹ Tsüsüyu maiye donou sütaosü züsha tea baie alia tsüdo ngaolouyu maiye donou sütao hai kaotou tea baie.

¹⁰ Shahu jüwo louzü Enou paodou peiyu nou poloua baio; alia sana jüwo louzü tsüdo nanou dolou baio.

¹¹ “Daiolouzü tsüvei hai muteichu jünou veipu hie; nenou jüpa-a buyu na teitei-a puhye paokhalou hoe.

¹² E hai ratsü nasüe, ae ahi tsünghei sü bue; ahi tsüdo ae kaozü hinou chidei peilou süyu sü bue.

¹³ Mapao ye piyu touyu hai hashi naye ngaorayu na-e; Khaophu souyu ae zhaipou shiyu ae ashi vei ludu alia kaozümoyu chipao khesü Enou ngaorae.

¹⁴ Ahi douzüapei alia veiyu ratsüa bue, Ahi tsünghei-a bue, ae khouchia bue.

¹⁵ Avanou vemaitao nou veo souwe, alia teidei khoyu maitao nou veiyu chikha sü soulouwe.

¹⁶ Avanou veo nahmaitao nou teidei kholouwe, alia aduso maitao nou deiphao tukha louwe.

¹⁷ Eye leshiyu maitaoye sü Enou leshie; alia Eye toutei-a phouyu maitao nou Eye ngaoloulai.

¹⁸ Hangiyu alia tsükhouyu hai ahi bue, dulousü chingi alia sava payu haia ahi bue.

¹⁹ Avei rashithou hai sana jünou veipu hie, sana veikayu tya jünoua veihie, alia Enou peiyu hai veikayu shahu jünoua veipu hie.

²⁰ Enou acheche ludu hinou tawe, kaozü vei bo hinou tawe,

²¹ Eye leshiyu maitao hisü Enou nangi peie, alia puhmai vei kini khaiyu buh hisü lathou phoupeie.

²² “Mapao nou puhvei vah soushurai hinou Eye soupeie, puhnou souyu puhvei vah araina soua Eye soupeie.

²³ Shurai nou Eye soushu la peiwure, deiphao soushumo jünou rai-a Eye soupeiwure.

²⁴ Zai thou soumo jünou Eye soupeiwure, dzünghou ha-a bukinou Eye soupeire.

²⁵ Deichi zhai souloumo jünou, deitaoh zhai southou loumo jünou rai-a Eye souwure,

²⁶ Puhnou deiphao ae doutao soumo jünou, moa naihü toulia soumo jünou raia Eye soupeiwure.

²⁷ Puhnou raki soushuyu phaki, puhnou zai pei hi teihao souveyu phaki, E sühinou bure.

²⁸ Puhnou ratei hi teihao soukhai peiyu phaki, zaidu vei dzüla soushuyu phaki,

²⁹ ae puhnou zaidzü hi kharochi peia hai hi koute bailai tea paopeiyu phaki, sühisü E bure. Puhnou deiphao vei beikhei soutayu phaki E sühi bure.

³⁰ Süteile hinou Esü puh pe hinou sa-a vah souyu paopu soua bure; alia teithechü puhvei jüpa nasü soua bure, Puhvei nghingao hinou teisa sü lesa-a nou bure—

³¹ mainou hrülou veiyu deiphao vanou lesa-a ae deiphao mai donou vasa-a bure.

³² “Südonou chuo, anah maitaore, achi keilo: Lesayu maitao sü aludu thaifü tayu maitaoe.

³³ Paodou peiyu khesü keiloua tsüveilo, alia sünasü ngaophou moyu souso.

³⁴ Achi kei louyu maisü savayu maitao-e, teithechü avei rokhubomü hinou buyu maitao, avei kikhu bomü hinou khopoa buyu maitao sü vayu maitao-e.

³⁵ Daiolouzü Eye ngaolouyu maina sü ahri ngaoloure, alia Mapao vei jüpa nasü ngaoloude;

³⁶ ana Eye polou moyu mai sü lahye zhiloua baie; Eye ngaorayu maisü athai naye leshia baie.”