TAPALOUYU 19 - SHEEYU BAIBEL (BSI)

Israel Mainou Sinai Deichi hi Velouyu

¹ Israel mainou Ejipt teidei thaowua tapayu khouh asü navei khoukha araina zhou sü puletao nou Sinai radeiki hisü velou loure.

² Puletao nou Rephidim thaokhaiwua Sinai radeiki hi velou louyu phaki, puletao nou Sinai deichi phi hinou fühao souloua buloure,

³ alia Moses nou Ramai ye daore donou deichi peiva taopa tare. Mapao nou puhye deichi hinou kuloua paoe, “Nenou Jakob nahmaitao, Israel mai hisü haibüa paopeio:

⁴ ‘Enou Ejipt mai hi soupeiyu vahtao sü neletao nou ngaore, ae Enou neletaoye tei hi leche nou toutuye shouh hinou satayu büa neletaoye ahi save peie.

⁵ Südonou chuo neletao nou achi zülouzü ae avei chikhatao hinou soutaosoua talouzü, neletao hai avei mai soulai. Deiphao teitei hai avei baie, ana neletao hai Enou dokupa khai touyu mai soulai,

⁶ avei napao maivei vedei ali soulai alia sheeyu tyahrü ali soulai.’ ”

⁷ Südonou Moses nou takouloua Israel maiye süthai apei maitaoye kupoa ve jüloua Mapao nou puh hi paopeikhai touyu chitao sü paopeie.

⁸ Süthaisü mai hrülai nou pai ali soua paoe, “Mapao nou paoyu teitei sü Etao nou soulai.” Moses nou haibüa maisou nou paoyu chi sü Mapao hi paopeie.

⁹ Mapao nou Moses hi paoe, “Enou teihao chaotei touyu hinou ne hi velai, ae Enou neye chayu paisü panou maisoua süloulai, sübüa puletaoye teisa panou neye louche loulai.” Moses nou Mapao hi maikhe mainou paoyu chi khesü paongao peie.

¹⁰ Süthaisü Mapao nou Moses hi paoe, “Maikhe mai hi tave paopeio, puletaoye panou zhou ae dosho hai soushee-a bulo, alia puletao vei sabanü khesü panou saoshee khailo.

¹¹ Alia teithe asü zhou maikhe maiye panou tuda-a bulo, daiolouzü teithe asü zhousü Enou maisouye panou zhingaore donou Sinai deichi hi koulai.

¹² Deichi pehao teitei hisü maikhe maiye panou shiloure donou deirai dekhaio, alia haibüa paopeio, ‘Mai tarali noua deichi vasü taopa laimoe, moyuma deirai soukhai touyu khevaisü talou phi healai moe; mai tarali nou deichi hi talou phi hea louzü puhye sü southalai.

¹³ Neletao nou puhye sü bah deilai moe, ana puhye sü chuh nou moyuma voulou nou katha-a bailai. Haina sü mai likhei hi laimoe, kikhaorü koutea sübüa southalai.’ Ana shabe nghoupa peiyu phaki maikhe mainou deichi vasü taopalai.”

¹⁴ Südonou Moses nou deichi vanou maikhe mai hi taokou loure, alia maikhe maiye panou Ramai ye daore donou soushee peiwure, alia maikhe mainou puletao vei sabanü khesü soushee loure.

¹⁵ Puhnou maikhe mai hi paoe, “Teithe asü zhousü neletao tuda-a bulo; naotumai nghiki kouso.”

¹⁶ Teithe asü zhou shona sü teisüre ae teipeivavare, alia deichi vasü teihao nou chaotei touloure, ae shabe khosü chishoa nghoupare, sükukhaie fühao hinou buyu mai hrülai sü ngaopi shoa ngure.

¹⁷ Süthaisü Moses nou maikhe maiye saloua Ramai ye daore donou fühao hinou tapare. Ae puletao nou takou deichi phi hinou la-a bure.

¹⁸ Sinai deichi teitei sü meikhao nou hokhai loure, daiolouzü Mapao nou buh sühi sü mei zhai hinou kou-e, ae sühi meikhao payu hai thao hinou meidei-a meikhao payu büe, alia deichi teitei nou nüsüyu büa lüre.

¹⁹ Shabe khosü kulailai kulailai pakhaie, Moses nou paoe, ae Ramai nou puhye teisüyu kho hinou chila peie.

²⁰ Mapao nou Sinai deichi peitao hi kouloua Moses ye deichi hi kupoa pare.

²¹ Ae Mapao nou Moses hi paoe, “Takou maikhe mai hi paopeio, daiolouzü puletao nou Eye zhulai tea deirai soukhai touyu hinou tala poakou shulai, puletao nou sübüa takou louzü mai taoli thai-a bailai.

²² Napao mai koutea soushee loua nou ahi nghi koulai, sübüa soushee lou moa ahi koulouzü puletaoye Enou tukhalai.”

²³ Moses nou Mapao hi paoe, “Maikhe mainou Sinai deichi hisü taopalai moe, daiolouzü nenou Etao hi deichi haina hai sheewe alia deirai soukhailo tea kharochi peiwure.”

²⁴ Mapao nou chila peie, “Takou Aaron ye haihi sapalo, ana napao maitao ae maikhe maitaoye panou deichi haihi taopaso, hakinou haihi taopa louzü puletaoye Enou souhawu bailai.”

²⁵ Südonou Moses nou maikhe mai hi takou loure alia puletao hi Mapao nou paoyu chitao sü paopeie.