TAPALOUYU 36 - SHEEYU BAIBEL (BSI)

¹ “Bezalel, Oholiab, alia Mapao nou soulou süyu dokai ae tsüdo aveih thoupei khai touyu shara souyu mai hrülai nou Mapao nou kharochi peikhai touyu thaifüa Rathokipao nasü soulai.”

Maikhe Maitao nou Posheelana Alao Pove Peiyu

² Süthaisü Moses nou Bezalel, Oholiab alia Mapao nou soulou süyu dokai thoupeikhai touyu maitao ae vah soukha nüyu maitao sü kuve jüloua panou vah soutare.

³ Israel maitao nou pove sheela peikhai touyu posheelana khesü poa sheeyu Rathokipao soure donou puletao nou Moses hinou poloure. Israel maitao nou posheelana khesü thaokhai timoa shonatsü sü Moses hi pove peiwe.

⁴ Südonou Rathokipao souyu maitao nou tave

⁵ Moses hi paoe, “Mapao nou Etaoye souwo tea kharochi peikhai touyu vahtao poa soure jünou la-a maikhe mainou posheelana khesü pove peia bure.”

⁶ Südonou Moses nou maikhe mai hisü sheeyu Rathokipao poa vah soure donou posheelana khesü pove peipu moa baio tea kharochi peiwure. Südonou maikhe mainou posheelana khesü pove peipu more.

⁷ Daiolouzü maikhe mainou pove peikhai touyu natao hai poa vah teitei soure jünou la-a bure.

Mapao nou Bure Rathokipao Souyu

⁸ Mapao nou bure Rathokipao nasü vah soua buyu maitao hrohinou shara souvei khayu maitao nou soue. Puletao nou Rathokipao nasü züzüyu haosah kirou, ae daiyu, maomüyu alia homarayu soumai pha nou thouhrüloua sah sühisü shouh pfüyu cherubim khaona nou veishoa daothouloua soue.

⁹ Haosah sütao teitei nou raibütoua baie, sa shoyu nou mitar kiahai alia jha duyu nou mitar ahai-e.

¹⁰ Puletao nou haosah angou taosü ali soua rüpaloue alia kukhe angou tao-a ali soua rüpaloue.

¹¹ Haosah kainghou dukayu nahisü sah daiyu ali nou thaithou vaore qulu sousha khailoue, ae sübüa ahai cheyu haosah mü nahia kainghou dukayu nahisü souloue.

¹² Haosah mü araina hi buyu sah kaidukha nahisü thaithou raiphure donou qulu raingou soucha khaitoue, alia haosah mü ahai chena hia kaidu buyu sah nahisü qulu raingou souchaloue.

¹³ Haosah sühaiye ali soua khipare donou sana nou khipayu shuh raingou souloue.

¹⁴ Rathokipao pei hi haore donou puletao nou nghitu mainou soukhai touyu sah kiali souloue.

¹⁵ Puletao nou haosah sütao sü sajha-a raibütoua souloue, sa shoyu nou mitar kiasü ae jha duyu nou mitar ahai.

¹⁶ Haosah angou sü ali soua rüpaloue ae haosah arou taosü kua nou me ali soua rüpa khailoue.

¹⁷ Haosah me araina hi sah kaidu buyu nahisü thaithou raiphure donou qulu raingou soucha khailoue, ae haosah me ahai chena hia kaidu buyu sah nahisü qulu raingou souchaloue.

¹⁸ Baosahu nou vaokhaire donou shuh raingou souloua haosah me ahai sü pokou ali soua vaokhaire donou souloue.

¹⁹ Puletao nou Rathokipao pei hi hore donou sah ahai souloue, sah ali sünou zhaotu mainou zhusa thoupa homara khaitouyu tyanou souloue, ae kukhe nanou souhee nou veishoa soukhai touyu nou souloue.

²⁰ Akasia süünou puletao nou Rathokipao nasü souloue.

²¹ Poa kayu kizha khesü mitar adai sa sho-e, ae sentimitar 66 jha dua souloue.

²² Kizhatao paimure donou kizha alili hinou qulu ahaihai soucha khailoue. Kizha teitei hinou haibüa qulu ahaihai bukhai toue.

²³ Rathokipao vei khelovatha hi kizha kai thoue,

²⁴ ae sütao phi hi thoure donou shahu nou dekabei raidai souloue, kizha ali hinou phi ahaihai thoukhailoue.

²⁵ Reilovatha-a kizha kai thoua soukhai toue,

²⁶ ae sütao vei phi hi thoure donou shahu nou dekabei raidai souloue, süsü kizha ali hinou dekabei ahaihai thouloue.

²⁷ Kithailova, teinghi loulo hisü kizha arou thoua souloue,

²⁸ ae kainghou hi kizha ahai thoua souloue.

²⁹ Kainghou ahai hi thoukhai touyu kizha sünou phi hinou poa pei hi khete sü paimu khailoue. Kainghou hi kizha ahai sü haibüa souloue.

³⁰ Südonou kizha acha hisü shahu nou soukhai touyu dekabei kiarou, kizha ali hinou dekabei ahaihai thouloue.

³¹ Poa Rathokipao tyare donou akasia süü nou kiangou souloue, süsü tha alilova nou angou,

³² ae alilo vatha nou angou, alia kithailova, süsü teinghi loulovatha hia angou loue.

³³ Toutsü hinou kakouyu süü nasü rathokipao akhai hinou poa alilovatha akhai koute kakouloue.

³⁴ Kayu süütao hisü sana nou neaho khaitoue, ae tyayu süü nasü poa kayu süü hi dakhare donou sana nou souhao khailoua kayu süü hisü pokou tyayu süü nasü dakhaloue. Tyayu süütao-a sana nou neaho khaitoue.

³⁵ Rathokipao hore donou puletao nou haosah nasü daiyu, maomüyu ae hoyu loua deizüzüyu soumaipha nou ahai thaoloua soukhaitoue, alia süna hisü shouh pfüyu khaona zhai veishoa cha daothou khaitoue.

³⁶ Haosah haina haore donou akasia süü nou deka adai souloue, ae deka sütao hai sana nou neahaoloue alia haosah nasü vaokhaire donou shuh sü sana nou souloue, ae shahu nou dekabeitao thou sholayu buh soukhai toue.

³⁷ Ratho kipao hi taloure vei haosah nasü daiyu, maomüyu ae hoyu loua züzüyu pha ahai thaoloua soukhaitoue, alia sühisü zhai veitoua cha kuthou khaitoue.

³⁸ Haosah haokhaire donou puletao nou akasia süü nou deka angou souloue, alia deka angou sütao hisü sana nou neahaoloue ae haosah vaokhaiyu shuh angou taosü sana nou souloue; ae deka sütao poa sholare donou baosahu nou phi angou souloue.