TSÜCHITAO 5 - SHEEYU BAIBEL (BSI)

Sheemoyu alia Chilee moyu hi Aetimoyu

¹ Anahna, avei tsüveiyu hi leloulo, avei tsüsüyu hi nevei nou pfüreilo.

² Sütou louzü nenou kabüa zhaidou veiyu hinou hrüloulai touyu hai süloulai, alia ne hai tsüveiwe touyu sü nevei chipao hinou ngaoloulai.

³ Chilee moyu naotumai livei mütai hai laivoudzü büa zümou malae, alia honapai vei mümu peiyu hai oliv theadzü büa bumalae,

⁴ ana akhai hiwo puh sü khasü büa bailai, ae hovai haivai heipfüyu khoche büa bailai.

⁵ Honapai nou neye sü sapoa thaimai vei teidei hi hota bailai; honapai nou tayu ludu hai thaimai vei ludu baie.

⁶ Hanapai hai hriyu maivei ludu hi tawu moe; ana chaochao soua holo hailo haota-a baiwe, ae daidai vepawe touyu hai sücha moe.

⁷ Oh anahmaitaore, achi keilo, alia avei chipaotao sü ngaikhaiso.

⁸ Ne ludu sü honapai hinou doushoa khailo, alia honapai vei ki hisü tanghi kouso!

⁹ Nenou sükua soure toulouzü nevei khekai hai mai hi peia bailai, alia ne sü zhuvea hayu mai bah hinou nahle sho-a thai bailai.

¹⁰ Shikho moyu maiye panou nevei nangi khesü pota more donou, ae nenou teroua soukhai touyu khesü mai kukhe livei soumore donou;

¹¹ alia ne hrü akhai hi kou nevei souke ae vasou sü hatayu thainou levea dongai pfülai,

¹² alia nenou haibüa paolai, “E daisounou tukha peiyu sü ngaora baidesa? Alia Eye deipeiyu nasü daisounou ngaophou moa bairesa?

¹³ Eye dou-apei mai pai Enou keilo more. Eye paodou peiyu mai hi anou pfürei loumoa baire.

¹⁴ Esü chuo maisou hrohinou haongu ngao-a bure.”

¹⁵ Ne lah nevei dzübvü hinou dzü ke-a baio, lahvei dzükhao hinou pa dzü küa baio.

¹⁶ Nevei dzüla sü panou vakou kürata-a bailaivu, süsü panou duva kinou külaiwu?

¹⁷ Sütaosü panou lah nevei souloua baio, panou neye shikhomo maivei souwuso.

¹⁸ Nevei dzünghou sü shiha ngaolouyu sü soulo, alia nahle-a buki nevei chapfü hinou asayu sü souloua baio—

¹⁹ zhainga veiyu ae hüvei shoyu kho-shu lou ali bülo. Panou puhvei lesha nou neye phabusa jüpa nou phoulo, honapai vei lesha naye teisa nou hralo.

²⁰ Anahna, ne daisounou chilee moyu naotu kukhe liye hralai? Ne daisounou kukhe mai livei maipfüye sü thainü laige?

²¹ Daiolouzü mai livei ludutao sü Mapao nou ngaokhai touwe. Nenou tayu ludu teitei sü puhnou zhu-a bue.

²² Maishiyu mai nou lahvi mah hinou muloua bailai, alia lah nou soukhai touyu mahtao hinou beloua bailai.

²³ Puletao sü lahye tukha hayu vanou thai-a baiwe. Puletao sü voyu vanou hakata-a baiwe.