TSÜCHITAO 3 - SHEEYU BAIBEL (BSI)

Nahlemaiye Paodou-apei

¹ Anahna, Enou ne hi paodou peiyu khesü ngaiwuso, sütao hai teisa nou licho-a bulo.

² Sütao nou neye hrüh shoyu alia savayu sü ne hi pove peilai.

³ Rozüyu alia chilee checheyu nasü panou neye thaowua taso; süna haisü ne ngu hinou haolo; ne lethou pei hi rüthou khailo.

⁴ Sükua souloure toulouzü, nenou maivei jüpa ae zhih aveih, alia Ramai nou jüpayu sü ngaoloulai.

⁵ Nevei tsüle veishi nou peia Mapao ye louchelo. Ne lah nevei tsü chokhai touyu nasü lülou chewuso.

⁶ Nenou soupfüyu vah veishi hinou Mapao ye licholo, sükulouzü puhnou neye checheyu ludu nasü ngaopeilai.

⁷ Lah neye tsüveiwe tea chowuso, Mapao ye ngaopilo, ae ashi hinou tavai talo.

⁸ Sünanou ne souke hi soua buyu nasü souvei peilai, alia ne raotaoye souhri peiyu soulai.

⁹ Nevei teidei hinou payu shinamara, potei hi ngaolou raitao ae veikayu nou poa Mapao ye tsükhoua posheela peio.

¹⁰ Sükua nenou souloure toulouzü, nevei thoubao sü phouloulai, alia nevei darkha dzübvü sü darkhadzü nou külyalai.

¹¹ Anahna, Mapao nou tukhayu hai ngaophou moyu souso, Puhvei tudei peiyu hai keinü moyu souwuso.

¹² Daiolouzü Mapao nou leshiyu maiye tudei peiwe, puo mai linou jüpayu nah hi souyu büa soupeiwe.

¹³ Ratsü ngaolouyu mai alia tsüsü ngaolouyu mai hai asayu maie.

¹⁴ Daiolouzü sühinou vilouna hai shahu hinou vilouyu najünou veie; alia süna vei hupayu hai sana jünou veipu hie.

¹⁵ Ratsü hai muteichuh jünou mutei hie, alia nenou jüpa taralinoua poa sünaye nadalou hoe.

¹⁶ Hrüshoyu hai puh bah zhoulova hi bue, puh bah nalo hisü kini alia tsükhouyu bue.

¹⁷ Honapai vei ludu sü tavayu ludue, alia honapai vei bo teitei hai kaonayu nasüe.

¹⁸ Honapaiye tao-a buyu maitao nou puhye sü hriyu süübe teanou kuwe; puhye taochüa buyu maiyesü asayu maitao tea kuwe.

¹⁹ Mapao nou deiphao hai puhvei tsüvei nou soushuloue, puhvei tsüsü nanou raki hai soushu peie.

²⁰ Puhvei tsüdo vanou reidzü hai kütaloue, alia teihao nou vidzü zaokou peie.

²¹ Anahna, nevei ratsü aveih alia tsüvei sü khaitou tilo, sühai sü panou ne nghingao hinou tuta louso.

²² Sühai nou neye hriyu sü peilai — savayu ae hüveiyu sü peilai.

²³ Nevei ludu sü kaozhou veia taloulai, alia ne phisü süloulai moe.

²⁴ Nenou chobuyuma ngaopilai moe, nenou dazüyuma vashoa nou züzhi loulai.

²⁵ Sümo ngaomo hinou maishi mainou ngaopiha tiyu, alia puhmai nou haka tayu phaki, sükhesü ne ngaopiwuso.

²⁶ Daiolouzü Mapao nou neye zhoukao veiyu sü peilai, alia puhnou neye panou rüh hi deloulai moe.

²⁷ Mai talinou soukha peiyu jüpa-a buyu phaki, ae süsü nenou soukha lousüyu khouko bulouzü, vah aveih sünasü puh hi soupei moyu sü souso.

²⁸ Nevei kinapa mai ali nou soukha peio tea ne hinou kholouzü, ae süsü nenou peilou süa bulouzü, dosho nou peilai tea ponawuso.

²⁹ Neye lütei tea ne hinou buyu nevei kinapa mai hi vah ashi soure donou do phousouo.

³⁰ Ne hi hashi lia soumoyu maiye qo lia ha-a nou züvaso.

³¹ Zhaipou shiyu maiye thainüso, moyuma puletao nou tayu büa talai tea tsüchoso,

³² daiolouzü vah ashi souyu maiye sü Mapao nou ngaora-e, ana checheyu maiye sü Puhnou loucheyu sü bue.

³³ Mapao vei chaa sü maishiyu maivei ki hi bue, ana Puhnou checheyu maivei ki hisü hra peiwe.

³⁴ Maiye konüyu mai hisü puhnou jühnü showe, anou tainou soumai hisü puhvei jüpa hai ngaopeiwe.

³⁵ Tsüveiyu mainou tsükhou peiyu sü ngaolai, ana voyu maiwo hraongu ngao-a bailai.