TAPALOUYU 33 - SHEEYU BAIBEL (BSI)

Sinai Deichi Thaowua Tawo tea Kharochi Peiyu

¹ Mapao nou Moses hi paoe, “Buh hainasü thaowua Enou Abraham, Isaak, ae Jakob alia puletao vei tyaonah maitao hi peilai tea paokhai touyu teidei hisü nenou Ejipt teidei hinou sapakhai touyu nevei maitaoye sü saloua tawo.

² Enou neletaoye panou khosa-a tapeire donou rakivamai aliye seive peilai, alia Enou Kanaan mai, Amor mai, Hit mai, Periz mai, Hiv mai, ae Jebus maiye huta peilai.

³ Veishoa buyu teidei, chonaodzü ae leivoudzü nou küa buyu teidei hisü neletao taho hrülo; ana Ewo louzü neletaoye sa-a tapupei khailai more, daiolouzü neletao hai maichi mairo sabayu mai baie, südonou lududo nou neletaoye Enou souhawu shulai.”

⁴ Maikhe maitao nou chipao hainasü choulou khaie, puletao mai hrülai nou levea-a dopfüre alia puletao nou zhusana khesü süzhou nou noupu khai more.

⁵ Daiolouzü Mapao nou Moses hi haibüa maikhe maitao hi paopeio tea paore, “Neletao hai maichi mairo sabayu mai baie, Enou neletaoye phajü toulia koa talouzü neletaoye souha shulai. Südonou neletao vei zhusana khesü phakhaiwo, süthai nou neletao hi E dai soulai touyu tsücho laihie.”

⁶ Südonou Israel mainou Sinai deichi thaowua tayu thai, zhusana khesü noupu khai more.

Mapao vei Ratho Kipao

⁷ Israel mainou taho fühao soua buyu teitei hisü Moses nou sheeyu Ratho kipao nasü puletao vei fühao hinou hrophoua khai koute loue, sünasü puhnou Mapao nou buyu Ratho kipao tea kuwe. Alia mai tarali noua Mapao ye chaku nüyu maisü puletao vei fühao hinou tapaloua ve Ratho kipao hinou chawe.

⁸ Moses nou Ratho kipao hi talai tea tapayu phaki, mai hrülai nou kushuloua lahkuku vei sahpao kikhubomü hinou la-a Moses nou Ratho kipao hi talou loumo koute puhye phe-a bue.

⁹ Moses nou Ratho kipao hi talou louyu thai, teihao deka sünou kou Ratho kipao kikhu hi bulouwe, ae sübüa Mapao nou Moses ye chiphae.

¹⁰ Teihao deka nanou Ratho kipao hi kouyu maisou nou ngaore toulouzü, mai hrülai nou lahkuku vei sahpao kikhubomü hinou ratholai.

¹¹ Mapao nou Moses ye chi phayu hai samai ali nou aliye chakuyu büa zhu haohao nou chipha peiwe. Moses nou soure vahtao ae chi phacheyu thai, puhnou lah puhvei sahpao hisü dakhai ta-a baiwe, ana puhye soukha apeio nahle puona Nun nahpoutu Joshua louzü Ratho kipao nasü thaowua ta-a moe.

Mapao nou Puhvei Maitaoye Koa Tapeilai tea Apaopeiyu

¹² Moses nou Mapao hi paoe, “Mai haitaoye satawo tea nenou ahi paoe, ana thaonou Eye koa satalai touyu sü ne ahi paopei moe. Nenou Eye azhih nou süwe alia Eye zhuvea peilai ae Eye jüpawe tea paoe.

¹³ Südonou chuo nenou Eye leshi louzü alia Eye panou ne jüpa vah soupu loure donou ahi nevei ludu khesü ngaopeio. Süpei nou tyahrü haina hai nenou dopa louyu tyahrü aliye touyu sü lichopeio.”

¹⁴ Mapao nou puh hi paoe, “Enou neye salai peilai, alia veilouyu ae kolouyu nasü Enou ne hi peilai.”

¹⁵ Moses nou paoe, “Nenou Etaoye koa satalai moe toulouzü, Etaoye panou buh hai hinou tapu khaiso.

¹⁶ Nenou Etaoye koa tapeimo louzü, nenou Eye alia avei maitaoye zhuveawe touyu sü maikhe mainou kabüa süloulai? Nenou Etaoye koa laipeiyu haina nou Etao hai deiphao mai kukhe jünou tyakue touyu sü süloulai.”

¹⁷ Mapao nou Moses hi paoe, “Nenou paoyu bütoua Enou soupeilai, daiolouzü Enou neye süwe alia Enou neye jüpae.”

¹⁸ Moses nou paoe, “Zhuvea nou nevei khouko ava nasü E-a ngaowo.”

¹⁹ Mapao nou paoe, “Avei aveih ava teitei sü ne nghoujü panou takou ngaolai, alia avei sheeyu zhih nasü ne hi paopa peilai. E hai ‘Mapao’ nasüe alia Enou zhuvea peinüyu maiye sü zhuvea peiwe, ae Enou leshi peire maiye sü Enou leshi peiwe.

²⁰ Enou neye avei zhu ngaolou shie, daiolouzü deiphao mainou avei zhu ngaoloua hrimoe.

²¹ Ana ape hinou nghia buyu buh ali bue, buh sühi sünou ne chuh phao ali hinou la-a bulo.

²² Avei khouko ava nasü takouyu phaki, Enou neye chuh qulu ali hi thouwulai, ae Enou talakou loumo koute abah nou neye holoulai.

²³ Süthaisü abah phapeiwulai, ae nenou athaivai sü ngaolai, ana azhu louzü ne ngaolou hoe.”