TAPALOUYU 15 - SHEEYU BAIBEL (BSI)

Moses vei Lou

¹ Süthaisü Moses ae Israel maitao nou Mapao hi haibüa lou souwe: “Enou Mapao hi lou soulai, daiolouzü puhnou dushoa koloure; Puhnou rheikhe ae rhei pfüyu maitaoye sü zai hi laithowure.

² Mapao hai avei khouko ae pfüchi nasüe, alia puh hai Eye khailu apeio nasüe. Puh sü avei Ramaie, Enou puhye paosholai, Apuopaoh Ramai, Enou nevei aduso sü lou nou soulai.

³ Mapao hai soureih sousüo nasüe, Puh zhih sü Mapao touwe.

⁴ “Puhnou Ejipt reihmaitao ae rheiluki khesü zai hi laithou peie, ae soureih souvei shoyu hi peikho maitao sü Zai Ho hi leitare.

⁵ Zaidzü nou puletaoye sü maoloure; Puletao hai chuh ali büa zaitei hisü leitare.

⁶ “Oh Mapao, ne bah zhoulo hai daizhou koute khouko busa; ne bah zhoulo sünou ngaoba maiye sü daphe daphosasa peie.

⁷ Nevei khouko aduso sünou neye ngaoba maiye soukhaowure; nevei lekha rarou sünou puletaoye sü rouvao deiyu büa deihawure.

⁸ Ne ssü sünou zai hi houpei khaie, zaidzü sü ke ali soua butare; zai thoukayu fü hi dzü sü ke soutare.

⁹ Ngaoba mainou paoe, ‘Enou puletaoye thaihu talai, Enou thaihukou puletaoye nüloulai, Enou reih hinou polouyu kini khesü zhiloulai, Enou jüpayu na khesü poloulai. Enou avei khoche sü paipaloua puletaoye souhawulai.’

¹⁰ Nenou teikhai sü panou hüve peikhaie, Ejipt mai hrülaiye sü maoloure; puletao hai hu ali nou dzü hi leitayu büa leitakhaire.

¹¹ “Oh Mapao! Ramaitao hrohinou thaonou neye raiyu bue? Thaonou neye büa sheeyu bue? Thaonou khupayu ae khekai vah nenou soulouyu büa soulou süyu buge?

¹² Ne bah zhoulova thaipa peikhaie, teidei nou neye ngaobayu maiye sü zhaoloua baiwe.

¹³ Nenou khailupa peiyu maitaoye sü nevei tobai soumoyu leshi hinou süthai sa-a tapeie, Nenou puletaoye sü nevei khouko nou sheeyu teidei hisü save thou peie.

¹⁴ Tyahrü khenou choulou khaie, puletao nou ngaopia ngure; Philistin hi hrüa buyu khemai nou ngaopi shoa bure.

¹⁵ Edom hi peikho khemai nou ngaopire; Moab hi khouko pfüyu mai khesü shihrührüa bure. Kanaan hi buyu mai hrülai nou puletao vei khuvei sü hatare.

¹⁶ Pihiyu ae ngaopiyu sü puletao hi vere, Nevei khouko khesü ngaoloua puletao hai chuh büa lümore, Oh Mapao, nevei maitao nou talaloumo koute, Ne nou vupapei khaitouyu maitao nou tacho loumo koute puletao hai ngaopia halia soulouhoa bure.

¹⁷ Nenou nevei maitaoye save nevei deichi hisü khaipeie, Oh Mapao, nenou bure donou soudakhai touyu buh hisü save khaipeie, Oh Mapao, ne bah nou soukhai touyu rathoki hisü save thoupeie.

¹⁸ Mapao nou teisa sü Veo soua sa-a nou hrülai.”

Mariam vei Lou

¹⁹ Veo Pharaoh vei rheitao, rheilukitao ae rhei pfüyu mai hrülai nou zai hi talou Israel maiye hukouyu phaki, Mapao nou zaidzü sü panou küdakhai lou puletaoye sü maoloure. Ana Israel maiye panou zaidu toutsü hinou deithe-a panou tachopa loure.

²⁰ Süthaisü Aaron tupai, rachipaola apeipai Mariam nou puh bah hinou poa lou souyu beibei poloure, ae naotumai hrülai nou beibei poloua honapai thaisü füa asa shoa dosoue.

²¹ Alia Mariam nou homaitao hi haibüa lou soue: “Mapao ye lou sousholo, daiolouzü puhnou reih sü veiloure. Rhei ae rhei pfüyu maitaoye sü puhnou zai hi laithouwure.”

Khayu Dzü

²² Süthaisü Moses nou Israel maiye Zai Ho hinou sapoa Shur tea kuyu radeiki hilova sata-e. Puletao nou radeiki hinou teithe asü tare, ana dzü ali-a ngaomore.

²³ Puletao nou Marah tea kuyu deifü hi velouyu phaki, puletao nou buh sühi dzü sü khayu donou kelou shire. Südonou buh süna hai Marah (Khayu) tea zhih sapeiwure.

²⁴ Maikhe mainou Moses pei hi haibüa raore, “Etao dai nou kelai?”

²⁵ Moses nou soutaosou Mapao hi veachi paoe, ae Mapao nou puh hi süübe ali ngaopeie, ae puhnou süü süna sünou dzü hi laithou peikhaie dzü sü kelou veire. Buh sühi sünou Mapao nou puletaoye kabüa takoure hi hrülai touyu chikha khesü peie, alia puhnou buh sühi sünou puletaoye kabülaisa tea zhai zhue.

²⁶ Puhnou paoe, “Neletao nou soutaosou neletao Ramai Mapao chi zülouzü, ae avei nghingao hinou kaozüyu vah soulouzü, ae avei chikha khesü zülouzü, Enou Ejipt mai hi seiveyu rahta nasü panou neletao hi velai moe, daiolouzü E hai sounou souvei apeio Mapao nasüe.”

²⁷ Süthaisü puletao nou Elim tea kuyu teidei hisü veloure, sühisü dzüla kiahai ae habe rainai bue, puletao nou dzü buyu pehao hinou fühao haoloua bure.