TAPALOUYU 34 - SHEEYU BAIBEL (BSI)

Chikha Rüthouyu Chuh Ahai Chena

¹ Mapao nou Moses hi paoe, “Raichoki bütoua chuh ahai daolo, ae chuh sühai hisü nenou dakhoyu chuh ahai hi rüthou khaitouyu chikha khesü Enou rüthoupu peilai.

² Na soudaloua dosho shona sü Sinai deichi hi taopakhaio, ae deichi peitaoh hinou ne lah tapa Eye daowo.

³ Neye koa mai aliro panou deichi pei mataoh hisü palai moe, ae mai taralia panou deichi vasü buso, zhaotu moa kikhaorü ali-a deichi phi hisü panou pou-a touso.”

⁴ Südonou Moses nou chuh ahai sü raichoki puhnou daoyu büa daoloua Mapao nou puh hi kharochi peiyu thaifüa thainesho shona sü kushuloua chuh ahai sü poloua Sinai deichi hisü patare.

⁵ Mapao nou teihao hinou kouloua puh hi kou koa laloure, ae puh zhih sü “Mapao” tea paopapeie.

⁶ Mapao nou süthaisü puh nghoujü hi takou loua haibüa paoe, “Mapao E hai maiye zhuvea süshoyu ae leshi süshoyu Ramai-e, E nou leshiyu hai akhai hae ae louche louveiyu nasüe.

⁷ Enou apaokhai touyu nasü maiphao thethe koute-a ngaimoa leshi peiwe ae puletao vei vah ashi alia mah khesü khaipeiwe. Ana puopaoh mai mah donou avei tudee nasü puletao nahmai ae tyaomai khaphao asü adai koute hia velai.”

⁸ Moses nou puh peipfüa nakouha touloua puhye sü thore.

⁹ Alia puhnou paoe, “Oh Mapao, nevei nghingao hinou E hai nevei zhuvea bulouzü, Eye koa tapeio. Mai haitao hai maichi mairo choubayu mai baie, ana Etao vei ashi ae mah khesü khaipeio, alia Etaoye nevei mai soua popeio.”

Vo Sousheepu Louyu

¹⁰ Mapao nou Moses hi paoe, “Enou Israel maitaoye koa vo ali soulai. Neletao mai hrülai nghoujü nou Enou khupayu vah soupeilai. Sübüa soulaiyu hai deiphao teitei hi moa tyahrü ali hia soukhai timo hie, ae neletaoye koa buyu pehao mai hrülai nou Mapao vei vah sü ngaolai, daiolouzü Enou neletao hi soure vah nasü khupa shoyu ali soulai.

¹¹ Enou zhou teithe neletao hi peikhai touyu chikha khesü zülo. Sükulouzü Enou Amor mai, Kanaan mai, Hit mai, Periz mai, Hiv mai, ae Jebus maiye neletao nou takouyu phaki puletaoye hulai peilai.

¹² Neletao nou takoure teideitao hi hrüa buyu maitaoye koa vo soukhai tiso, hakinou puletaoye koa vo soulouzü, sünasü neletaoye donou shorüh thoukhai touyu büa bailai.

¹³ Puletaoye koa chavei lathao rejüo, puletao vei posheelabu khesü soukho laiwo, puletao vei sheeyu chuhsho khe ae Asherah rah vei zhurai khesü soushi soukho laiwo.

¹⁴ “Rah kukhe ali koute-a thosho, daiolouzü Mapao Avei zhih hai Ngaoraiwo touwe, ae E hai Ngaoraiyu Ramai nasüe.

¹⁵ Teidei sütao hi hrüyu maitaoye koa vo soukhai tiso, daiolouzü puletao nou puletao vei ramaiye thoyu phaki, ae posheelayu phaki neletaoye kupove louveie, alia neletao nou puletao hi ve louzü, neletao-a puletao vei posheelayu touso khesü koa tou shulai.

¹⁶ Ae puletao nah naotu khesü neletao nahpoutu khenou naloua nou khakhapfü ali büa puletao vei rah khesü thota shulai.

¹⁷ “Bashara khesü souloua thoso.

¹⁸ “Khei thoumoyu Raokhao Nüh nasü nülo. Enou neletao hi kharochi peikhai touyu büa teithe anai koute sü khei thoumoyu raokhao khaotouwo. Hainasü paopei khaitouyu Abib khouh nou nülai, daiolouzü neletao nou Ejipt teidei thaowua tapa louyu hai Abib khouh hinou tapaloue.

¹⁹ “Nahpoutu naraio alia ke pou hinou toukou arai kikhaorü nasü avei-e.

²⁰ Rheisüh nasü neletao nou zhaotu ali nou poa khailupa louveie, ana neletao nou honasü khailupa laimoe toulouzü ngu hinou rachawuo. Nahpoutu naraio louzü muh peia khailupalo. “Mai taralia posheelana loumoa ahi velou laimoe.

²¹ “Teithe arou koute neletao lah vah soulo, ana teithe anai zhousü asolai; neletao nou dou shayu phakia moyuma chachiyu phakia solai.

²² “Neletao nou southou chachi talaire toulouzü Chanüh nülai, ae potei akhai hikou shinamara pove khaiche loure toulouzü Sahpao Nüh nülai.

²³ “Potei ali hinou bakha asü hai poutumai touyu hrülai nou tave neletao Ramai Mapao Eye tholai.

²⁴ Enou neletaoye donou teidei sütao hi hrüa buyu tyahrü khesü hulai peilai, alia neletao vei teidei sü soudupapu peilai, alia neletao nou potei ali hi bakha asü tave neletao Ramai Mapao nghoujü ve louzü, mai tarali noua neletao vei teidei jüpa-a reih hulou laimoe.

²⁵ “Neletao nou Eye kikhaorü posheela peiyu phaki, khei thouyu raokhao koa nou posheela laimoe, alia Tachopa Nüh hi posheela khaitouyu touso khesü thainesho shona koute panou bulai moe.

²⁶ “Neletao teidei hinou shinamara parai khayu khesü Mapao vei ki hi pove peio. “Neletao nou nghitu moa zhaotu tyoutu nasü ke vei naodzü koa khotouhrü laimoe.”

²⁷ Mapao nou Moses hi paoe, “Chipao haitao hai rükhailo, daiolouzü chipao haitao thaifüa Enou neye alia nevei maitaoye koa vo soukhaiwure.”

²⁸ Moses nou heakhei raidai sü halia tou moe ae dzüa ke moa Mapao ye koa bue. Puhnou daokhai touyu chuh hisü vo soukhai touyu chipao, chikha kirou taosü rüthouloue.

Moses nou Sinai Deichi vanou Kouyu

²⁹ Moses nou Sinai deichi vanou chikha kiroutao rüthoukhai touyu chuh ahai sü puh bah hinou poloua kouyu phaki, puhvei pah sü varu toure, daiolouzü puhnou Ramai ye koa chi pha-a buyu donou, ana puh louzü lah puh pah hai varuwe touyu sü sümoe.

³⁰ Aaron ae Israel mai hrülai nou Moses ye zhuyu phaki, puh pah sü varua buyu zhingao loua puh hisü nghikou pire.

³¹ Ana Moses nou puletaoye kuloure, südonou Aaron ae süthai apei maitao nou puh hi takou loure, alia puhnou puletaoye cha-e.

³² Süthaisü Israel mai hrülai nou puh hisü nghikou loure, alia Moses nou puletao hisü Mapao nou puhye Sinai deichi hinou peikhai touyu chikha khesü paongao peie.

³³ Moses nou puletao hi chi paocheyu thai, puh pah sü pahosah nou holoure.

³⁴ Ana puhnou Mapao ye daolai tea Ratho kipao hi talouyu phaki puh vei pahosah nasü laopawe, ae sübüa puhnou kijü tapamosasü bue. Puhnou vakou tapayu phaki, puh hi kharochi peikhai touyu khesü Israel maisou hi paongao peiwe.

³⁵ Israel mainou Moses pah hai varua buyu ngaokhaie, puhnou puh pah sü pahosah nou hodakhai loua baiwe, alia puhnou Ratho kipao hi veloumo koute hapa-a moe.