TSÜCHITAO 7 - SHEEYU BAIBEL (BSI)

¹ Anahna, achipao khesü zülo, alia avei kharochi khesü ngaikhai tiso.

² Avei kharochi khesü zülo alia hrilouo, Enou doupeitao hai ne nghithou hinou mara ali büa khailo;

³ sütao hai ne bah hi zükhailo, alia nevei lüthou pei hinou rüthou khailo.

⁴ Tsüvei hi paolo, “Ne hai atupai-e”, ae tsüsü naye chavei shoyu nevei samai soua kulo.

⁵ Sünanou neye chilee moyu naotupai bah hinou povai peilai, züa thaoyu naotupai vei müvei müthea hinou vupa peilai.

Chilee moyu Naotumai

⁶ Vuli Enou aki vabomü hinou vakou zhupae,

⁷ alia Enou chaomeh souyu nahlemai taoli zhingaoe, sütao hrohinou Enou voyu nahlemai ali ngaoe.

^8-9 Puhsü honapai vei ki kainghou hinou buyu ludu hinou takoue. Puhnou teimai roro louyu teile hinou honapai vei ki hisü takoue,

¹⁰ Alia zhukhaio, khakhamai na tupoa ae soushi shoyu naotumai linou puhye sü daoloure.

¹¹ Honapai hai dukhya-a ladodo souyu naotumai alie, puh phei sü ki hi bumoa sashi shoe;

¹² chachakio lududo kinou kho-a bue, akia hupobu kinou buwe, ae buh likinou honapai nou dazüa khowe.

¹³ Honapai nou puhye sü kholoua mümure, alia hraoha puchia puh hi paoe:

¹⁴ “Enou zhou teithe posheela peiwure, alia posheelayu sou hai-a ahi bue.

¹⁵ Südonou chuo Enou neye daore donou tapawe, neye jüpa shoa phou-e, ae Enou neye ngaoloure.

¹⁶ Enou avei züphao sü sahnou khuvü tea khaitue, Ejipt maivei züzüyu sahnou zühsou khaitoue.

¹⁷ Enou azüphao sü poukai nüvei myrrh, aloes alia cinnamon nou kaida khaitoue.

¹⁸ Khe, ahai koa teithemo koute leshiyu vei vah soulaikhe; ahai koa khusou poshu savasho laikhe.

¹⁹ Daiolouzü akhapu sü ki hi hae; puh hai doushoyu veidou veitare.

²⁰ Puh sü pousha taoli pfüa tare; puh sü khouhdubvü teile hinou ki hi dakhai velai hie.”

²¹ Honapai nou reshi shoyu chipao sünou puhye taih loure; hounapai vei müvei mütheayu sünou puhye seiloure.

²² Chode ali hai dathayu buh hi süthaipoa tayu büa puhsü honapai thaifü poa tare, ae puhsü rüh hinou mukhai touyu kho-shu ali büre;

²³ loushu linou lüthou hi lou phyawure. Puh sü raohou linou rüh hi zhaolou mulouyu büre — puh hai kaozhou shilaire touyu sülou mode.

²⁴ Südonou chuo, O anah maitaore, achi keilo. Enou paoyu khesü soutaosoua keilo.

²⁵ Sübüyu naotumai hinou tavai tareilo; honapai vei ludu hisü taso.

²⁶ Honapai nou mai alao soushi peiwure, ae khekai veili phousha louhoa southawure.

²⁷ Honapai vei ki hai rabedushao hi louyu vei ludue, athai maivei teidei hi hotayu ludu nasüe. Thasho-a thaire vei bo nasüe.