TAPALOUYU 22 - SHEEYU BAIBEL (BSI)

Paozho Khare vei Zhaitao

¹ “Mai alinou cho moyuma zhaotu vaoloua datha louzü moyuma zhoh louzü, puhnou cho ali vei mu sü cho angou zhohlai alia zhaotu ali hisü zhaotu adai zhohlaie.

^2-4 Puhnou vaolouyu nasü zholaie. Anou puh hi halia zhore hade toulouzü, puhye sü qila mai ali soure donou zholaiwulai, alia zholouyu muh nasü nou poa vaolouyu nasü khalaie. Hakinou vaoloua khaitouyu kikhaorü nasü hria ngaolouzü, süsü cho ho, moyuma rheisüh, moa zhaotu baiyuma süna vei deida zholai. “Vaomai ali nou khei nou ki hi vaolai tea louyu hinou puhye datha louzü, puhye dathayu maina pei hisü mah hae. Ana teiva kinou vaomai aliye datha louzü, puhsü maiye dathayu mah bure.

⁵ “Mai ali nou puhvei kikhaorüye panou pou toua buyu hinou zhuloumoa maivei dou moyuma kipei tou louzü, puhvei dou moyuma kipei veikhayu buh hinou tou louyu thaosü panou zholai.

⁶ “Mai ali nou puhvei laophao hinou meideia buyu hinou mei sünanou taopoa ve laophao hinou buyu maivei shinamara deiwu louzü, deikhai touyu chamou moyuma shinamara taosü puhnou thao zholai.

⁷ “Mai ali ki hi puhvei kinapa maivei pousha moyuma na mutei taralia khaikhaitoua buyu hinou vaomai nou vaoloua puhye sü nüloure toulouzü, puhye panou deida zholai.

⁸ Ana vaomai naye nüloumore toulouzü, ki paopu naye Rathoki hi saveloua Ramai nghoujü hinou puhvei kinapa mai navei nasü vaokhai toumoe touyu chaachou panou soulai.

⁹ “Hana taralia shaova palouzü, süsü kikhaorü ho, rheisühyuma, zhaotuyuma, sabanüyuma, moa hakhai toua buyu nataralia ‘Haihai aveie’ tea mai ahai nou paopu shaova louzü, mai süna ahai kheinou Rathoki hi saveloua Ramai ye panou thaonou mah-e tea paopeiyu mai naye panou na muh deida ahai sü zholai.

¹⁰ “Mai tarali noua puhvei kinapa mai hi puhvei rheisüh, moa choha, moa zhaotu, moyuma kikhaorü tarali hai zhupeio tea khaipei khaitoua buyu hinou sünasü thai louzü, moyuma zhiyu louzü, moyuma hatayu mai ali-a ngaoloumo louzü,

¹¹ puhai mai ahai kheinou Rathoki hi veloua puh kinapa vei navei hisü puh bah loumoe touyu chaachou soulai, süthaisü puhye panou zholai moe.

¹² Ana kikhaorü nasü puh hinou ve vaomai nou vaoloure toulouzü, kikhaorü paopu naye zholai.

¹³ Hakinou rekhaona nou nütou loure toulouzü, nütou louyu vei shee pove ngaolai, sütou louzü puhnou zholai moe.

¹⁴ “Mai alinou puhvei kinapa mai hinou kikhaorü taralia ngaloua kikhaorü paopu nanou ngaomoyu hinou zhiloure toulouzü, moyuma thai louzü, puhnou hona thaosü zholai.

¹⁵ Ana kikhaorü paopu na-a koa buyu hinou zhiwu louzü moyuma thai louzü, süna vei muh sü zholai moe, puhnou ngayu muh na likhei peia bailai.

Hrümai ae Naanou hi Tare Zhaitao

¹⁶ “Mai alinou nghilai tea nouto loumoa buyu loumaina aliye sabu-sazü louzü, puhnou honapai vei ngheisha muh sü peilai alia honapaiye naloulai.

¹⁷ Ana honapai puo nou puh ki panou venümo louzü, puhnou loumaina ali vei ngheisha muh nasü honapai puo hi peilai.

¹⁸ “Laivah soumai alia maishuyu maiye panou hrilai moe.

¹⁹ “Mai tarali noua hrikhaonaye sabu-sazüyu maiye sü southawo.

²⁰ “Mai tarali noua Mapao Eye baimoa ramai kukhe aliye posheelayu maiye sü souhawo.

²¹ “Shetumai aliye ngaophou moyu moa souchoro laimoe, daiolouzü neletao-a Ejipt teidei hinou shetumai ali soua hrüe.

²² Meamaipfü moyuma rounahtu khesü neletao nou souvea laimoe.

²³ Neletao nou puletaoye souvea souchoro peia puletao nou ahi kra soukha kholouzü, Enou veimosoua puletao vei akho sü noupeiwulai.

²⁴ Alia avei lekha rarou sünou neletaoye sü soureih souyu hisünou southakhaiwu bailai. Sübüa neletao chapfü ae nahmaitao-a panou meamaipfü ae rounahtou sü soutawulai.

²⁵ “Nenou touha sohayu mai ali hi sha poupao peiyu phaki, maiye pousha ngapeiyu mai ali büa souso, puh hinou shavya poso.

²⁶ Puhnou ne hi puhvei sabanü ali nou banda khaitou louzü, teinghi loumo jünou puh hi poa dakhai ve peio,

²⁷ daiolouzü puh hi sabanü süna alikhei baimala-e, sütoulouzü puh daie bazülai? Puhnou ahi kra-a soukha peio tea kho louzü, Esü maiye zhuvea peisüwo nayu thaifüa puhvei akho nasü Enou noupeiwulai.

²⁸ “Ramai ye paoshiso, alia neletaoye süthai apei maitaoye chaaso.

²⁹ “Neletao nou thoudzü alia shinamara ngaolouyu hisü, Eye peizütao machasoua peilo. “Neletao vei nah naraio nasü neletao nou Eye peilai.

³⁰ Alia neletao vei kikhaorü tyoutu toukou arai nasü Eye peio. Tyou toukhai touyu teithe anai koute sü panou ke ye koa bulo, süthaisü teithe acha zhousü Eye pove sheelapeio.

³¹ “Neletao hai avei mai soure donou sousheewure, südonou neletao hai soukhaona nou southayu hrikhaona ali-a toulai moe, süsü sei hi laipeio.