TAPALOUYU 7 - SHEEYU BAIBEL (BSI)

¹ Mapao nou Moses hi paoe, “Enou neye Pharaoh nghoujü nou Ramai ali büa soupeilai, alia ne jürai Aaron ye nevei rachipaola apeimai ali soua puh hisü panou chi paopeilai.

² Enou ne hi kharochi peikhai touyu teitei sü Aaron hi paopeio, sübüa Aaron ye panou veo hisü Israel maiye puhvei teidei sü thaokhaiwua panou tapalo tea paopeilai.

³ Ana Enou Pharaoh le sü soukhousho peiwulai, ae Enou Ejipt teidei hisü veahoyu ae khupayu vah taoli soupeilai.

⁴ Sübüa soupeia buyuma Pharaoh veo nou nevei chi sü keipei laimoe, süthaisü Enou Ejipt maiye tudee peilai ae veaho shoyu sü panou ve daolai, alia Enou avei maitao, Israel maiye sü Ejipt teidei hinou sapa peilai.

⁵ Enou Ejipt mai hi abah thaithou deiloua Israel maiye puletao hrohinou sapa louyu thaisü, puletao nou Eye Mapao-e touyu sü süloulai.”

⁶ Mapao nou kharochi peiyu büa Moses ae Aaron nou soue.

⁷ Puhai nou Pharaoh veo hi chakuyu phaki Moses hai po raicha pare alia Aaron nou po raichasü pare.

Aaron vei Süüpo

⁸ Mapao nou Moses ae Aaron hi paoe,

⁹ “Veo nou ne hai hi ‘Khupayu vah ali soungao khaio’ tea kho louzü, nenou ‘Aaron hi nevei süüpo nasü poloua veo nghoujü laikou khai peio, sübüa panou nghou ali dapalo tea paolai.’”

¹⁰ Südonou Moses ae Aaron nou veo hi ve Mapao nou paoyu büa souwe. Aaron nou puhvei süüpo nasü poloua veo ae puhvei peikho maitao nghoujü laikou khaipei khaie, süüpo nasü nghou ali daloure.

¹¹ Süthaisü Pharaoh veo nou puhvei vedei hi buyu hasümai ae kheikhupa soulousü maiye kupove puhai nou souyu raibüa souloure.

¹² Puletao vei süüpoa deiphi laikou peikhaie, sütao-a nghou dapaloure, ana Aaron vei süüpo nghou nanou puletao vei sü zhaoloure.

¹³ Sübüyuma veo sü chukoute puh le sü khoushoa bubaie, alia Mapao nou paoyu büa puhnou Moses ae Aaron nou chi paoyu sü keipei bare.

Ejipt Teidei hi Veahoyu Veyu Zhe

¹⁴ Süthaisü Mapao nou Moses hi paoe, “Pharaoh veo vei le sü khousho loure alia maikhe maiye sü panou tabare.

¹⁵ Südonou dosho shona taho puhnou Nail rei hi lou dzükhüyu hinou puhye daowo. Nghou dalouyu süüpo nasü polo, alia puhye reipe hinou kholo.

¹⁶ Süthaisü veo hi haibüa paowuo, ‘Hebrew maivei Ramai Mapao nou Eye ne hi seivewe alia haibüa paopeio tea paoe, “Amaitao ye panou tawo, alia puletaoye panou rekou nou taho Eye thotawo.” Ana chukoute nenou Achi keipei bare.’

¹⁷ Südonou chuo Mapao nou haibüa paore, ‘Puhnou soulaiyu vahtao hinou nenou puhye sü Mapao-e touyu süloulai. Zhukhaio, abah hinou poyu süüpo haina nou pokou Nail reidzü khoupei louzü reidzü teitei nou zhe data bailai.

¹⁸ Khah khesü thai talai, ae reidzü sü kai ngishi sholai alia Ejipt hinou hrüyu mai hrülai nou dzü sü kelou shi-a bailai.’”

¹⁹ Mapao nou Moses hi paoe, “Aaron ye sü puhvei süüpo polo tea paopeio, alia süsü Ejipt teidei hi buyu rei, reitou ae zaibvü teitei hi panou polashu peikhaio, sübüa panou dzü teitei sü zhe datawo. Teidei sühi buyu dzü teitei sü zhe datalai, ki hi pokhai touyu dzübvü khe-a zhe data bailai.”

²⁰ Moses ae Aaron nou Mapao vei kharochi thaifüa soupeie. Veo Pharaoh ae puhvei peikho maitao nghoujü hinou Aaron nou puhvei süüpo nasü polashu loua pokou dzü hi khou peikhaie, dzü teitei sü zhe datakhaire.

²¹ Rei hi buyu khah khesü thaire, ae kai sü ngishi shoa ngipare alia mai ali koute-a dzü sü kelou shire. Ejipt teidei teitei hisü zhe khai toure.

²² Süthaisü veo vei hasümai ae kheikhupado soulousü maitao-a raibüa souloure. Südonou veo sü raichoki büa puh le sü khousholoua Mapao nou paoyu büa puhnou Moses ae Aaron nou paoyu chi sü keipei more.

²³ Veo nou haibüa vepayu khesü ngao-a buyuma, puhnou le peimoa lah puh vebuh hisü dakhai tare.

²⁴ Rei dzü sü kelou shiyu donou Ejipt mai hrülai nou reipe hinou dzükhao sü hetare.

²⁵ Mapao nou rei dzü dapeiyu hai teithe anai pare.