TSÜCHITAO 21 - SHEEYU BAIBEL (BSI)

¹ Vemai ali vei le hai Mapao bah hinou reidzü büa baie, Puhnou venüyu buh hisü panou küve-a baiwe.

² Mai linou souyu vah veishi hai lah puhvei nghithou hiwo kaokhai tea baiwe, ana Mapaowo puh lethou hinou zhua baiwe.

³ Acheche ae kaozü nanou soulo; süna hai Mapao nou posheela peiyu jünoua jüpapu hie.

⁴ Ngaohiyu nghithou alia khaophu souyu lüthou, mai ashimai vei meivabvü, haitao veishi nou mah baie.

⁵ Kounouyu mai nanou tsüchoda khaitouyu taosü veimo soua toungi hisü süthai save thoupeiwe, ana lehoyu mai liwo chelou jüyu hi ve-a bailai.

⁶ Dayu hinou ngaolouyu nangi louzü thasho-a khaophu phoutayu teihao büa baie, ae athai vei rüh baie.

⁷ Mai ashimai navei zhaipou shiyu sünou puletaoye paipoa ta-a bailai, daiolouzü puletao nou souzü nasü soubae.

⁸ Mahyu maina vei ludu louzü khirukao baiwe, ana sheeyu maina louzü kaozü vah souwe.

⁹ Züvei süyu maipfü liye koa ki li hinou buzho laijüo maivei kikai touli hinou hrüyu nou veipu hie.

¹⁰ Mai ashimai livei tsüle hi louzü hashi sounü koute-a bua baiwe; puletao hisü maiye zhuveayu sü hae.

¹¹ Maiye ngaoheiyu mai liye tudee peikhaie, chaome soumai nanou tsüvei pawe; tsüvei mai liye paodou peikhaie, puhsü tsüsüpu louwe.

¹² Checheyu Ramai, puhnou mai shiyu maivei ki hisü zhu-a nou bue, ae puhnou mai ashi maiye sü hakayu hi laithoua baiwe.

¹³ Touha mainou krayu pai kei bayu mai nawo puh-a vuli kra palai, ana mai linoua puh pai sü kei peilai moe.

¹⁴ Mai ali nou ne pei hi lekha louzü, kheikhei sou-a puhye sapeina ali peilouzü puhvei lekha sü souna loua bailai.

¹⁵ Kaozü nasü soupeiyu phaki, mai aveih mainou lesawe, ana ashi soumai donou leveayu li baie.

¹⁶ Tsüsü vei ludu hinou tarei tayu mai lisü athai maivei vejüyu buh hinou ve solai.

¹⁷ Vayu phou-a laiyu mai nasü touhamai li sou bailai; zhaoh alia theadzü ye leshiyu mai nasü toungi laimoe.

¹⁸ Mai shimai sü acheche maiye hüpa louyu muh baie, alia lü hayu mai nasü checheyu maina donou baie.

¹⁹ Zhaipou shiyu ae nolealeayu maipfü liye sa-a bure jüwo radeiki li hinou taho hrüyu-a veipu hie.

²⁰ Muh teiyu chingi haio tsüveiyu mai livei ki hinou bua baiwe, ana vomai liwo süsü touhaloua baiwe.

²¹ Checheyu alia leshi zhuvea phouyu mai nasü ahri alia tsükhouyu sü ngaoloulai.

²² Tsüveiyu mai linou khouko bumai vei nuhdu pei ngaopa louwe, alia puhmai nou louche-a buyu kivo sü soushiloua baiwe.

²³ Kaozhou ashi ae veahoyu sü daolai moe toulouzü, soutaosoua ne lah mü-li sü tukhalo.

²⁴ “Ngaohei-o” touyu sü khaophu souyu ae dulapayu maina vei zhih-e, puhsü zhaipou shia lado soua vah souwe.

²⁵ Heakayu maina vei jüpa nou lah puhye southalou baiwe, daiolouzü puh bah sü vah soubae.

²⁶ Teisa nou mai ashimai nawo maivei thainüa bubaiwe, ana checheyu mai nawo lela veisho-a peikoute-a baiwe alia halia shokhailou moe.

²⁷ Mai ashimai nou posheela peiyu hai Mapao nou ngaora-e, puhnou ashi tsücho-a pove peiyu-a ngaorapu hie.

²⁸ Da-a lah-apei (Da shaki souyu) mai nasü hakata-a bailai, ana soutaosoua maivei chipao kei louyu maisü laloulai.

²⁹ Mai ashimai lisü khuveiyu zhai soua baiwe, ana maicheyu mai liwo lah puhvei ludu sü tsücho louwe.

³⁰ Tsüvei linoua, kaiyu linoua, douzüapei linoua po-a Mapao ye dulou hoe.

³¹ Rhei nasü reih soure donou souda khaitoue, ana veilou ngalouyuo Mapao vei bah hi bue.