TAPALOUYU 21 - SHEEYU BAIBEL (BSI)

Qila Maitao hi Soupfüre Zhaitao

¹ “Israel maitao hisü zhaidou haibüa talai tea paopeio:

² Neletao nou Hebrew mai aliye panou neletao vei qila soure donou hüloure toulouzü, puhye sü po arou panou neletao vei vah soua baio, po anai nahisü muhma aliro pomoa puhye sü panou lado soutawo.

³ Puhnou maivei qila soutayu phaki, shanghei souloumo louzü, puh tayu phaki maipfü nahmaiye sata laimoe, ana puhnou shanghei souloua velouzü, tayu phakia maipfü nahmaiye satalou veie.

⁴ Puhvei paopu nanou puhye maipfü phoupei bailouzü, ae honapai nou nahmai hrülouzü, puhvei nahmaitao alia puhvei chapfü hai puh paopu navei baie, südonou puhnou lado soua talai toulouzü lah ta-a bailai.

⁵ Ana qila puona nou puhvei paopu naye, puh chapfü alia puhvei nahmaitaoye leshi-e tea paolouzü, alia puhnou lado soua tanümoe toulouzü,

⁶ puhvei paopu nanou puhye sü rathoki hi save loulai, ae puh paopu nanou puhye kikhu hinou moyuma deka ali hinou panou laloua puhvei paopu nanou puhvei nousü vouwulai. Süthaisü puhvei hrümai teitei nou paopu navei qila soua bailai.

⁷ “Mai alinou puh nah naotupaiye qila panou soure donou zholaiwu louzü, honapai hai poutumai qila ali büa talou shie.

⁸ Naotumai aliye puhvei chapfü panou soulai tea hüloua buyu puhnou honapaiye jüpa more toulouzü, honapai puo hi zhodakhai thoupeilai; puhnou honapaiye shetumai bah hi zhothou peilou shie, daiolouzü puhnou honapai hi kaozü hinou zhupei more.

⁹ Mai alinou qila pfüpai aliye panou puh nahpoutuye nare donou hüloure toulouzü, honapaiye lah nah naotumai ali bütoua zhupeilai.

¹⁰ Mai alinou maipfü kukhe liye naloure toulouzü, puh chapfü arai paiye touso ae sabanü alia raichoki büa puhvei zü khesü peikoulai.

¹¹ Puhnou maipfü araipai hisü haibüa soupei louhore toulouzü, honapaiye muh lia pomoa panou lado soua tabailai.

Züveiyu hi Tare Zhaitao

¹² “Mai tarali noua mai aliye dathare toulouzü puhye sü southalai.

¹³ Ana mai alinou soumahwua mai aliye southare toulouzü, puhye sü panou tutsü loure buh ali Enou neletaoye donou soudakhai peilai.

¹⁴ Ana mai alinou puhvei lekha rarou hinou southa nüa mai aliye southare toulouzü, puhnou tuve avei rathobuh hinou tutsüa buyuma neletao nou puhye sü southawo.

¹⁵ “Mai tarali noua puh pfüpuoye dayu maiye sü southawo.

¹⁶ “Mai tarali noua maiye nükuloua zho louzü, moyuma puhvei qila panou soulai tea puh hi khaitoua nou ngaolouzü, puhye sü southawo.

¹⁷ “Mai tarali noua puh pfüpuoye chaayu maiye sü southawo.

¹⁸ “Mai ahai davayu hinou mai ali nanou chuh nou moa puh bahzü nou mai ali naye dashiwua thailou moa züphao hinou züa bulouzü,

¹⁹ alia puhnou veipaloua kushu süüpo poloua taloure toulouzü, puhye dapeiyu puona hisü tudee laimoe, ana puhnou dapeiyu mai nanou teile doyu ae veahoyu khesü panou souvei loure donou zhua soupeilai.

²⁰ “Qila navei paopu nou süüda nou dapeia süpha teilebü hinou qila mai nanou thaire toulouzü, puhye sü southalai.

²¹ Ana qila mai naye dapeiwua teithe ahai-sü thainou kou thaibai louzü, paopu naye tudee laimoe, daiolouzü qila nahai puhvei na ali baie.

²² “Dava-a buyu hinou mai tarali noua nahpfüa buyu nahpfümai aliye zhipeiwua honapai nah koulouzü, anou honapai va kukhe hi daishimo louzü, honapai khapu nou khoyu zhotao sü, chiku-apei maitao vei ae-ao touyu loua zho peilai.

²³ Ana naotupaiye dashiwu louzü, khüsü phouwulai, süolouzü hrirai thaifüa hrirai powulai,

²⁴ nghithou ali süh nghithou ali, huh louzü huh, bah louzü bah, phi ali süh phi ali,

²⁵ mei deikhai touyu thao mei deilai, zhipei khai touyu thaosü zhipeiwulai, dapei louzü dapeilai.

²⁶ “Mai ali nou puhvei qila mai aliye nghithou dachawu louzü, nghithou dacha khaitouyu vei zho phasoua puhvei qila naye panou lado souloulai.

²⁷ Puhnou puhvei qila mai ali huh dachawu louzü, huh dacha khaitouyu navei zho phasoua qila mai naye panou lado souyu mai ali souta bailai.

Paopu Nanou Souzü Vahtao

²⁸ “Chode ali nou maiye boutha louzü, chode sünasü chuh nou kheathawo, ae puhvei sou sü toulai moe; ana chode paopuna hiolouzü mah hae.

²⁹ Ana chode nanou raichokia maiye bou louzü, alia paopu na hisü mainou paosü peiyuma puhnou zhuloumoa nou maiye boutha louzü, chode nasü chuh nou kheathawulai, alia paopu na-a southalaie.

³⁰ Hakinou puhvei hrirai khailupa loure donou zho peia bailai toulouzü, puhnou mai ali vei muh sü zho peilai.

³¹ Chode ali nou nahmaitu aliye boutha louzü, tsümai ali hi tayu zhaitao raibütoua bailai.

³² Chode ali nou qila mai aliye boutha louzü, chode paopu nanou qila mai navei paopu hisü shahu shirou zholai, alia chode nasü chuh nou kheathalai.

³³ “Mai ali nou deibvü mü hrakhaiwua moyuma deibvü raoloua mü khamoa khaitouyu hinou hrikhaona delou louzü,

³⁴ hrikhaona muh nasü paopu hisü zho peilai, alia thaiphao nasü puhvei soulai.

³⁵ Mai ali vei chode nou mai kukhe alivei chode boutha louzü, hria buyu chode nasü zholoua pousha taosü puhai nou zhiloulai, alia thaiyu chode navei sou-a koa zhiloulai.

³⁶ Ana chode nasü raichokia sübüa maiye bou baishe touyu sülouzü, alia chode navei paopu nou zhulou moa chode kukhe aliye boutha louzü, boutha khaitouyu chode paopu nahisü hriyu chode ali hupeilai alia thaiyu chode nasü puhnou poloulai.