TAPALOUYU 14 - SHEEYU BAIBEL (BSI)

Zai Ho Tachopa Louyu

¹ Süthaisü Mapao nou Moses hi paoe,

² “Israel mai hisü paopeia panou dakhai kou Baal-zephon nghia buyu Migdol ae Zai Ho kohinou buyu Pi-hahiroth pah hinou bure donou fühao soulo.

³ Daiolouzü Pharaoh veo nou Israel maiye haibüa cholai, ‘Puletao hai bomoa nou tasühao poa ve radeiki hinou bure.’

⁴ Enou Ejipt veo tsüle sü soukhou shopeia panou neletaoye thaihu talai, ae Enou veo ae puhvei reihmaitao hinou reih veilouyu vanou avei kathe sü panou maikhe mai-a ngaolai. Süthaisü Ejipt mainou E hai Mapao nasüe touyu süloulai.” Israel mainou paopeiyu büa souloue.

⁵ Israel maitao tare touyu ko sü Pharaoh veo hi paopeikhaie, veo alia puhvei peikho maitao le sü datare, alia puletao nou haibüa paoe, “Etao daisou nou Israel maiye panou tare? Etao vei kuvah sü chuo thaonou soukhailai?”

⁶ Südonou veo nou puhvei rheiluki ae puhvei reihmai hrülai sü panou souda loure.

⁷ Puhnou Ejipt hi rheiluki teitei, ae dokupa khaitouyu soureih souyu rheiluki kaihrou ae peikhomai noupu saloua Israel maiye thaihu tare donou tashure.

⁸ Mapao nou Pharaoh veo le sü soukhoupu peia panou veiloua tayu Israel mai thaisü hutare.

⁹ Ejipt maivei reihmai, rhei teitei, rheiluki, rhei pfüyu mai ae rhei pfüa reih souyu mai hrülai saloua Ejipt hi veo nou Israel maiye thaihu tare, alia thaihukou Israel mainou fühao soua buyu Zai Ho pehao Baal-Zephon pahlo buyu Pi-Hahiroth nghiyu buh hinou thaingou loure.

¹⁰ Pharaoh veo ae puhvei reihmaitao nou thaihu poa kouyu sü Israel mainou ngaolou khaie puletao hai ngaopi shore ae Mapao hinou soukha khore.

¹¹ Puletao nou Moses hi paoe, “Ejipt teidei hi Etaoye daovuyu buh ha-a panou radeiki hai hinou thaire donou Etaoye sa-a tawu? Zhukhaio chuo Etaoye Ejipt hinou sapa panou daie soulai?

¹² Ejipt hi bukinou Ehnou ne hi paomowu, Ehye panou Ejipt hinou bua puletao vei kuvah soua baio tea nou. Eletao hai radeiki hai hinou thaire jüo Ejipt hinou maivei qila soua buyu nanou veipu hie.”

¹³ Moses nou maikhe mai hi paoe, “Ngaopiso! Soutaosou lalo, zhou teithe Mapao nou neletaoye khailupa peire donou vah souyu sü zhukhaio, daiolouzü zhou neletao nou ngao-a buyu Ejipt maiye sü neletao nou ngaopu laimore.

¹⁴ Mapao nou neletaoye donou reih züpeilai, neletao nou halia soure vah hae.”

¹⁵ Mapao nou Moses hi paoe, “Ne daisou ahinou soukha khoa bue? Israel maiye nghoujülo takoukhaio tea paopeio.

¹⁶ Nevei süüpo nasü poloua zai pei hi polapa peikhaio, sükulouzü zaidzü sü kota peia Israel maiye panou deithe hinou tayu büa zai nasü tacho paloua bailai.

¹⁷ Süthaisü Enou Ejipt mai le sü soukhoupu peilai, sübüa puletaoye panou neletao thaihu koulai, ae Enou Ejipt hi veo ae puhvei reihmaitao, puhvei rheilukitao ae rheiluki pfüyu maitao jünou veilouyu avei khouko sü ngaolai.

¹⁸ Enou puletao jünou reih kolouyu phaki Ejipt mainou E hai Mapao-e touyu sü süloulai.”

¹⁹ Süthaisü Israel mai nghoujü nou rai-a sata peiyu Ramai vei rakivamai nanou puletao thailo kou loure, alia teihao deka nanou puletao thailo nou kou laloure,

²⁰ sübüa teihao deka nanou Ejipt maitao ae Israel maitao kohinou buloure. Teihao sünou Ejipt maiye züloua panou teizhire, ana Israel maiye panou ava ngaoloue, sübüa kheimathe sü alinou ali hi koulou shire.

²¹ Süthaisü Moses nou puh bah sü zai pei hi lapapei khaie, süzhou khei mathe Mapao nou chihshoyu teikhei sü teinghi palova sünou pa zaidzü sü hükhai tare ae zaidzü sü daodewua panou deithe soutare.

²² Israel mainou zai toutsü hinou deithe-a tapaloue, ae dzü nou puletao vei nalo ae zhoulo ahai vasü kivo büa bupeie.

²³ Ejipt mai rheitao, rheiluki ae rheiluki pfüyu maitao noupu saloua puletaoye zai hisü thaihu koue.

²⁴ Tei thepayu phaki Mapao nou mei deka ae teihao deka pei hinou zhukou Ejipt maivei reihmaitaoye soubü rarou peiwure.

²⁵ Puletao vei rheiluki phihao khesü panou muloua talou hore. Ejipt mainou haibüa paoe, “Etao Israel mai nghoujü nou tuta bailaikhe, daiolouzü Mapao nou Israel maiye donou reih soupeia baire.”

²⁶ Mapao nou Moses hi paoe, “Ne bah thaipa zai pei hisü lapeikhaio, sübüa zaidzü sü panou kü dakhailou Ejipt mai, puletao rheilukitao, ae rhei pfüyu maitaoye panou maolouwo.”

²⁷ Südonou Moses nou puh bah sü thaipa zai pei hisü lapeire, ae tei thepayu phaki zaidzü sü levei buh hi kü dakhai loutare, ae Ejipt mainou zai hinou tupa loure donou tutae, ana Mapao nou Ejipt maiye sü panou zaidzü nou phaipoa tare.

²⁸ Dzü sü kü dakhailou Israel maiye zai hi thaihu poa louyu Ejipt maivei rheiluki, rhei pfüyu maitao ae Pharaoh veo vei reihmai hrülai sü maothawure. Mai ali koutea shopei moe.

²⁹ Ana Israel mai louzü zai toutsü hinou nalo ae zhoulo ahai vasü dzü nou kivo büa bupeia deithe hinou tachopa loure.

³⁰ Süzhou teithe Mapao nou Israel maiye Ejipt mai hinou sübüa vupa peie, ae Ejipt mai thaiyu sü Israel mainou zaipe hinou zhingaoe.

³¹ Mapao vei khouko, puhnou Ejipt maiye souha peiyu sü Israel mainou ngaoloure, ae puletao nou Mapao ye ngaopire, ae puletao nou Mapao ye alia puhvei kilai Moses ye louche loure.