TAPALOUYU 24 - SHEEYU BAIBEL (BSI)

Vo Soulouyu

¹ Süthaisü Mapao nou Moses hi paoe, “Ne, Aaron, Nadab, Abihu alia Israel hi tsümaitao mai rainai koa ahi tapawo. Neletao nou buh hi nghikoure toulouzü, Eye nakou khurüa tholo.

² Ne likhei ahi nghikoua bailai, mai kukhetao louzü panou buh ho-a bulo, deichi peitaoh hia panou taopaso.”

³ Moses nou tave Mapao nou kharochi peiyutao alia chikha khesü maisou hi paopeie, alia mai hrülai nou paila ali soua “Mapao nou paoyu chi teitei sü Etao nou soulai” tea chila peie.

⁴ Mapao nou kharochi peikhai touyu teitei sü Moses nou rükhai loure. Puhnou thainesho shona sü kushuloua deichi phi hinou rathobuh ali souloure alia Israel mai khü chekhei nou chuh chekhei, chuh kiahai sü shola loure.

⁵ Süthaisü puhnou nahlemai seiho panou Mapao ye meideia posheela peie alia kaozhou vei-a ae sava-a hrüloure donou kikhaorüa posheela peie.

⁶ Moses nou posheela khaitouyu kikhaorü taovei zhe dali hai raikhao hi thouloure alia dali hai rathobuh hi lazüwure.

⁷ Süthaisü Moses nou chikha larübvü nasü poloua maikhe mai hi chongao peie, alia maikhe maitao nou paoe, “Mapao nou paoyu teitei sü Etao nou soulai, alia Etao nou puh chi zülai.”

⁸ Süthaisü Moses nou raikhao hi khaitouyu zhe sü poloua maikhe maitao hi kashopeie, alia puhnou maikhe mai hi haibüa paoe, “Zhe haina hai Mapao nou chikha peikhai touyu teitei neletao nou soulaie tea koa vo soulouyu nasüe.”

⁹ Süthaisü Moses, Aaron, Nadab, Abihu alia Israel hi tsümaitao mai rainai koa nou deichi hisü taopa tare,

¹⁰ alia puletao nou Israel maivei Ramai ye ngaoe. Puh phi khe hai Saphir chuh nou soukhai touyu ludu, teidaiyu raibütoue.

¹¹ Ramai nou Israel maiye süthai-apei maitaoye daishi peimoe; puletao nou Ramai ye ngaoe, alia puletao nou koa touso zho-e.

Moses nou Sinai Deichi hi Payu

¹² Mapao nou Moses hi paoe, “Deichi hi taopa Eye daowo, Enou neye chuh hinou rükhai touyu chikhatao alia maikhe maiye panou kabüa hrülai touyu zhaitao teitei louyu chuh ahai peilai.”

¹³ Süthaisü Moses nou puhye soukhayu Joshuaye saloua sheeyu Ramai vei deichi hisü taopa tare.

¹⁴ Puhnou Israel maiye süthai-apei maitao hisü paoe, “Fühao hai hi E dakhai koumo koute kho-a bulo. Aaron alia Hur puhai sü neletaoye koa bulai, südonou neletao nou hataralia soulai toulouzü puhai hinou kho noulo.”

¹⁵ Moses nou Sinai Deichi vahisü taopa tare, alia teihao nou ve deichi sü sühao loure.

¹⁶ Mapao vei khouko ava sünou Sinai deichi vasü kou buloure, alia teithe arou koute teihao nou deichi sü züloure, ae teithe anai zhousü Mapao nou Moses ye teihao hrohinou lapare.

¹⁷ Israel maitao nou Mapao vei khouko ava hai deichi vanou zhingaoyu sü mei tao-a buyu raibütoua ngaoe.

¹⁸ Moses nou teihao buyu deichi peitaoh hisü paloure, ae sühi sünou puhnou teithe raidai bue.