TSÜCHITAO 16 - SHEEYU BAIBEL (BSI)

¹ Tsücho dayu haio mai zha-e, ana chila peilaio Mapao veie.

² Mai li vei vah haso veishi hai puh nghithou hio louzü khaotou tea baiwe, ana Mapao louzü puhvei tsüle nou zhua baiwe.

³ Nevei vah sü Mapao hi thaothoulo, sütou louzü nevei chodayu veishi sü souche loulai.

⁴ Mapao nou hateitei hai vah bukhai-a soukhai toue, mai ashimai koute-a panou veahore donou soukhai toue.

⁵ Zhaipou shiyu mai hrülaiye Mapao nou ngaora-e, cheche vuzünou puletaoye sü souvea peimoa panou taloulai moe.

⁶ Chi züyu ae louchelou veiyu vanou mah sü khailu peilai. Mapao ye piyu mai sü panou hashi daolai moe.

⁷ Mai linou Mapao vei jüpa souloure touyu thaio, puhnou puhvei ngaobamai koute-a samai soulouwe.

⁸ Kaozü moyu hinou nangi alao ngaolouyu najüwo, cheche hinou titya ngaolouyu nanou veipu hie.

⁹ Mai ali nou tsüchodawe, ana Mapao nou puhvei phika süthaita peiwe.

¹⁰ Ramai nou zhopeiyu vemai ali hio, puhnou chikuyu phaki mah soumoe.

¹¹ Cheche-a sühdouyu ae macha hinou kadouyu alia tsüle sheesha tea huha souyu hai Mapao nou jüpa-e.

¹² Vemai nou hashi souyu hai ngaorayu alie, daiolouzü vebuh hai acheche hinou soushupa khaitoue.

¹³ Checheyu hai vemai vei jüpae, alia puhnou cheche chi paoyu nasü leshie.

¹⁴ Veo vei rarou hai thaiyu ko pfümai ali büe, ana tsüvei mai linou süsü soukhai loulai.

¹⁵ Vemai livei pah vayu hisü ahri bue, alia puhnou jüpayu hisü houki teirü pfüve peiyu teihao büe.

¹⁶ Ratsü ngaolouyu nanou sana ngaolouyu najünou veipu hie, shahu ngaolai jüwo tsüsü nanou dolo.

¹⁷ Checheyu mai vei ludu-o ashi hinou tarei talouwe, lah ludu zhutou louyu puhsü puhvei hrü hai khailupa loulai.

¹⁸ Khaophu soupa khai-e hakata baiwe, ae rochi lekhai-e kaotayu nou rai-a baie.

¹⁹ Tainoutou soua touha-a buyu nanou khaophu soua maivei shaolouyu navei zhiloua kuku-a buyu jünou veipu hie.

²⁰ Paodou peiyu chipao keilouyu maisü duso palai, alia Mapao ye lülou cheyu maisü lesayu maie.

²¹ Tsüveiyu naye sükulou süyu mai tea kuwe, alia keiveiyu chipao sünou maiye pa thai-nüyu soupu peiwe.

²² Tsüvei maiye donou ratsü hai ahri vei dzülae, ana voyu maiye paodouyu hai hamako baie.

²³ Hasüyu mai hai raomo jünou tsücho louwe, alia puletao vei chipao hisü maiye panou keinüyu hai thoupu louwe.

²⁴ Keiveiyu chipao haiwo laivoudzü büwe — kei veishoe alia pfüphao-a souvei peiwe.

²⁵ Mai linou ludu haina hai kaore tea tsücho-a buyuma, sünasü akhai hi kou thailou veiyu ludu soulou veie.

²⁶ Vah soumai livei müzhoyu sünou puhye panou vah soupu louwe, daiolouzü puhnou houzüyu haina sü rukha soulou nüe.

²⁷ Muh hayu mailinou shodo ashi souwe, alia puhvei chipao hai soushoyu mei ali büe.

²⁸ Kaozümo soumai linou zü-veiyu polata peiwe, alia kheichi paoyu mailinou sah-po khaye pora peiwe.

²⁹ Zhaipou shiyu mailiwo puh kinapaye lalouwe, alia puhye hashi hi süthou peiwe.

³⁰ Nghimai chouyu maisü kaozü moyu tsü chodawe, mütai muchi louyu mai nanou hashiye pa lata-a baiwe.

³¹ Peipaoyu hai aveih sodu soulouyu vei peirüe; hrümai shoyu nasü acheche mai vei buu-e.

³² Heamea süyu nanou khouko buyu mai jünou veipu hie. Lahye tukha lousüyu nanou nuhdu veishi khasa-a buyu jünou veipu hie.

³³ Maikhe mainou Ramai vei leli nasü rako dazhuwe, ana chila peilaiyuo Mapao pha baie.