TAPALOUYU 38 - SHEEYU BAIBEL (BSI)

Posheelana Deire Buh Soulouyu

¹ Puhnou posheelana poa meideire posheelabu ali akasia süü nou souloue, süsü sajha-a raibütoua souloue, sa shoyu nou mitar 2.2 ae jha duyu nou mitar 2.2, alia kuyu nou mitar 1.3.

² Puhnou kainghou adai hisü kai alili soukhailoue. Kai adai sütao ae posheelabu sünasü puhnou alikhei soua souloue, ae sütao teitei sü baosahu nou neaho khailoue.

³ Puhnou vonai vüthoure lee, poa hakure khaocha, raikhao alia paikhao khesü baosahu nou souloue.

⁴ Puhnou khophao ali baosahu nou souloue, ae sünavei kainghou adai hi kaopore donou baosahu nou haorü touyu adai souloua khikhailoue.

⁵ Puhnou baosahu nou lürüyu adai souloua kainghou adai hisü kaopoa tare donou khikhailoue.

⁶ Posheelabu naye kaopore süü sü akasia süü nou souloue, alia sünasü baosahu nou neaholoue.

⁷ Alia kaopore süü nasü posheelabu tha ahai hi haorüa soukhai touyu hisü thaithou khailoue. Puhnou sünasü lukhao nou souloue.

Baosahu nou Raikhao Soulouyu

⁸ Puhnou phibah khüre donou phi pfüyu raikhao ali, Mapao nou buyu Rathokipao hi taloure kikhubomü hi buyu naotumai vei baosahu zuhyu nou souloue.

Mapao nou Bure Rathokipao hi Chikuyu kide

⁹ Puhnou Mapao nou bure Rathokipao hi chikuyu kide nasü züzüyu haosah nou souloue. Khelo haore haosah nasü mitar 44 sho-a souloue,

¹⁰ ae süna haokhaire donou deka kai ae kabei kai sü baosahu nou souloue; ana dekatao pothou vaore ae thaithouretao hai shahu nou souloue.

¹¹ Süna raibütoua reilova-a haore haosah sü souloue.

¹² Teinghi loulovatha haore haosah nahai mitar 22 sho-a nou haoloue, ae süna haokhaire donou deka kirou ae kabei kirou sü baosahu nou souloue; ana dekatao pothou vaore ae thaithouretao hai shahu nou souloue.

¹³ Teinghi palovatha, kikhubomü buyu hilova-a haosah nasü mitar 22 jha dua souloue.

¹⁴ Kikhubomü alilovatha hi haore haosah nasü mitar 22 due, alia deka asü ae dekabei-a asüe.

¹⁵ Taloure kikhubomü alilovatha-a haosah nasü mitar 22 due, deka asü ae dekabei-a asüe.

¹⁶ Haosah teitei sü züzüyu sah nou haokhai touwe.

¹⁷ Chikuyu kide pehao teitei hi dekatao sü baosahu nou soukhai touloue, ae vaokhaire shuhtao, hutao, alia kipei kakheyu kizhatao hai shahu nou souloue. Chikuyu kide hi paimuyu kizha teitei sü shahu nou souloue.

¹⁸ Chikuyu kide hi taloure kikhubomü hi haore haosah hai veishoa soukhai touyu deizüzüyu sah daiyu, maomüyu ae homarayu tyanou souloua cha veishoa kuthou khaitoue. Haosah haina hai mitar 9 sa shoe, ae mitar 2 kue.

¹⁹ Haosah haina haore donou deka adai ae dekabei adai hai baosahu nou souloue, ae vaokhaire shuhtao, pei hi kare hutao hai shahu nou soue.

²⁰ Rathokipao hi ae chikuyu kide hi veathoure hushuh teitei sü baosahu nou souwe.

Mapao nou Buyu Rathokipao poa Souyu Hutao

²¹ Chikha kirou rüthou khaitoua buyu chuh ahai khaiyu buh, Mapao nou buyu Rathokipao souyu hisü hu haizhou loure touyu sü haitaoe. Haitao hai Moses nou kharochi peia napao Aaron nahpoutu Ithamar nou Levi maitaoye süthai poa souloue.

²² Judah khü hinou hrüveyu Hur tyao, Uri nahpoutu Bezalel nou Moses hi Mapao nou kharochi peikhai touyu teitei sü soukhai touloue.

²³ Puhye soukha apeio, Dan khü hinou hrüveyu Ahisamak nahpoutu Oholiab, puh hai shara souvei shoyu, larücha rüvei shoyu ae daovei shoyu, alia daiyu, maomüyu ae homarayu soumai sah ae deizüzüyu sah hai daovei shoyu mai alie.

²⁴ Rathokipao soure donou posheela peiyu sana hai kilo theli ngaoloue.

²⁵ Mai pei choyu hinou shahu ngaolouyu hai kilo 3,430 ngaoloue.

²⁶ Haitao hai mai pei choa zhih rüthou khai touyu mai alili nou pazütao pothou hrüloua phoue. Po kai rei payu poutumai hai 603,550 bue.

²⁷ Shahu kilo 3,400 hai Rathokipao souyu hi dekabei ae haosah vei dekabei kaihli poa soue, dekabei ali hinou kilo 34 loua nou souwe.

²⁸ Shoa buyu shahu kilo 30 taonou Bezalel nou poa deka hi vaokhaiyu shuh, kipeitaoh hi paimuyu ae pothou thaithouyu hu khesü souloue.

²⁹ Baosahu pove sheela peiyu hai nou kilo 2425 ngaoloue.

³⁰ Puhnou baosahutao sü poa Rathokipao vei talouyu kikhubomü hi dekabeitao, baosahu vei posheelabu ae khophao alia posheelabu sühi poa vah soure natao,

³¹ chikuyu kide vei dekabeitao, alia Rathokipao ae chikuyu kidei vei vaokhaiyu shuh teitei poa souloue.