TAPALOUYU 17 - SHEEYU BAIBEL (BSI)

Chuh hinou Dzü Küpayu

¹ Israel maisou hai Mapao nou kharochi peiyu thaifüa Sin tea kuyu radeiki hinou tapoa kou Rephidim tea kuyu buh hisü ve chaore donou fühao souloua bure. Ana buh sühisü kere dzü hae.

² Südonou maikhe mainou Moses hisü vamoa nou paoe, “Etaoye panou ke loure dzü peio.” Moses nou chila peie, “Neletao daisounou apei hi vamowe? Daisounou neletao Mapao ye lawe?”

³ Ana maisou hai reisho loure ae Moses hisü vamoa paoe, “Ne daisou nou Etaoye Ejipt hinou sapawe? Etao vei kikhaorü, nahmaitao ae Eletaoye panou rei-a buh hai hinou thai-a bailaivu?”

⁴ Moses nou Mapao hi soutaosou haibüa veachi paoe, “Mai haitaoye donou E daipha soulai? Mai haitao nou Eye chuh nou deilai toure.”

⁵ Mapao nou Moses hi paoe, “Israel maiye süthai apei maitaoli saloua maisou jünou rai-a talo; alia nenou Nail reidzü dayu süüpo nasü polo.

⁶ Horeb deichi hi chuhlyatao hisü Enou ne nghoujü nou lapeilai, ae nenou chuhlya nasü dapei louzü, sühi sünou maikhe maiye ke loure dzü sü panou küpa peilai.” Moses nou süthai apei maitao nghoujü nou sübüa soupeie.

⁷ Puhnou buh sünasü Massah (la-a nou zhuyu) ae Meribah (nolyalyayu) tea sapeie, daiolouzü Israel mainou vamoa nolyalyare ae Mapao nou daie soulou süsa tea la-a nou zhure, ae haibüa paoe, “Mapao nou Etaoye salaiho salai mosa?”

Amalek Maiye Reih Souyu

⁸ Amalek mainou tave Israel maiye Rephidim hinou reih soure.

⁹ Moses nou Joshua hi paoe, “Etao hrohinou mai taoli dopaloua taho Amalek maiye reih soukhaio. Dosho Enou deichi peitao hi paloua Ramai vei süüpo nasü pola-a bulai.”

¹⁰ Moses nou paopeiyu büa Joshua nou taho Amalek maiye reih soutare. Moses, Aaron ae Hur puletao nou deichi peitaoh hisü patare.

¹¹ Moses nou puh bah la-a bubusa sü Israel mainou reih veiwe, ana puh bah nakou khaie Amalek mainou reih sü veita-a baiwe.

¹² Moses nou vea-a puh bah lalouho tayu phaki, Aaron ae Hur nou chuh ali poloua Moses ye sü panou kou chobu loure, alia Aaron ae Hur nou puh bah sü chükhei poa lapeie; sübüa puh bah sü teinghi loutayu koute panou laloue.

¹³ Haibüa nou Joshua nou Amalek maiye southakhai-a reih sü veiloue.

¹⁴ Mapao nou Moses hi paoe, “Licho loure donou reih veilouyu ko haina sü rükhailo, alia Joshua hisü paopei khaio, daiolouzü Enou Amalek maiye deiphao hinou souhakhai toupeiwulai.”

¹⁵ Moses nou süthaisü posheelabu ali souloue alia süna zhih sü “Mapao hai veilouyu avei sahra nasüe” tea sapeie.

¹⁶ Puhnou paoe, “Mapao vei sahra nasü polalo! Mapao nou Amalek maiye neletao donou akhai koute reih soupeilai.”