TSÜCHITAO 14 - SHEEYU BAIBEL (BSI)

¹ Naotumai livei tsüvei nanou lah puh ki sü soulouwe, ana voyu naotupai louzü lah puh bah nou soushi loua baiwe.

² Cheche-a tayu mai nasü Mapao ye piwe, ana kheirei souyu ludu hi tayu nanou Puhye ngaophou moe.

³ Voyu mai livei chipaoyu haio lah puhye dare süüda ali baie, ana tsüvei mai livei mütai nou puletaoye vupa peilai.

⁴ Sa-a tatayu chode hayu buh hisü thou hae; ana shinamara pouyu hai chode vei pfüchi vanou vewe.

⁵ Louchelou veiyu shaki mai nou dayu chi pao moe; ana dayu la-apeio louzü dayu likhei pao baiwe.

⁶ Maiye ngaohiyu maisü hako hinou tsüveiyu phoua baie, ana tsüdo sü tsüsüyu maili donou talapa-a baie.

⁷ Vomai nou buyu buh hisü buso, daiolouzü sühisü nenou tsüdo lia douloulai moe.

⁸ Süyu maili vei tsüveiwo louzü lah puhvei ludu sükuloue. Maili hai daivanou tsüha-e toulouzü, puhsü lah süwe tea tsücho louyu vanou vo-e.

⁹ Ramai nou mai ashi maiye lekhawe, ana maicheyu nawo puhvei jüpa ngaolouwe.

¹⁰ Lüthou nou lah vei veayu nasü süwe, alia shevai-shesü maili noua puhvei lesayu nasü zha ngaozholai moe.

¹¹ Mai ashimai vei ki sü souhawu bailai, ana acheche mai vei ki louzü veipalai.

¹² Mai linou ludu haina hai kaore tea tsücho-a buyuma, sünasü akhai hi kou thailou veiyu ludu soulou veie.

¹³ Nü-a buyu teile hi-a lüthou sü levea-a bubaie, alia savayu vei akhai sü dongai baie.

¹⁴ Kaozümo souyu maili hai lahnou ngaozü thaifüa ngaolai, alia mai aveih maili sü puhvei vah sovei thaifüa buu ngaolai.

¹⁵ Chaome souyu mainawo haveishi nou louche baiwe, ana souzü süyu nawo louzü puhnou daiki tawe tiyu zhuwe.

¹⁶ Tsüvei mai linou leikeia hashi hinou tarei talouwe, ana voyu nawo shameayu laiwu-a chaochao sou-a baiwe.

¹⁷ Lekha shiyu mai liwo thoulou moyu vah souwe, ana lahvu soulou süyu mai louzü shamea süe.

¹⁸ Tsüvei moyu mailiwo lah puhnou vo-a kaozü moyu soukhai touyu nasü ngao-a baie, ana dokai veiyu maiwo louzü tsüdo aveih nanou vepeirü soupeiwe.

¹⁹ Hashi nasü haveih na nghoujü nou khurüwe, alia mai ashi nanou acheche mai hinou zhuvea peio tea kholai.

²⁰ Touhayu mai sü lah puh kinapamai koutea jüpa moe, ana toungi nawo louzü samai khamai alao bue.

²¹ Lah kinapaye ngaophou moyu haisü mah-e, ana touhayu maiye zhuvea leshi peiyu mai sü savalai.

²² Haveih souyu mai sü mainou louchelai alia tsükhouyu ngaolai; hashi soure bo phouyu mai sü kaomo tare.

²³ Teroyu teitei hisü shupa bue, ana mü pha-a laiyu maisü touha-a bailai.

²⁴ Tsüvei maivei peirü louzü puhmai vei ratsü nasüe, ana voyu nasü kaozü moyu hinou sülouwe.

²⁵ Cheche-a shaki soupeiyu nanou mai hrirai vupa peiwe, ana dachi paoyu nawo maiye doutha peie.

²⁶ Mapao ye piyu hinou maili vei leduyu sü bue, alia puhvei kikhamai hai kaozhou vei-a bulai.

²⁷ Mapao ye piyu hai ahri vei dzüla lie, süvanou athai vei rüh hinou tarei paloulai.

²⁸ Mai pouyu hinou veo vei kathe sü bue, ana mai hayu thaio puh sü hakata-a bailai.

²⁹ Sososoua lekhayu nasü tsüveie, ana lekha ashi mai lisü puhvei kaozü moyu sü soupa ngao-a baie.

³⁰ Kaonasha touyu tsüle hai pfüphaoye souvei peiwe, ana maiye ngaoraiyu hai-o sourao hi sou ashi soua tangiyu büa baie.

³¹ Touhayu maiye souveayu mai sü puletaoye soupeiyu Ramai ye ngaophou moe, ana vea-a laiyu maiye leshi peiyu maisü puhye tsükhoue.

³² Mai ashi mai sü lah puletao vei hashi souyu vanou hakata-a baiwe, ana acheche mai louzü puhvei chileeyu vanou baibu ngaolouwe.

³³ Ratsü hai tsüsüyu mai hrülai hi bue, ana sünasü vomai linou sümoe.

³⁴ Acheche nanou tyahrü liye souduso peiwe, ana mah touyu haina louzü tyahrü taraliye donoua hraongu sü baie.

³⁵ Tsüvei-a vah souyu kilai mai lisü veo vei jüpa ngaoloue, ana puhvei lekha rarou nasü haongu vah souyu mai hi bue.