TAPALOUYU 20 - SHEEYU BAIBEL (BSI)

Chikha Kirou

¹ Süthaisü Ramai nou chipao haitao hai paoe,

² “Neletaoye Ejipt teidei hinou, maivei qila soua hrüyu hinou sapa peiyu Mapao Ramai nasü E-e.

³ “Neletao Eye baimoa ramai kukheye tholai moe.

⁴ “Neletao bashara moyuma rakiva hinou moa deiphao hinou moyuma deikhe hinou mokhaiyuma dzükhe hinou buyu hana tarali vei zhurai souloua tholai moe.

⁵ Neletao nou bashara moyuma zhurai taraliye nakou tholai moe, daiolouzü neletao Ramai Mapao nasüe E baie, ae Esü ashiye zhuthoulou hoyu Ramai-e. Eye ngaorayu mai hisü Enou puletao vei tyaosholea asü ae adai koute veahoyu sü peiwe.

⁶ Ana Eye leshiyu mai alia avei chikhatao hinou tayu mai hisü khaphao thethe koute avei leshi zhuveayu nasü ngaopeiwe.

⁷ “Neletao Ramai Mapao zhih sü kaomoyu hinou poa vah soulai moe, mai taralia Azhih sa-a kaomoyu vah souyu mai hisü Enou tudee peilai.

⁸ “Soteithe sü reihlo, alia süzhou hai shee-a khailo.

⁹ Teithe arou sü neletao nou vah soulai,

¹⁰ ana teithe anai zhousü neletao Ramai Mapao donou soteithe soulai. Haizhou sü neletao nou vah soulai moe, neletao nahmai, kilai mai, kikhaorü moyuma neletao teidei hinou koa hrüyu shetumai ali koutea panou vah soulai moe.

¹¹ Teithe arou sü neletao Ramai Mapao Enou raki, deiphao ae zai alia sütao hi hrüyu natao teitei sü soupeie, ana teithe anai zhousü E-a aso-e; südonou soteithe nasü Enou shiha peie alia soushee peie.

¹² “Nepfü ae nepuoye tsükhoulo, sükulouzü Ramai Mapao nou neletao hi peikhai touyu teidei hisü neletao nou hrüsho-a buloulai.

¹³ “Maiye southaso.

¹⁴ “Khulou vah souso.

¹⁵ “Maivei vaoso.

¹⁶ “Kinapa maivei da shaki peiso.

¹⁷ “Kinapa maivei kilu thainüso, kinapa maivei chapfü moyuma kilai mai, mokhaiyuma kinapa vei hana taralia jüpaso.”

Maikhe Mainou Ngaopiyu

¹⁸ Maikhe mainou teisüyu ae shabe nghouyu kho sülou khaie alia deichi vanou mei khaopayu sü ngaolou khaie, ngaopia ngure, alia puletao nou buh hroa nou la-a bue.

¹⁹ Puletao nou Moses hi paoe, “Nenou Etao hi chi khesü paopeia baio, Etao nou ne chi sü kei peilai, ana Ramai panou Etao hi chi paopuso baio, daiolouzü Etao thai laire.”

²⁰ Moses nou maikhe mai hi chila peie, “Ngaopiso! daiolouzü Ramai nou neletaoye kabü laisa tea zhua baie, alia neletao tsüle hi puhye piyu sü panou buloua neletaoye mah panou soumore donou baie.”

²¹ Ana maikhe mai sü buh hroa nou bubaie, Moses likhei Ramai nou buyu teihao chaotei touyu buh hisü takoua baie.

Posheelabu vei Chikhatao

²² Mapao nou Moses hi haibüa maikhe mai hi paopeio tea kharochi peie, “Neletaoye raki vanou Mapao Enou chayu sü neletao nou ngaore.

²³ Südonou neletao nou ramai kukhe liye shahu nou moa sana nou souloua Eye koa tholai moe.

²⁴ Eye posheela-a thore donou posheelabu ali nai nou soukhailo, alia buh sühi sünou neletao vei zhaotu ae chode khesü meidei-a posheelalo alia kaozhou vei-a hrüloure donou posheelayu nasü soulo. Buh tarakia Eye thore donou soukupa khai touyu buh hisü Enou ve peilai, alia neletaoye shiha peilai.

²⁵ Neletao nou Eye donou posheelabu hai chuh nou soulai toulouzü, chuh dakho khai touyu tya hai panou soulai moe, daiolouzü hudao poa chuh daoh louzü, süsü Eye donou chaa pfüre.

²⁶ Alia posheelabu nasü phiheadou bua souso, daiolouzü neletao vei baitouyu popa ngaoshulai.