TSÜCHITAO 10 - SHEEYU BAIBEL (BSI)

Solomon vei Tsüchitao

¹ Tsüveiyu nah linou puo vei le sousa peiwe, ana voyu nah liwo pfüye souveayu sü baie.

² Maishi soua ngaolouyu nangi haio hupa hae, ana checheyu sünou neye athai hinou vupa peilai.

³ Mapao nou acheche maiye panou hou-züa tamoe, ana maishiyu mainou jüpashoa buyu nasü puhnou souka pei baiwe.

⁴ Bah keiyu vanou touha sü vewe, ana kounouyu mai bah linou soungi peiwe.

⁵ Teilü kinou pojü louyu nah sü kaozü souyu mai-e, ana chaki zhiyu nah lisü haongu pfüve peiwe.

⁶ Checheyu mai nou ha khesü ngaolai, ana mai ashimai mü hinou zhaipou shiyu chipao khesü kupfüa bue.

⁷ Acheche maiye lichoyu hai shiha alie, ana mai ashimai livei zhih sü taha-a-bailai.

⁸ Mai aveih linou paodou peiyu khesü polouwe, ana mü pouyu vomai liwo hakata-a bailai.

⁹ Chilee-a tayu mailisü kaozhou veia tawe, ana tsüle sheemoa kaomoyu ludu hi tayu mai louzü phoupaloua bailai.

¹⁰ Nghimaiyu mai nasü maiye radaipa-a baiwe, ana khuveia züpeiyu mai nanou soukaona peiwe.

¹¹ Acheche maili vei müwo ahri dzüla li-e, ana mai ashimai müwo poushi kupfüa bue.

¹² Ngaorayu sünou souzüvei peiwe, ana leshiyu sünou kaomoyu teitei hongi baiwe.

¹³ Tsüsüyu maina mütai hinou tsüvei sü ngaoloue, ana süüda louzü tsühayu maiye dare donou baie.

¹⁴ Tsüvei maiwo tsüdo pojükhai louwe, ana vomai livei chithou loumoyu ae müpouyu nou hakayu sü thasho-a pove peiwe.

¹⁵ Hangiyu maili vei chingisü puhvei khouyu nuhdue; hahayu maivei touha sü puhmai vei ha-a katayu nasüe.

¹⁶ Vah aveih souyu maivei buu sü ahri nasüe, ana maishiyu maiwo mah ngaopuloua baie.

¹⁷ Paodou peiyu hai kei louyu maisü hriyu ngaoloulai, ana deipeiyu chi lubayu maisü shita-a bailai.

¹⁸ Ngaorayu pokheia buyu mai nasü dayu mütai pfüwe, alia maiye paomah paoshi-a laiyu maisü vomaie.

¹⁹ Nenou chi alao paolouzü, ne sü mah soupu louveie, ana mü tukhalou mai nasü tsüveiyu mainae.

²⁰ Acheche maili vei chipao hai veikayu shahue; mai ashi maili vei tsüle louzü muh lia hae.

²¹ Acheche maili vei chipao sünou mai alaoye souvi peiwe, ana vomai louzü tsü hayu vanou thai-a baiwe.

²² Mapao vei shiha nou soungi peiwe, alia puhnou sühisü leveayu hai thoupei moe.

²³ Kaomoyu vah souyu hinou savayu hai voyu vah baie. Tsüveiyu mai sü ratsü vanou vasawe.

²⁴ Maishi mai nou piyu nasü puh pei hi ve-a bailai, ana acheche mainou jüpa-a buyu khesü ngaoloulai.

²⁵ Teikhai teirü ashi veyu phaki, mai shiyu maitaoye sü hüpoa ta bailai, ana acheche maiwo louzü teisa nou kaozhou vei-a bailai.

²⁶ Heakayu mai liye panou nevei vah sü soukhai tiso, puhsü neye donou khaiyu dzü keloua huh keiyu büa bailai, moyuma nghithou hi meikhao louyu büa bailai.

²⁷ Mapao ye piyu vanou hrüso hrüloulai, ana maishi mai louzü hrü jüa bailai.

²⁸ Acheche maivei areih louzü lesayu hinou ve akhai soulai, ana maishi mainou vuzhi-a buyu nasü hamako bailai.

²⁹ Mapao nou tsüle sheesha touyu maiye vupa peilai, ana vah kaomo souyu maiye souhawu bailai.

³⁰ Acheche mai louzü popa laikhai tilai moe, ana maishiyu mai louzü teidei hinou hrüa bulai moe.

³¹ Acheche mai mü nou tsüvei paopa peiwe, ana kaozümo souyu mai mali louzü daode laiwu bailai.

³² Acheche mainou aetou louveiyu chipao khesü süwe, ana maishimai müwo kaozü moyu chipao likhei süa baie.