TAPALOUYU 3 - SHEEYU BAIBEL (BSI)

Ramai nou Moses ye Kulouyu

¹ Naiteitheli Moses nou Midia hi napao, puh paoh Jethro vei nghitu ae zhaotu khoa rekou nou haopoa sheeyu Sinai deichi hisü vere.

² Buh sühinou Mapao vei rakivamai ali nou meikei ali büa poube hinou taopoa puhye ngaopeie. Moses nou poube hinou mei sü taopoa nou buyu sü ngaoe, ana poube nasü mei deimoe.

³ Süthaisü puhnou “Haibüa poube hinou mei taopayu haiwo khupa shore, daisounou poube nasü mei deimosa touyu takou nghiloua zhulai hie,” tea tsücholoua nghiki takoue.

⁴ Moses nou zhulai tea takou nghiyu sü Mapao nou ngaoloua poubetao hrohinou “Moses! Moses” tea puhye lapare. Puhnou “E haihi bue” tea chila peie.

⁵ Ramai nou paoe, “Ne takou nghipusou baio! Nevei phikha sü phakhaio, daiolouzü nenou la-a buyu füdei hai nasü sheeyu dei-e.

⁶ E hai nevei paipaoh maivei Ramai-e, Abraham, Isaak ae Jakob vei Ramai-e.” Südonou Moses nou puh pah sü holoure, daiolouzü puhnou Ramai ye zhulou pire.

⁷ Süthaisü Mapao nou paoe, “Ejipt hinou hrüyu avei maitao nou veahoyu sü Enou ngaore, alia puletaoye tukhasa-a ae taideipoa nou vah souyu mai bah hinou kra-a vupapeio tea khoyu paisü Enou chouloure. Puletao nou veahoyu teitei sü Enou süwe.

⁸ Südonou chuo Enou puletaoye Ejipt mai bah hinou vupa loure donou vere, alia puletaoye sü teidei aveih, chonaodzü ae laivoudzü nou küa buyu teidei hi, chuchu Kanaan mai, Hit mai, Amor mai, Periz mai, Hiv mai ae Jebus mainou hrüa buyu teidei hisü save thoupeilai.

⁹ Israel mainou kra-a khoyu paisü chuo Enou süloure alia Ejipt mainou puletaoye souvea-a tudeeyu sü Enou ngaoloure.

¹⁰ Südonou chuo ne tashulo, Enou neye Pharaoh veo hisü seive panou avei maitao, Israel maitaoye Ejipt teidei hinou sapa peilai.”

¹¹ Ana Moses nou Ramai hi paoe, “Esü hazho toulia moyu mai ali baie, kabüa veo nghoujü tave Israel maiye Ejipt teidei hinou sapalou khailaige?”

¹² Ramai nou Moses hi chila peie, “Enou neye salai peilai, alia nenou Israel maiye Ejipt hinou sapa louyu phaki, deichi hai hinou tave nenou Eye tholai. Hai nasü Enou neye seitawe touyu shee ali soulai.”

¹³ Süthaisü Moses nou Ramai hi paoe, “Enou Israel mai hi tave ‘Neletao vei paipaoh Ramai nou Eye neletao hi seivewe’ tea paolouzü, puletao nou ahi ‘Puh zhih sü thaotouwe?’ tea nouyu phaki, E puletao hi daitea chila peilai?”

¹⁴ Ramai nou Moses hi paoe, “E sü E baie. Ne taho Israel mai hisü haibüa paopeio: ‘E tea kuyu nanou Eye sü neletao hi seivewe.’”

¹⁵ Israel mai hisü taho haibüa paopeio, “Mapao, neletao paipaoh Ramai, Abraham, Isaak ae Jakob Ramai nou Eye neletao hi seivewe. Haihai teisa nou avei zhih soulai, ae haithai vere khaphao teitei hia Eye sü haibüa kulai.

¹⁶ Taho Israel maiye süthai apei maitaoye kujülo alia haibüa paopeio, Mapao, neletao vei paipaoh Ramai, Abraham, Isaak ae Jakob Ramai nou Eye ve zhu ngaopeia haibüa paoe, ‘Neletao nou kabüa Ejipt hinou hrüa bue touyu khesü Enou ngaoloure.

¹⁷ Ale sü laloure, süolouzü Enou neletaoye veahoshoa buyu Ejipt mai bah hinou veishoyu teidei, chonaodzü ae laivoudzü nou küa buyu Kanaan mai, Hit mai, Amor mai, Periz mai, Hiv mai, ae Jebus mai vei teidei hisü save peilai.’”

¹⁸ “Avei maitao hai nenou paoyu sü keipeia bailai. Süthaisü nenou Israel mai hi tsümaitao saloua Ejipt maivei veo hisü taho haibüa paowo, ‘Hebrew maivei Ramai Mapao nou tave Etaoye daowe, südonou chuo zhuvea Etaoye panou teithe asü li taho radeiki hinou Etao Mapao Ramai ye posheela-a thowuo.’

¹⁹ Ejipt hi veo ye sü khoushoyu khouko ali nou tudeemo koute, neletaoye panou talai moe touyu Enou süwe.

²⁰ Ana Enou abah thaipa khupa tyatyali soupeia Ejipt maiye sü tudee peilai, süthai nou puhnou neletaoye panou talai.

²¹ “Enou Ejipt hi maiye panou neletao tsükhou loure donou soupeilai, alia neletao nou Ejipt teidei thao-a tapayu phaki panou sakhai-a talai moe.

²² Israel naotumai hrülai nou lahlavei kinapa soua buyu Ejipt naotumai hinou tave touh, baosa, shahu, sana ae sabanü khesü kho loulai, ae sükhesü neletao nahpoutu ae nah naotu kheye noupeilai, sübüa neletao nou Ejipt maivei kini khesü poloua tapa loulai.”