TITA 3 - SHEEYU BAIBEL (BSI)

Khristamai Zhaido

¹ Nemai khemaiye teidei khomaitao ea soulousü zü bumaitao khakhehi buloure, puletao chi züloure, alia avei vah tali souloure donou souda loure paoposhu licho peikhaio.

² Puletao hi maitali chi paoshiwu more ea zü-veimoa natai-a buloure, alia maikhemai hrülaihi kaonayu zhaido tangao peire donou paopeikhaio.

³ Daiolouzü lah Eletao-a teileli hisü voe, paoyu zübae ea madae. Eletao sü vasou züpa ea deiphao hi va-sayu tyatyali vei qilatao soue. Eletao sü maiye ngaoba-ngaorai-a hrüe; mai kukhenou Ehye ngaobae ea Ehnou-a puletaoye ngaobae.

⁴ Ana Eletaoye khailu-apeio Ramai vei zhuvea ea leshi hai pongao peiwuyu kisü,

⁵ puhnou Eletaoye khailu peire. Süsü lah Eletao nou acheche vah tali souwuyu vanou moe, ana lah puhvei zhuvea vanou baie. Puhnou Eletaoye Rako Mashi vanou khüshee peiwu-a puh vanou Eletao hi nashu louyu ea hrü ashu peiwuyu vanou khailupeie.

⁶ Ramai nou Eletao Khailu-apeio Jisu Khrista vanou Eletao pei hi Rako Mashi alaosou lakou thoupeire,

⁷ sübüa puh zhuvea vanou Eletaoye hai Ramaiye koa souzü peiwu-a Eletao nou rei-a buyu teisa ahri vei kaalo nasü panou thaoloulai.

⁸ Paopeiyu haisü louchelou veiyu chipaoe. Ramaiye louche louyu puletaoye panou mai hrülai donou veiyu ea koyu vah aveitao souyu hi lah puletao vei teile veitoua peiloure donou Enou neye panou paopeiyu chipao haitaosü soutaosoua paodou peiyu züpae.

⁹ Ana voyu chi veivayu, pai-paomai zhih rüthoupfüa laiyu, züvayu ea razhai vanou saovayu hinou tareilo, daiolouzü sütaosü koyu lia hae ea hakobaie.

¹⁰ Souphe-soukhoyu puhye sü lüh ahai koute tukha peiwuwo, alia süthaisü puhye koa hatalia soupu khaiso.

¹¹ Sübüyu maihai maiye sümah-sümoyu ea mah sou-a laiyu maibaie touyu hai nenou süwe, alia puh lahnou puhye sü mah dukhaiwure.

Akhaisoua Doupeiyu

¹² Enou nehi Artemas moa Tukhikaye seiveyu kisü, ne Nikopoli hi taveloua soulou veisa Ahi tavekhaio, daiolouzü sühinou saiki buloure donou E le laloure.

¹³ Ne soulou veisa Zenas zhaisüwo ea Apollosye puhai vei veihdu hai thashoa tashu loure donou soukha peikhaio ea puhaivei moshilaiyu teitei hai buche mosa touyu hai nenou zhutou peikhaio.

¹⁴ Alia Ehmai taonou moshilaiyu talihi soukha peiloure donou puletao vei teile hai vahvei soua bulouresü panou doulou vuzükhaio; puletao nou hakoyu hrü hrüa buwu laimoe.

¹⁵ Eye koa bumaitao hrülainou nehi khurüyu chidoh seiwe. Lü hinou Eletao sa soua buyu puletao hisü Ehvei khurüyu chidoh taosü peikhaio. Ramai zhuvea nou neletao hrülaiye koa buyu sü souloutheo.