TAPALOUYU 37 - SHEEYU BAIBEL (BSI)

Vo Sübvü Souyu

¹ Bezalel nou akasia süü nou sentimitar 110 shoyu, sentimitar 66 jha duyu, ae sentimitar 66 kua Vo Sübvü nasü souloue.

² Sübvü nasü phaovai-a ae levai-a sana nou souholoue ae pehao teitei hia sana nou khahao khailoue.

³ Süü thaithou loua Sübvü süna kaopoa tare donou sana nou haorü touyu adai souloua phi holova ahai ae hailova ahai teanou khikhai loue.

⁴ Sübvü sünaye kaopoa tare donou akasia süü nou süüpo ahai souloue, ae süü süna ahai vasü sana nou meakhaloue,

⁵ alia süüphi süna ahai sü sübvü phi holo hailo chükhei thaithou khailoue.

⁶ Puhnou zhuvea-apei buh ali veishoa sana nou sentimitar 110 shoyu ae sentimitar 66 dua souloue.

⁷ Puhnou sana nou shouh pfüyu khaona ahai chuhda nou poa daloue,

⁸ ae süna ahai hisü zhuvea-apei buh holova ali ae hailova ali tea khailoue. Puhnou sütao teitei sü ali soua soupaloue.

⁹ Shouh pfüyu khaona ahai sü zhuvea-apei buh hilova rei-a khaitoue alia puhai vei shouh sünou buh süna kou howe.

Raokhao nou Ramai ye Posheelayu vei Khaiyu Buh Souyu

¹⁰ Puhnou akasia süünou raokhao khaire buh ali sa shoyu sentimitar 80, jha duyu sentimitar 44, ae sentimitar 66 kua souloue.

¹¹ Puhnou sünasü sana veitya nou phao hi thou meakhaiholoue, ae süna pehao teitei hia sana nou meahaoloue.

¹² Ae süna pehao hi thou haore donou milimitar 75 dua souloue alia sünasü sana nou zühao khailoue.

¹³ Tebel sünaye kaopoa tare donou sana nou soukhai touyu haorüyu adai sü phi buyu kainghou adai hi khikhailoue.

¹⁴ Tebel sünaye kaopoa tare süü thaithoure donou lürüa soukhai touyu nasü pehao hi thou dahao khaitouyu süü naye nghia veakha khaitoue.

¹⁵ Kaopoa tare süü nasü akasia süü nou souloue ae sünasü puhnou sana nou souholoue.

¹⁶ Posheelayu hi poa vah soure donou puhnou pai, khao, lee ae natao sü veishoyu sana nou soukhailoue.

Meivabvü Khaibuh Souyu

¹⁷ Puhnou meivabvü khaiyu buh nasü sana veitya nou souloue, ae süna vei bei alia bahtao sü hubao nou poa dathouloue; ae poupa büyu pai, süübo lapayu ae poupa papayu büa zhai southou khai touyu khesü vasou ali hinou soupa khaitoue.

¹⁸ Meivabvü khaibuh hisünou baokao arou panou paloue, süsü holova baokao asü ae hailova baokao asü.

¹⁹ Baokao alili hinou hüveishoa poupa payu zhai büa poupa asü asü bua soukhai toue, ae sütao sü kurushipa papayu büa süübotao ae süünghou noupu koa soukhaitoue.

²⁰ Meivabvü khaibuh bahtao hisü kurushipa büyu poupa papa-a ae süübo noupu loua poupa cha tya adai daothou khaitoue.

²¹ Baokao ahai pa-a payu baokao asütao phi hisü nou poupa mübo payu alili bue.

²² Poupa mübo payutao, baokaotao, ae meivabvü khaibuh teitei sü sana veitya nou alikhei soua soupa khaitoue.

²³ Meivabvü khaibuh hisü puhnou meivabvü anai southou khailoue, alia puhnou meivabvü souheiyu ae thoukhaiyu khao sü sana veitya nou souloue.

²⁴ Meivabvü khaibuh ae sühi natao teitei hai puhnou sana sühcho 35 nou poa souloue.

Kai Nghivei Deire Posheelabu

²⁵ Kai nghivei deire donou posheelabu ali akasia süü nou soulo. Hainasü sajha-a raibütoua souloue. Sa shoyu-a ae jha duyu-a sentimitar 45 nou soulo, alia kuyu nou sentimitar 90 kulo. Kainghou adai hi payu kaitao sü alikhei soua soupa khailoue.

²⁶ Pei hi thouyu süütao, pehao hi kayu süütao ae kaitao teitei hisü sana veitya nou souholoue, alia sana nou pehao teitei sü zhahaoloue.

²⁷ Posheelabu pehao hinou zhahao khaitouyu khelobü hinou, sünaye kaopoa tare donou sana nou lürüa soukhai touyu ahai sü holo ali ae hailo ali tea khithouloue.

²⁸ Kaopoa tare süü nasü akasia süü nou souloue, alia süphao hisü sana nou souholoue.

Poa Neare Theadzü ae Meideiyu Pou Kainüvei

²⁹ Puhnou poa neare sheeyu theadzü alia veishoyu pou kainüvei nasü poudzü kainüvei souyu mainou souyu büa souloue.