TSÜCHITAO 23 - SHEEYU BAIBEL (BSI)

Tsüchi Arouna

¹ Nenou aduso mailiye koa toulai tea buyuki, ne nghoujü hi dai bue touyu zhutou louo.

² Ne hai tonghou shiyu mai alie toulouzü soutaosoua lah neye tukhalo.

³ Nenou puhvei touveiyu touso nasü jüpa shosouo, daiolouzü sünanou neye soushi peilou veie.

Tsüchi Anaina

⁴ Chingi ngaoloure donou teroua vah soula lesouo; phibah khailoure donou tsüvei cholo.

⁵ Nevei nangi khesü mei keipha touyu ali hinou hatalou veie, süna hai sükhaimoa shouh pfülou-a lüche büa tei hi zhaokhe ta-a bailai.

Tsüchi Acha

⁶ Toteiyu mai livei raokhao tousouo; puhvei touveiyu natao sü jüpaso.

⁷ “Talou toupulo” tea puhnou ne hisü paowe, ana puh lekhe hisü sübümoe. Puh sü puhnou tsücho-a buyu nasü baie.

⁸ Nenou touthou khaitouyu khesü rüpawu bailai, alia nevei chipao lako aveih khesü hamako bailai.

Tsüchi Akü

⁹ Vomai ali hi chipao aveih paore donou tesouo; daiolouzü puhnou nevei tsüchitao sü ngaophoulai moe.

Tsüchi Kirou

¹⁰ Puopao maivei deirai chuh polaiso, moa pfüpuo hayu maivei deirai taisouo.

¹¹ Daiolouzü puletaoye Vupa-apeio nasü khoushoe; Puhnou puletao donou neletaoye dulai.

Tsüchi Kiali

¹² Paodou-apeio vei chipao khesü soutaosoua keilo, alia nenou tsüdo chipao khesü doulou süyu koute doulo.

Tsüchi Kiahai

¹³ Nahmai aliye tukha nümoyu sü sousouo; nenou puhye süra nou dayuma puhsü thailai moe.

¹⁴ Nenou puhye süra nou dapei louzü, nenou puhye rabedushao hinou puhvei hrü hai vupaloulai.

Tsüchi Kiasü

¹⁵ Anahna, nenou tsüvei louzü, Esü savalai.

¹⁶ Nenou tsüsü chipao paolouzü, Esü lesa sholai.

Tsüchi Kiadai

¹⁷ Mah souyu maiye thainü souo; ana newo Mapao ye piyu hinou teithetsü lichopoa hrülo.

¹⁸ Cheche vuzünou sühisü thaikhai veilai, alia nevei areih nasü soude laihwulai moe.

Tsüchi Kiangou

¹⁹ Keilo, anahna, alia tsüveilo, alia nevei tsüle hai nenou hrüpfüa tayu ludu nasü soutaosoua cholouo.

²⁰ Zhaoh sozhiyu mai hrohi moa tohou shiyu maitao hrohi busouo;

²¹ Daiolouzü sozhiyu mai alia tohou shiyu mai sü touha-a bailai, alia pfünüyu nanou mai liye sahhea nou banou peia bailai.

Tsüchi Kiarou

²² Neye napeiyu ne puo pai keilo, alia ne pfü tsüpayu phaki, puhye ngaophou moyu souso.

²³ Acheche nasü hülo, ae sünasü zolaiso; tsüvei, paodou-apei, alia tsüsü taosü hülouo.

²⁴ Acheche mai livei puo sü lesa sholai, nah tsüvei ali nalou nasü puh hinou sayu soulai.

²⁵ Ne pfüpuoye panou ne vanou khaophu soulo, alia ne pfüye panou lesalo.

Tsüchi Kianai

²⁶ Anahna, nevei tsüle sü Eye peio, ae nevei nghithou sü avei ludu sü zhulo.

²⁷ Khakhapfü ae chilee moyu naotumai hai thailou veiyu rüh baie.

²⁸ Honapai nou maivei shaomai büa dazüa khowe alia mai taoliye sü soumah peiwure.

Tsüchi Kiacha

²⁹ Thaomai nou dopfüwe? Thaomai nou leveage? Thaomai nou pepo-a bue? Thaomai nou nolealea-a chi pao-a buwe? Thaomai nou nghithou homara-a buge?

³⁰ Teile poulao zhaoh sozhi-a laiyu maitao, zhaoh lathou hrüloua solai tea buyu maitao-e.

³¹ Zhaoh hai homara-a buyu phaki, pai hinou reipha phayu ki alia lavü kouyu phaki zhaoh sü zhuso.

³² Akhai hisü sünanou nghou büa daolai, alia laih büa keipei-a bailai.

³³ Ne nghithou sü sheemoyu na ngaopalai, alia ne sü kaomoyu chi paopalai.

³⁴ Ne sü zai touchü hinou soubu soua dazüyu mai li büa bailai, dzüluki vei haosah deka peinou pa züyu mai li büa bailai.

³⁵ “Puletao nou Eye da-a phare,” tea nenou paolai, “Eye mainou da-a phare, ana Enou sülou more. Daisounou E hai kushulou hodesa? E zhaoh pai kukhe li phoutalai.”