TAPALOUYU 12 - SHEEYU BAIBEL (BSI)

Tachopa Nüh

¹ Mapao nou Ejipt teidei hinou Moses ae Aaron hi paoe,

² “Khou haina hai neletaoye donou potei hi khou araina soulai.

³ Südonou haibüa Israel mai hrülai hi paopeio: Süolouzü khou haina vei khoukha kirou zhousü kiphao chekhi hinou zhaotu moyuma nghitu chekhi dopalo.

⁴ Hakinou kihikha mai ali nou zhaotu nasü touhaolou hore toulouzü, puhnou puhvei kinapa naye koa zhaotu nasü mai kazhou nou toulousüe touyu zhuloua zhiloua bailai.

⁵ Neletao nou zhaotu moyuma nghitu nasü chaa taomoyu, po ali payu de nou dolo.

⁶ Neletao nou hai nasü khou haina vei khoukha kiadai koute khailai; süthaisü Israel maisou nou puletao vei zhaotu nasü süzhou koukhe dathalai.

⁷ Süthaisü puletao nou toulai tea datha khaitouyu souzhe daotu poloua kikhu vei deka ahai hi ae kikhu pei hisü nalo, süthaisü sou nasü toulai.

⁸ Süzhou khei nou puletao nou sou nasü mei rouloua khayu poudzü ae khei thoumoyu raokhao koa toulai.

⁹ Sou nasü so-a toulai moe moyuma dzü koa kholoua toulai moe, ana sou veishi nou - pei, phibao ae lesourai teitei loua mei nou rouloua toulai.

¹⁰ Neletao nou sou sütao sü panou sho-a bulai moe, hakinou shona koute sho-a bure toulouzü sou sütao sü mei deilai.

¹¹ Neletao nou haibüa toure toulouzü: veidu veilaiyu büa sah khya vealoulai, phikha nouloulai, ae neletao bah hi süüpo poloua thashoa nou toulai. Haina hai Mapao vei Tachopa Nüh nüyue.

¹² “Enou süzhou khei sü Ejipt teidei teitei tasühao velai, alia Enou Ejipt teidei hi mai ae kikhaorü narai hrülai sü southalai ae Enou Ejipt hi rah khesü tudee peilai. E hai Mapao-we.

¹³ Zhe nasünou neletao nou buyu ki hi shee soukhailo, ae Enou Ejipt maiye southa veyu phaki, kikhu pei hi zhe nakhai touyu ki khesü Enou taloumoa tachota-a bailai.

¹⁴ Teithe süzhou hai neletaoye donou licholoure teithe ali soulai, alia Mapao nou neletaoye donou daisou peie touyu licho-a nüh nülai. Nüh haina sü teisa nou reih-a neletao nou nülai.”

Khei Thoumoyu Raokhao Nüh

¹⁵ Mapao nou paoe, “Teithe anai koute neletao nou khei thouyu raokhao toulai moe, khei thoumoyu raokhao likhei toua bailai. Teithe araikha nahai neletao ki hinou khei teitei sü polaiwuo, daiolouzü teithe anai koute mai tarali nou khei thouyu raokhao touwu louzü, puhye sü Israel mai hrohinou hulaiwulai.

¹⁶ Teithe araina zhou ae teithe anai zhousü neletao nou tave jüloua ratholai. Teithe ahai süzhou sü neletao nou vah soulai moe, ana ha louzü phoutoua bailai.

¹⁷ Neletao nou khei thoumoyu Raokhao Nüh haina sü nülai, daiolouzü teithe haizhou Enou neletaoye Ejipt teidei hinou sapapeie. Nüh haina sü vere bonakha teitei-a panou thaokhai moa nüh nülai.

¹⁸ Khou araina khoukha kiadai koukhe hinou poa khoukha kaili koute neletao nou khei thoumoyu raokhao likhi toua bailai.

¹⁹ Teithe anai koute neletao ki hisü khei panou bulai moe, ae mai tarali nou khei thouyu raokhao toua ngaolouzü puhye sü shetumai-a moyuma buhle mai-a Israel mai hrohinou hulaiwulai.

²⁰ Neletao nou khei thoukhai touyu raokhao aliro toulai moe, khei thoumoyu raokhao likhei toua bailai.”

Tachopa Nüh Araina

²¹ Süthaisü Moses nou Israel mai hi süthai-apei mai hrülaiye kuloua paoe, “Tachopa Nüh nüre donou neletao mai hrülai nou taho zhaotu chekhei phouloua dathalo.

²² Loube (hyssop) bahzü ali khailo, alia sünasü poloua raikhao hi zhe thoukhai touyu hinou pokou naloua neletao vei kikhu pei hi ae kikhu deka ahai hisü zhe nalo. Neletao mai li-a dosho teithemo koute kijü tapalai moe.

²³ Daiolouzü Mapao nou Ejipt maiye southa veyu phaki, puhnou neletao kikhu pei hi ae deka ahai hi zhe nakhai touyu ngaoloua tachota-a bailai, ae Athai Rakivamai naye panou neletao ki hi talou southalai moe.

²⁴ Neletao ae neletao tyaonah maitaoye panou haina hai kharochi ali soua teisa reihlai.

²⁵ Neletaoye Mapao nou peilai tea paokhai touyu teidei hi velou louyu phaki, neletao nou nüh haina sü nülai.

²⁶ Neletao nahmai nou neletao hi ‘Haihai daivanoue?’ tea nouyu phaki,

²⁷ neletao nou haibüa chila peilai, ‘Haina hai Mapao nou tacho tayu posheela nasüe, daiolouzü puhnou Ejipt maiye southaveyu phaki, Israel maiye southa moa tachota peie.’” Süthaisü Israel mainou pei pfü nakou rathowe.

²⁸ Süthaisü Mapao nou Moses ae Aaron hi paopeiyu büa Israel mainou tara tare ae paopeikhai touyu thaifüa souloue.

Nah Narai Maitao Thaiyu

²⁹ Khei toutsü hinou Ejipt teidei hi nahmai narai hrülai, veo nahpoutu naraio hinou poa kou hukhaki hi buyu nah naraio koute, ae kikhaorü tourai teitei sü Mapao nou southakhaire.

³⁰ Süzhou khei sü veo kikha hi, puhvei peikhomai hrülai, alia Ejipt mai hrülai sü shusoua krakhai toure, daiolouzü kiphao ali hiro mai thaithou moyu hare.

³¹ Süzhou khei nou veo nou Moses ae Aaron hi mai seiho haibüa paoe, “Kushuloua nou avei teidei hinou ne hai alia nevei mai hrülaiye sü saloua tawo; ne hai nou paoyu büa taho Mapao ye sü thotawo.

³² Neletao vei zhaotu, nghitu ae kikhaorü teitei noupu hupoa tawo. Anou Eye donou shiha kho peio.”

³³ Ejipt mainou Israel maiye panou theashoa puletao teidei hinou tare donou ve lere alia puletao nou haibüa paoe, “Neletao tamo louzü Etao mai hrülai nou thaikhai toulaire.”

³⁴ Südonou Israel maitao nou puletao vei raokhao khaoyu chuh sü khei thoumoyu sou thouloua sah nou züloure, alia süsü puletao phaova khailoua pfütare.

³⁵ Moses nou paopeiyu thaifüa Israel mainou souloue, süolouzü puletao nou Ejipt mai hinou shahu ae sana nou soukhai touyu zhusana ae sabanü khesü kholoue.

³⁶ Mapao nou puletaoye Ejipt maivei nghingao hinou tsükhouyu sü panou soupeiwure, südonou puletao nou khoyu veishi sü Ejipt mainou peie. Sübüa puletao nou Ejipt maivei kini khesü poloure.

Israel Mainou Ejipt Teidei Thaowua Tapayu

³⁷ Israel mainou Rameses hinou Sukkoth hi phi nou tayu hai nahmaitou ae naotumai loumoa mai the kaihrou phalie.

³⁸ Mai kukhe mai-a loua nou kikhaorü, zhaotu ae nghitu alao koa puletaoye tae.

³⁹ Puletao nou Ejipt hinou pfüsha-a tayu sou sünou khei thoumoyu raokhao khaoloure, daiolouzü soudakhai toumoa buyu hinou puletaoye Ejipt hinou hutawure, alia puletao nou touso souda loure teile ngaolou more.

⁴⁰ Israel mainou Ejipt hinou hrüyu hai po kaihdai-a shirou hrüe.

⁴¹ Po kaihdai-a shirou cheyu teithe zhou sü Mapao vei maime teitei nou Ejipt teidei thaokhaiwua tapare.

⁴² Süzhou khei hai Mapao nou puletaoye Ejipt hinou sapa loure donou khopeia sapa peiyu khei-e; südonou haizhou khei hai Mapao ye kho-a lichore donou Israel mai hrülai nou, haithai vere bonakha-a teithe haizhou khei hai reihlai.

Tachopa Nüh hi Soupfüre Zhaitao

⁴³ Mapao nou Moses ae Aaron hi paoe, “Tachopa Nüh hi soupfüre zhaitao sü haitaoe: Tachopa nüh hai hisü shetumaiye koa touso touzho laimoe.

⁴⁴ Ana hülouyu qila mai louzü puhye heerode louzü koa touso bailai.

⁴⁵ Shetumai mokhaia sa-a vah souyu kilai maiye panou haina hai toulai moe.

⁴⁶ Kihikha ali hinou tovai haina sü toua bailai, neletao nou tousoyu kihikha hinou vakou souva aliro popa laimoe; ae sourao hai ali koutea souchalai moe.

⁴⁷ Israel mai hrülai nou nüh hainasü nülai.

⁴⁸ Ana heerode moyu maiye panou nüh haina vei touso toulai moe. Ae shetumai ali nou neletaoye koa bulouzü alia puhnou Mapao ye tsükhouyu hinou Tachopa Nüh nülai toulouzü, puhvei kihikha hi buyu poutumai hrülai sü heerode khaitoulai, süthaisü puhye neletao raibütoua koa nüh nüa bailai.

⁴⁹ Israel mai hia alia shetumai nou neletao hi ve koa hrüyu mai hia Tachopa Nüh vei zhai haitao sü raibütoua bailai.”

⁵⁰ Mapao nou Moses ae Aaron hi kharochi peikhai touyu büa Israel mai hrülai nou souloue.

⁵¹ Süzhou teithe Mapao nou Israel mai hrülaiye sü Ejipt hinou sa-a papeie.