TAPALOUYU 2 - SHEEYU BAIBEL (BSI)

Moses ye Nalouyu

¹ Haibüa buyu teile hinou Levi kikhamai ali nou Levi maipfü ali nahloure.

² Naotupai nasü nahmai hrüloua nahpoutu ali naloure, honapai nou nahtou naye zhuyu phaki, nahtou nahai hüvei shoyu donou puhnou khouh asü koute pokukoue.

³ Ana honapai nou nahtouye sü pokupu lou hore, südonou puhnou sülai ali doloure alia sülai hisü panou dzü tsülou more donou naitei nou meakhai loua nahtouye sü sühi thouloua rei pe hi khaipeiwure.

⁴ Ae nahtou navei tupai nanou lapoa nahtou nahi daivepa laisa tea chozhua bue.

⁵ Süteile hi Pharaoh nahpai nou talou rei hi dzü khülai tea louyu phaki, puhvei kilai maitao nou reipe hinou takouyu hinou pou hrohinou sülai ali zhingaoe, ae sünasü honapai nou puhvei kilai paiye lükou panou poloure.

⁶ Veo nahpai sünou sülai houpa zhuyu phaki nahpoutu ali bua ngaoloue, ae nahtou nasü kra-a bue. Honapai nou nahtou naye sü zhuvea loure alia haibüa paoe, “Haihai Hebrew mai nahtou phare.”

⁷ Süthaisü puh tupai sünou veo nahpai hisü paoe, “Enou nahtou naye panou kipei loure donou Hebrew maipfü ali neye phoupei laiho?”

⁸ Veo nahpai nou honapai hisü “Taho phoupeio” tea chila peie. Südonou honapai nou taho puh pfüye sünou kuloure.

⁹ Veo nahpai nou honapai hisü paoe, “Nahtou nasü Eye donou kipeio, Enou neye kipeiyu vahshi sü peilai.” Südonou naotupai nou nahtou nasü poloure alia puhye sü kidupa peie.

¹⁰ Nahtou nanou dupayu phaki, honapai nou puhye saloua veo nahpai hisü save peie, ae puhsü honapai nahpoutu soutare. Honapai nou puh zhih sü Moses tea sapeie, “Daiolouzü Enou puhye dzü hinou sapaloue” tea paoe.

Moses nou Midia Teidei hi Tutayu

¹¹ Moses dupa louyu thai, teitheli puhnou puhvei Hebrew maitao hi tave kabüa puletaoye panou veashoa vah sousa touyu zhu-e; ae Ejipt mai ali nou puhvei mai aliye dathayu sü puhnou ngaoloure.

¹² Puhnou holo-hailo zhuyu phaki, mai ali-a ngaomokhaie puhnou Ejipt puonaye sü dathaloua puhvei phao sü vonai hi pokuwure.

¹³ Puhnou thaineshoa sühao tayu phaki, Hebrew mai ahai sü züva-a buyu ngaoloure, südonou puhnou mah-a buyu nahisü paoe, “Ne daisounou haibüa lah nevei maiye dawe?”

¹⁴ Puhnou Moses hi haibüa chila peire, “Neye thaonou Eh pei hi panou khore donou ae chikure donou vahbu thoupeie? Ne Ejipt puonaye southayu büa E-a southalai touwu?” Süthaisü Moses hai ngaopi loure, alia haibüa lah tsüchoe, “Enou souyu vah nasü mai nou chuo süloure.”

¹⁵ Pharaoh nou haihai süloukhaie, Moses ye southare donou puhye sü phouloure, ana Moses nou Pharaoh hinou tupoa Midia teidei hisü hrüre donou tutare. Teithe li puhnou dzükhao pe hinou buyu phaki,

¹⁶ Midia hi napao navei nah naotumai anai taohai puletao puo vei zhaotu ae nghituye panou dzü kere donou dzükhao hisü vere.

¹⁷ Ana süpe hinou zhaotu kho-a buyu maitaoli nou ve puletaoye sü hulaiwure. Süthaisü Moses nou kushuloua puletaoye soukha peie, ae puletao vei zhaotu ae nghitu khesü panou dzü keloue.

¹⁸ Puletao nou ki hi dakhai veyu phaki, puletao puo Reuel nou puletao hisü “Zhou daisounou ki hi dakhai ve zhishowe?” tea noure.

¹⁹ Puletao nou chila peie, “Zhou Etaoye Ejipt mai ali nou zhaokho mai bah hinou vupa peie, alia Etaoye dzü loupeia panou Etao zhaotu ae nghitu khesü dzü keloue.”

²⁰ Puhnou puhvei nah naotu maitao hisü paoe, “Puh sü daikinou bue? Daisounou neletao puhye sü kulou moe? Taho puhye kuloua panou haihi ve ha toulo.”

²¹ Moses nou puhye koa hrüre donou ae-ao souloure, alia puhnou Moses ye puh nahpai Ziporah sü puh ki khaipeie.

²² Honapai nou nahpoutu ali naloue, alia puh zhih sü Moses nou Gershom tea sapeie, daiolouzü puhnou paoe, “Enou teidei hai hisü shetumai ali soua hrüa bubaie.”

²³ Teile taoli takouyu phaki, Ejipt hi veo sü thaitare. Ana Israel mainou Ejipt maivei khakhe hinou veashoa lüpoa bure ae kra nou soukha khore. Puletao nou mai kilai soua veashoa krayu paisü Ramai nou chou loure.

²⁴ Puletao nou veashoa lea buyu paisü Ramai nou chouloua Puhnou Abraham, Isaak ae Jakob hi vo soukhai touyu nasü licho peie.

²⁵ Israel mainou veashoa maivei qila soua buyu sü Puhnou ngaoloua zhuvea peie.