TSÜCHITAO 26 - SHEEYU BAIBEL (BSI)

¹ Teilüki vüra kouyu alia chachiyu phaki teirüyu büa tsükhou peiyu hai vomai li donou thaomoe.

² Ngaozü moyu chaa hai taohbu ha-a yaolaiyu raohoutao büa baie.

³ Süü hai rhei donoue, mükha hai rheisühye donoue alia süüda hai vomai donoue.

⁴ Nenou vomai liye puhnou nouyu thaifüa chila peilouzü, ne-a voyu süna bütoua baie.

⁵ Vomai liye puhvei kaozümo thaifüa chila peikhaio, sükulouzü puhnou lahye tsüveiwe tea choyu nasü kaomore touyu hai süloulai.

⁶ Vomai li bah hinou ko seitayu mai nasü lah puh phi jüdeloua baie, ae lah nou veahoyu sü poveloua baie.

⁷ Vomai livei tsüchi haio shovaiyu maivei phibah büa bubaie.

⁸ Vomai liye tsükhou peiyu mai nasü louka hi louthou khipa khaiyu büa baie.

⁹ Vomai linou tsüchi paoyu hai zhaoh sozhiyu mai linou shuh hai bah hinou polaiyu bütoua baie.

¹⁰ Mai linou ludu hinou tayu vomai moa zhaoh sozhiyu mai liye ngapoa vah souyu hai voulou kayu mai linou mai hrülaiye zhi peiyu büa baie.

¹¹ Vomai linou kaozümo vah soukhai khaiyu hai sei linou rühpa khaitou hi khailou touyu büa baie.

¹² Mai lia lah nou lahye tsüveiwe tea choyu ngaoho moe? Sübüyu mai hai vomai li hi-a areih bupu hie.

¹³ Heakayu mai nanou paoe, “Duva hisü chipeikhaodu bue! Ludu hisü chipeikhaodu bue!”

¹⁴ Kikhu ali hai vanü (kabacha) hi khizhu khaitouyu büa heakayu mai liwo züphao hinou dakou dakhe-a bubaiwe.

¹⁵ Heakamai nasü puh bah hai likhao hinou thaithou khaitua puh mü hi pokhe thoure donou hikei-a baiwe.

¹⁶ Heakayu mai linou lahye veishoa chila peitou toulou süyu tsüvei mai anai jünoua tsüveipu hie tea choe.

¹⁷ Mainou züvayu li hi louzhoyu hai hao-a laiyu sei ali nou daoyu büa baie.

^18-19 Mai ali nou mai aliye süthaimah peiyu thainou, süsü Enou müzha baie tea paoyu mai nasü vomai linou thailou veiyu basei poa koyu büa baie.

²⁰ Süü chüthou moyu thaio, mei sü heita-a bailai; alia maichi paoshiyu hayu buh hisü züveiyu ha-a bailai.

²¹ Meivi nou meibvü hi souyu büa ae süü nou mei deikeiyu büa mai shimai nou sha southou peiwe.

²² Maichi paoshiyu hai vashore! Etao nou sünasü jüpa shopoa nou zhaothouwe!

²³ Müvei müthea nou ashi tsüle pfüyu mai hai naili aliye peivavayu dzünou nahokhai touyu büa baie.

²⁴ Veikhokho souyu mai ali hai puhnou ngaora-a buyu nasü puhvei chipao lako aveih sünou pokuloua baiwe.

²⁵ Puhnou chi lako veishoa paoyuma, puhye loucheso, daiolouzü puhvei lekhe hisü ngaorayu tya anai bue.

²⁶ Puhnou ngaorayu nasü do dusho-a nou poku louyuma, puhvei ashi nasü maisou vejüyu buh hinou pophao papeia bailai.

²⁷ Deibvü raoyu mai nasü sühi deloua bailai, alia chuh khaodu tayu maina hisü ludakhai poa ve-a bailai.

²⁸ Dayu chi paoposhu daishi peikhai touyu naye ngaorawe, alia sei-jüyu mü sünou pa hakare vah souwe.