TAPALOUYU 8 - SHEEYU BAIBEL (BSI)

Vao

¹ Süthaisü Mapao nou Moses hi paoe, “Veo hi taho Mapao nou haibüa paowe tea paokhaio, ‘Eye thore donou avei maitaoye panou tawo.

² Ana nenou puletaoye panou taba louzü, Enou nevei vedei teitei hisü vao nou seive phoutao peilai.

³ Nail rei hi buyu vao veishi sü panou paloua nevei vebuh hi, nevei zübuh ki hi, nevei züphao hi, nevei peikho maitao ki teitei hi ae nevei mai hrülai hi ae hakhoyu ki teitei hia vao panou ve phoutao peilai.

⁴ Vao khesü panou ne vahi, nevei maitao ae peikho maitao hrülai vahi zhaopa panou taolai.’ ”

⁵ Mapao nou Moses hi paoe, “Aaron hisü puhvei süüpo nanou rei teitei hi ae zaibvü teitei hi polashu peikhaio tea paopeio, sübüa panou sütao hi buyu vao khesü tapa Ejipt teidei teitei hisü phoutaolo.”

⁶ Südonou Aaron nou puhvei süüpo nasü dzü buyu buh teitei hi polashu peikhaie, vao khesü tapa dei teitei raoloure.

⁷ Ana veo vei kheikhupado soulousü mai-a puletao vei kheikhupado hinou vao khesü dei hi soupa loure.

⁸ Süthaisü veo nou Moses ae Aaron ye kuloua paoe, “Mapao hi veachi paopeia vao khesü panou polai peia baio, sükulouzü Enou nevei maitaoye panou taho Mapao ye thotalai.”

⁹ Moses nou chila peie, “Enou neye donou, nevei peikho maitao donou ae nevei maitao donou veachi paopeilai, südonou Eye panou veachi paore teile ali dade peio, sübüa vao khesü panou dei kukhe hi bumoa Nail rei hi likhei bua bailai.”

¹⁰ Pharaoh veo nou paoe, “Dosho Eye donou veachi paopeio.” Moses nou paoe, “Nenou paoyu thaifüa Enou soupeilai, sübüa neye panou Etao Ramai Mapao büa rah kukhe aliro hae touyu sü panou süloulai.

¹¹ Vao khesü panou ne hinou, ne ki hinou, nevei peikho maitao hinou, ae nevei maitao hinou souha peiwulai, Nail rei hi likhei panou bua bailai.”

¹² Süthaisü Moses ae Aaron nou veo hinou tare, alia Moses nou Mapao hi nenou seiveyu vao khesü veo hinou souha peio tea veachi paopeie.

¹³ Moses nou khoyu thaifüa Mapao nou soupeie; südonou ki hi buyu, kijü nou buyu ae dou hinou buyu vao khesü thaitare.

¹⁴ Ejipt hi mainou vao khesü pove khotao khailoue, ae dei teitei hisü kai ngishi shore.

¹⁵ Veo Pharaoh nou vao thaiyu ngaolou khaie, puh le sü khoupulou khaire alia Mapao nou paoyu büa puhnou Moses ae Aaron nou paoyu chi sü keipei bare.

Thoumü

¹⁶ Mapao nou Moses hi paoe, “Aaron hi paokhaio, ‘Puhvei süüpo nasü pokou deiphi dakhaio, süthaisü Ejipt teidei hi nainghi buyu teitei sü thoumü dapalai.’ ”

¹⁷ Südonou Aaron nou puhvei süüpo sünou deiphi pokou dapei khaie, Ejipt hi buyu naihü teitei sü thoumü datakhaire, alia maiva hi ae hrikhaona hrülai va hisü pa taoloure.

¹⁸ Ejipt hi kheikhupado soulousü mai-a puletao vei kheikhupado nou thoumü soupare donou soue, ana soulou hore. Südonou Ejipt teidei teitei hisü thoumü nou phoutao loure.

¹⁹ Kheikhupado soulousü mai nou veo hisü paoe, “Haina hai Ramai nou souyu vah baire.” Ana Pharaoh veo le sü khousholoua baire, alia Mapao nou paoyu büa puhnou Moses ae Aaron nou paoyu chi sü keipei bare.

Khaomai

²⁰ Süthaisü Mapao nou Moses hi paoe, “Dosho shona kushu zhiloua veo nou Nail rei hi louyu teile hinou puhye taho daowuo, alia Mapao nou haibüa paowe tea paopeio ‘Avei maitaoye panou Eye thore donou tawo.

²¹ Nenou avei maitaoye panou taba louzü, Enou ne pei hi, nevei peikho maitao hi ae nevei maitao, nevei kihikha ae Ejipt maivei kikha teitei hi alia puletao nou hrüyu dei teitei hisü khaomai seive phoukha peilai.

²² Ana süzhou teithe avei maitao nou hrüyu Goshen teidei hiolouzü panou khaomai velai moe. Enou haibüa soupeilai, sübüa neletaoye panou E hai Mapao nasüe touyu süloulai.

²³ Enou avei maitao ae nevei maitao tea soukukhai peilai. Haibüa nou shee nasü dosho soupeilai.’”

²⁴ Mapao nou khaomai khesü veo ki hi, puhvei peikho maitao ki hi, ae Ejipt teidei teitei hisü seive panou soushikhai toure.

²⁵ Süthaisü veo nou seiho Moses ae Aaron ye kuloua paoe, “Avei teidei hai hinou neletao taho neletao Ramai ye sü posheelawo.”

²⁶ Ana Moses nou chila peie, “Süsü soulou shie, daiolouzü Etao nou Mapao Ramai ye posheela-a thoyu haisü Ejipt mainou ngaoloua valai moe. Etao nou kikhaorü nou dathaloua Mapao ye Ejipt maivei nghingao hinou posheela louzü, puletao nou Etaoye chuh nou deitha shulai.

²⁷ Eletao Ramai Mapao ye posheela-a thore sü, teithe asü Etao nou rekou tahomo louzü shie, daiolouzü Puhnou Etao hi sübüa soulo tea kharochi peikhai toue.”

²⁸ Südonou veo nou paoe, “Neletao nou doushoa talai moe toulouzü, Enou neletaoye panou neletao Mapao Ramai ye posheela-a thore donou pa rekou talai, Eye donou veachi paopeio.”

²⁹ Moses nou chila peie, “Enou buh hai hinou thaowua talouzü, doshowo khaomai khesü ne hinou, nevei peikho maitao hinou alia nevei mai hrülai hinou souha peio tea Mapao hi veachi paopeilai. Ana avei maitaoye panou taho Mapao Ramai ye posheela-a thore nasü nuchao peiso.”

³⁰ Moses nou veo hinou tayu thai, puhnou Mapao hi veachi paoe,

³¹ alia Moses nou khoyu thaifüa Mapao nou soupeie. Khaomai khesü veo hinou, puhvei peikho maitao hinou alia puhvei maitao hinou souhakhai peiwure.

³² Ana veo nou zhaovua puh le sü khoushopu loure, alia maikhe maiye sü panou tabare.