TITA 1 - SHEEYU BAIBEL (BSI)

¹ Haisü Ramai kilaio ea Jisu Khrista vei sei-atamai ali soua buyu Paul hinoue. Ramai nou dolouyu maitao vei lü nasü soukha peire donou ea puletaoye Eletao rahrüzhai nou doupei khaitouyu acheche nahi süthou peiloure donou Eye doloure ea seipeiwure,

² rahrüzhai süsü teisa ahrinaye rei-a buyu süna vanou soushupa khaitoue. Mada moyu Ramai nou shurai jühinou haina hai Eletao hi peilai tea apaopei khaitoue,

³ alia süsü teile zhouvei hinou puhnou puh chipao hinou pongao peire. Chipao süsü Abah hi thaothou peiwure, alia Enou süsü Ramai Eletaoye khailu-apeio vei kharochi vanou paodouwe.

⁴ Ehnou koa lü hinou alisoua buyu Anahpoutu achecheo Tita hi Enou rüwe. Puo Ramai ea Eletao khailu-apeio Khrista Jisu nou nehi zhuvea ea kaonayu peiyu sü souloutheo.

Krit hinou Tita nou Vah Souyu

⁵ Enou neye Krit hi thaokhaiyu süvei qowo louzü neye panou souchelou moyu vahtao sü soushee loure ea nuhdu liki hi tsümai buh thoupei loure süsüe. Enou paodou peiyu chitaosü lichokhaio:

⁶ tsümai alihai bvüroyu havuzülai; puh hai chapfü alikhei bubailai, alia puh nahmaitao hai lüloumai souvu zülai ea puletao hai chaochao souyu ea paoyu zübayu hinou zhih tayumai soulaimoe.

⁷ Daiolouzü lüloumaime vei tsümai alihai Ramai vah hi peipha-apeimai aliyu donou puh hai chaa hazheilai. Puh hai khaophu soulaimoe moa rarou haha laimoe, moa zhaoh shozhi laimoe moa taisü-dasü laimoe, moa pousha hinou küshiyu mai soulaimoe.

⁸ Puh hai maiye shelou süyu ea avei züpayu mai soulai. Puh hai lahye tukhalou süyu, cheche hinou latouyu, sheeyu, alia lahye tukhalouyu maili soulai.

⁹ Puhnou louchelou veiyu ea doupeizhai naye aetouyu chipao süsü soutaosou povu zülai. Sübüa puhnou kukhemai taoye cheche-a doupeiyu sünanou le soudu peilousüe ea sünaye bayu maitao hai mah-e tea pongao peilousüe.

¹⁰ Daiolouzü mai khakhehi hrübayu, chaochaosou chi paoa laiyu ea madayu maitaoli bue koulihsoua hee rodeyu mehinou bue.

¹¹ Puletao mühai khawu vuzülai, daiolouzü puletao nou douzü moyu sünanou doupeia kikhamaitao teiteiye souphe-soukhore, alia sütao teiteihai küshia pousha ngaoloure donoue.

¹² Lah puletao Kritmai baiyu rachi paolamai alinou paoe, “Kritmai hai teisanou dayumai baie, puletao hai khaosou ashi alia hikeiyu baabvü dutaoe.”

¹³ Chipao haisü chekhaoe. Südonou puletaoye panou lü hinou veiloure donou nenou puletao hisü chihshoa züpeikhaio

¹⁴ alia Jihudimai daomaikotao ea emai vei chikhataosü panou popukhaiso daiolouzü sütaosü acheche naye pobayu maitao hinou vebaie.

¹⁵ Sheeyu maitao hisü ha teiteinou sheebaie, ana zhaiwuyu ea louche moyu puletao hisü hatalia sheemoe; daiolouzü puletao vei le ea lekhetsütao hai zhaiwure.

¹⁶ Puletao nou Ramaiye süe tea paowe, ana puletao vei vahtaonou puhye bawe. Puletao hai ngaorayu ea paoyu zübayu taoe, puletaosü havei talia souzüdou moe.