TSÜCHITAO 4 - SHEEYU BAIBEL (BSI)

Ratsü vei Viyu

¹ Anah maitaore, ne puo nou paodou peiyu khesü keilo, alia tsünghei ngaoloure donou soutaosoua keinoulo.

² Daiolouzü Enou ne hisü tsüsha aveih peiwe: Enou doupeiyu khesü licholo, thaowuso.

³ E nahtou soua buyu phaki, apfüpuo vei nahzü touli soua buyu teile hi,

⁴ apuo nou Eye paodou peie. Puhnou haibüa paoe, “Enou doupeiyu khesü licholo ae sütao hai ngaikhai touso. Enou kharochi peiyu khesü zülo, sükulouzü ne hriloulai.

⁵ Enou paodou peiyu khesü ngaiwuso, alia amü nou paopeiyu chipaotao hinou tavai tawuso. Tsüvei polo; alia tsünghei ngaolouo.

⁶ Sünaye thaoso, sükulouzü sünanou neye vupeilai; sünaye leshilo, sütoulouzü puhnou neye khopeilai.

⁷ Tsüvei loure vei beirai sü haide: Tsüvei polo, alia hataralia nenou poloulai toulouzü, tsünghei nou polouo.

⁸ Sünaye mutei shoa popeio, sütoulouzü puhnou neye pokupa peilai; nenou puhye kholoure toulouzü, puhnou neye tsükhouyu sü peilai.

⁹ Puhnou neye zhai veishoyu poupa raizaoli toupeilai, puhnou neye hüvei shoyu vepeirü rüpeilai.”

¹⁰ Keilo, anahna. Enou ne hi paopeiyu chipaotao hai soutaosou polo, sükulouzü ne hai hrüh sho-a nou hrüloulai.

¹¹ Enou ne hi ratsü alia kaozü hinou hrüloure vei ludu sü doupeiwure.

¹² Nenou tayu phaki, ne phi süloulai moe; alia nenou tutayuma, hraloulai moe.

¹³ Paodou peiyu khesü soutaosoua potou tilo, panou tala tasho; puhye kholo, daiolouzü puhsü nevei ahri nasüe.

¹⁴ Maishiyu maivei ludu hi talouso, alia ashi souyu maivei zhaidou douso.

¹⁵ Sünasü tavailo; sühi lou tasouo; sühinou tareilo alia tacho talouo.

¹⁶ Daiolouzü puhmai nou vah kaomoli soumosa sü zhithou louhoe; puhtao nou maiye panou phi sühlou mosa puletao hai zaihea bubaiwe.

¹⁷ Daiolouzü puletao sü mai ashi maivei raokhao touwe, alia lekhashi maivei zhaoh sowe.

¹⁸ Ana acheche maivei luduwo teinghi payu büe, hea touchü hi koumo koute valailai payu kue.

¹⁹ Mai ashi maivei luduwo khei touchü zhiteiyu büa baie. Puletao nou dai hinou hraloua kaodu taresa touyua sümoe.

²⁰ Anahna, Enou paoyu chi khesü leloua polouo; avei chipaotao hai keilo.

²¹ Sütao sü panou ne nghingao hinou latasouo; sütao hai licholo alia nevei lüthou hi pokhailo.

²² Daiolouzü honaye ngaolouyu mai hai hriloulai, alia puhye donou sou souvei peilai.

²³ Nevei tsüle hai tsüreia khailo, daiolouzü sühinou ahri dzünghou küpawe.

²⁴ Cheche moyu chipao ali-a paokhai tiso, da-a nou kheirei soua chiphayu hai ne hinou doushoa polaiwuo.

²⁵ Ne nghithou panou nghoujülo toutei teanou zhulo, alia nevei nghithou hai panou ne nghoujülo züsha tea nou zhuloua baio.

²⁶ Nenou souyu vah haso khesü soutaosou chotou tilo, sütou louzü nenou soupfüyu veishi sü vei-a bailai.

²⁷ Zhoulova moyuma nalova-a reitawuso, ne phei hai ashi hinou tavei talouo.