TSÜCHITAO 22 - SHEEYU BAIBEL (BSI)

¹ Zhih aveih nou laiho toungiyu noulai dolo tea paolouzü, zhih aveih nanou doloua baio.

² Toungi na-a ae touha na-a koa dao bailai; Mapao nou puletao mai hrülaiye sü soupeia baie.

³ Souzü süyu nawo kaozhoushi vere ngaolou-a tuchü louwe; ana chaome souwo louzü süna hi tapokou süna veayu dao-a baiwe.

⁴ Tainou souyu alia Mapao ye piyu vei buu louzü tourai ngiyu, khuhaohyu alia hriyu nasüe.

⁵ Rai-shuh alia rüh southou khaitouyu nasü kaozümo maivei ludu hisü bue; lahnou lahye kholouyu maisü sütao hinou tavai talouwe.

⁶ Nahtou liye puhnou tazü douyu ludu hinou douzüpa peio, sütoulouzü puhnou tsüpayu phaki-a sütao hinou tarei talai moe.

⁷ Toungi nanou touhana peinou tukha souwe, alia maivei poupaoh louyu mai nasü pouapei navei kilai baie.

⁸ Kaozümo thou vuhthouyu mai nasü veahoyu chachi bailai, alia puhvei lekhayu süüra nasü shita-a bailai.

⁹ Lela veiyu maiye sü hra peilai, daiolouzü puhnou puhvei touso hai touhayu maiye koa zhitouwe.

¹⁰ Maiye ngaoheiyu maitaoye sü hulaiwuo, sütoulouzü züveiyu-a ta-a bailai, alia züvayu ae chi ashi paoyua ha-a bailai.

¹¹ Tsüle sheesha touyu ae chipao lako aveih paoyu mai nasü, veo vei samai sou-a bulai.

¹² Mapao nou tsüdoye sü zhu-a nou khopeiwe, ana puhnou lühayu navei chipao sü popa laihwu baiwe.

¹³ Heakayu mainou paoe, “Kipah hi chipeikhaodu bue! Eye lududo hinou southawu bailai.”

¹⁴ Cheche moyu naotu livei mü sü thoushoyu kaobvü alie; Mapao nou rarouyu mai nasü sühi delou bailai.

¹⁵ Kaozü moyu sü nahmai vei tsüle hi bue, ana tukha souyu sünou sükhesü puh hinou hulailoua baiwe.

¹⁶ Lah chingi ngaopu loure donou touha maiye souveayu, moa toungi maiye peiyu nasü, lah touhata-a bailai.

¹⁷ Keilo, Enou tsüvei mainou paoyu chipao khesü ne hi doupeilai. Puletao vei dou-apei khesü ne le hi pothou khailo,

¹⁸ nenou sütao hai licholoua poa vah souta louzü, savayu nasü nenou ngaoloulai.

¹⁹ Enou nevei lüloucheyu nasü Mapao hi panou bulou nüwe; südonou chu Enou sütao hai ne hi paongao peilai.

²⁰ Enou neye donou chipao shirou hai rüpei khaitoue. Sütao hisü paodou-apei alia tsüdo aveih khesü louwe,

²¹ ae neye kaoyu ae checheyu sü doupeilai. Süthaisü neye seitayu maitao hisü nenou checheyu chila sü peiloulai.

Tsüchi Araina

²² Touha maivei shaosouo, daiolouzü puhsü halia hae, moyuma vea-a bumaiye robomü hinou pahshi soupeisouo.

²³ Daiolouzü Mapao nou puhmaiye sü phaobo peilai alia puletaoye soupira peiyu maiye sü puhnou sübüa soupeilai.

Tsüchi Ahaina

²⁴ Lekha shiyu moa zhaipou shiyu maiye samai sousouo, moa lekha-a laiyu maiye koa tasouo.

²⁵ Molouzü ne-a puhvei zhaidou doulou shulai alia rüh hinou ne-a lah lou muhlou bailai.

Tsüchi Asüna

²⁶ Mai paoh pfüyu maili vei müpfü khaiso, molouzü ne-a mai pao pfüyu mai souta shulai.

²⁷ Nenou paohkhai touyu nasü khalou hoyu thaisü, puletao nou nevei züphao sü pota-a bailai.

Tsüchi Adaina

²⁸ Paipaoh maivei deirai chuh sü poda laisouo.

Tsüchi Angouna

²⁹ Ne vah soulousü shoyu mai lia ngaoho moe? Puhsü vemai nghoujü hinou la-a bubailai; puhsü züdou moyu mai nghoujü hinou la-a bulai moe.