TAPALOUYU 16 - SHEEYU BAIBEL (BSI)

Raki vanou Touso Seikou Peiyu

¹ Israel mainou Elim hinou tapoa kou Elim ae Sinai deichi kohinou buyu Sin tea kuyu radeiki hisü puletao nou Ejipt hinou tapa louyu khouh ahai navei khoukha kiangou zhou ve louloue.

² Radeiki sühi sünou Israel mainou Moses ae Aaron pei hi vamoa raore,

³ alia haibüa puletao nou paoe, “Etao nou Ejipt teidei hinou tounü tou ae sonü soa bukinou Mapao nou Etaoye southawu louzü daizhou koute veilaisa, ana chuo nenou Etao mai hrülaiye radeiki haihi save panou khütha laire.”

⁴ Mapao nou Moses hi paoe, “Enou raki vanou neletaoye touso rükou peilai, ae maikhe maiye panou teithe teithe tousü sü koloulai. Haibüa puletao nou avei chikha khesü zülaiho zülai mosa touyu Enou zhulai.

⁵ Teithe arou zhousü puletaoye panou teithe kukheki kokhaiyu zhou ahai kokhai loulai.”

⁶ Südonou Moses ae Aaron nou Israel maisou hi ve paoe, “Ejipt hinou neletaoye sapa peiyu hai Mapao noue touyu neletaoye panou zhou koukhe süloulai.

⁷ Ae dosho shona sü neletao nou Mapao vei khouko ava nasü ngaolai, daiolouzü neletao nou Mapao pei hi vamoa raoyu paisü Puhnou süloure. Neletao nou ahai hi raoyu sü Puh hi rao-a baie, daiolouzü ahai sü Puhnou souwo touyu kharochitao soua baie.”

⁸ Moses nou paoe, “Neletaoye Mapao nou koukhe hi sou peilai ae shona sü neletao nou tounüsa panou toure donou raokhao peilai, daiolouzü neletao nou puh pei hi vamoa raoyu sü Mapao nou chouloure. Neletao nou ahi raoyu sü neletao nou Mapao hi rao-a baie.”

⁹ Moses nou Aaron hi paoe, “Israel maisou hi paopeio, ‘Mapao hi nghikoulo, daiolouzü puhnou neletao nou vamoa raoyu sü chouloure.’”

¹⁰ Aaron nou Israel maisou hi chi paoyu phaki, puletao hai radeiki hilova zhua bue, süpha teilebü hinou Mapao vei khouko ava sü teihao hinou ngaopeie.

¹¹ Mapao nou Moses hi paoe,

¹² “Israel mainou vamoa raoyu paisü Enou choure. Südonou puletaoye panou koukhe hai sou toulai, ae shona sü puletao nou toulousü koute panou raokhao sü toulai tea paopeio. Süthaisü puletao nou E hai Mapao, puletao Ramai nasüe touyu süloulai.”

¹³ Koukhe hai puletao nou buyu fühao teitei hisü raohou meme nou zhaove taopeie, ae shona hai puletao nou buyu fühao teitei hisü vidzü nou kou phoutao peiwe.

¹⁴ Vidzütao thetayu thai, hüvei shopoa dede soua nou vüke büa deiphi hinou buwe.

¹⁵ Israel mainou haina hai ngaolou khaie, mai alinou ali hi noue, “Haihai daige?” Daiolouzü puletao nou haina hai daiwe touyu sü sümoe. Moses nou puletao hi paoe, “Haina hai Mapao nou neletaoye panou toure donou seive peiyu raokhao-e.

¹⁶ Mapao nou haibüa kharochi peikhai toue, süolouzü mai alili nou toulou süpha kokhai loua baio, süsü litar ahai phali kihikha mai ali donou kokhai loua baio.”

¹⁷ Israel mainou paopeiyu büa souloue, kamai nou taoli kokhai loue, ae kamai-a nou daotu kokhai loua baie.

¹⁸ Ana puletao nou pove sühdouyu hinou douyu phaki, taoli kokhai louyu maina vei-a poupu moe, ae daotu kolouyu maina vei-a chezü moe, lahkuku nou tousü sü ngaoloukhai-a baie.

¹⁹ Moses nou puletao hisü paoe, “Mai taralia dosho shona donou shokhai laimoe.”

²⁰ Ana kamai-a nou Moses chi sü zümoa dosho shona donou shokhaiwure, ae süsü thainesho kushu shikhao loua kai ngishisho baire, ae Moses nou puletaoye rarou-e.

²¹ Teisa nou shona kushu puletao nou teithe teithe vei tousü sü kokhai louwe, ana teinghi soupa khaie, puletao nou kolou moa buyu taosü dzü data baiwe.

²² Teithe arou zhousü puletao nou raokhao nasü zha ahai pha, süolouzü mai alili donou litar adai phali kokhai louwe. Haina vanou Israel mai memeye süthai-apei maitao nou tave Moses hi paoe,

²³ ae Moses nou puletao hi paoe, “Mapao nou haibüa kharochi peikhai toue, ‘Dosho hai soteithe-e, sheeyu teithe soua reihlo. Neletao nou raokhao sü khaotou nüyu mainou khaotouwo, ae khotou nüyu mainou khotouwo. Anou shokhai touyu teitei sü dosho donou khaidalo.’ ”

²⁴ Moses nou paopeiyu thaifüa puletao nou thainesho donou khaida loure, ae süsü kai-a numoe alia shikhao-a loumoe.

²⁵ Moses nou paoe, “Zhou haitao hai toulo, daiolouzü zhou hai Mapao donou sheeyu Soteithe-e. Zhou neletao nou buyu fühao hisü raokhao ngaolai moe.

²⁶ Teithe arou koute neletao nou raokhao sü kokhai loulai; ana teithe anai zhou sü Soteithe-e, süzhou haliro ngaolou laimoe.”

²⁷ Teithe anai zhou-a kamai nou touso kolai tea ta-e, ana puletao nou haliro ngaolou more.

²⁸ Süthaisü Mapao nou Moses hi paoe, “Teile kasho koute nevei maitao nou avei kharochi züba-a bulaige?

²⁹ Zhukhaio, Mapao Enou neletaoye soteithe peie, südonou teithe arou zhousü Enou neletaoye teithe ahai panou toure donou touso peie. Südonou teithe anai zhousü mai hrülai nou kihikha bubailai, mai aliro vakou tapalai moe.”

³⁰ Südonou mai hrülai nou teithe anai zhousü vah soumoa sore.

³¹ Israel mainou raokhao haina hai “manna” tea kuwe. Haina hai pouthou büa kaawe, ae raokhaoki hi voudzü nakhai touyu büa touveie.

³² Moses nou paoe, “Mapao nou haibüa kharochi peikhai toue, ‘Manna nahai haithai vere bonakha mai-a panou ngaore donou khailo, süsü Enou neletaoye Ejipt hinou sa-a tayu phaki, neletaoye ludu hi panou touyu raokhao-e touyu sü puletao-a panou zhulai.’ ”

³³ Moses nou Aaron hi paoe, “Ha thouyu bvü ali phoulo, ae sühisü manna litar ahai phali thoukhailo, sünasü haithai bonakha maiye ngaore donou Mapao nou buyu nghoujü hi pokhailo.”

³⁴ Mapao nou Moses hi kharochi peiyu büa Aaron nou sünasü vo sübvü khaiyu nghoujü hisü khaiwure.

³⁵ Israel mainou Kanaan teidei hi velou füsho loumo koute puletao nou po raidai sü manna toue.

³⁶ (Süpha teile hi hanapoa douyu bvü (omer) nahai litar kai phae).