SHURAI 50 - SHEEYU BAIBEL (BSI)

¹ Süthaisü Josef nou puh puo hi kaokouloua krare alia puo pah münou teire.

² Josef nou puh puo thaiphao nasü tahmore donou pou napeio tea puh kilai maitao hisü kharochi peie. Sübüa puh kilai maitao nou puh puoye pou napeie.

³ Tahmore donou pou nayu hai teithe raidai loure, daiolouzü sübüa souyu hai teithe süzhou louyu maizhaie. Alia Ejipt mainou puhye donou teithe rainai dopfü peie.

⁴ Josef nou dopfüa krayu teile cheyu thaisü veo vei peikho maitao hisü puhnou paoe, “Zhuvea chipao haitao veo hi taho paopeio:

⁵ Süolouzü apuo nou thaire phaki, puhnou Kanaan teidei hi souda khaitouyu khüh nahisü puhvei thaiphao nasü pove vuh peio tea Eye panou chaachou souwure. Südonou Eye panou apuo thaiphao nasü poho vuh peio, ae süthaisü E haihi dakhai ve-a bailai.”

⁶ Veo nou chila peie, “Nenou chaachou souyu thaifüa nepuo thaiphao nasü poho vuh peio.”

⁷ Südonou Josef nou puh puoye vuhre donou tare. Puhye koa satayu hai Pharaoh vei peikhomai hrülai, puh kikhamai hi tsümaitao, alia Ejipt hi matsümai hrülai koa tapeie.

⁸ Josef kikhamai hrülai, puh thaihou jürai maitao, alia puh puo kikhamai hrülai-a puh puoye poa vuhre donou tae. Tamoa Goshen hi buyu hai puletao vei nahmaitao, zhaotu, nghitu ae kikhaorü likhi baie.

⁹ Rhei pfüyu mai ae rheiluki pfüyu mai-a puhye koa tae. Puletao tayu maitao hai me aduli soua tae.

¹⁰ Puletao nou Jordan teinghi palo Atad tea kuyu thaibuh hi veyu phaki, puletao nou sühi sünou levea-a teile taoli dopfüa krae. Josef nou teithe anai sü dopfüyu naanou soue.

¹¹ Kanaan nuhdu hi mainou puletao nou Atad hinou dopfüa krayu ngaoloua “Ejipt hi mainou daizhou koute leveayu naanou soua busa!” tea paore. Südonou buh sünasü Abel Mizraim (Dopfüyu buh) tea sapeie.

¹² Sükua Jakob nahmaitao nou puletao puo nou kharochi peiyu na thaifüa soupeie.

¹³ Athai mai vuhyu buh soulai tea Abraham nou Hitmai puona Ephron hinou hülouyu Kanaan teidei hi buyu Mamre teinghi palo Makpelah chuh qulu hisü Jakob pfüphao pfükhe vuh peie.

¹⁴ Josef nou puh puoye vuhyu thaisü puh thaihou jürai maitao, alia puhye sa-a tayu mai hrülai koa Ejipt hisü dakhai tare.

Josef nou Puh Thaihou Jürai Maitaoye Le Souva Peiyu

¹⁵ Puletao puo thaiyu thaisü, Josef jürai maitao nou haibüa tsüchore, “Etao nou raichoki puh hi hashi soupei khaitouyu süna vanou puhnou chuo Eletaoye ngaora loua khü phoulai tea bua malae.”

¹⁶ Südonou puletao nou Josef hisü haibüa chi paosei tare, “Etao puo thaimo jünou, puhnou Etao hi haibüa paoe,

¹⁷ ‘Nehi hashi soukhai touyu ne jürai maitao mah khaipeio tea Josef hi paopeio toue’. Südonou chuo ne puo Ramai kilai Etao nou soukhai touyu mah nasü khaipeio tea khowe.” Josef nou chipao haitao süloukhaie, puhsü krare.

¹⁸ Puh jürai maitao-a tave puh phi hi nakouloua paoe, “Zhukhaio, Eletao hai nevei qila baie.”

¹⁹ Ana Josef nou puletao hisü paoe, “Ngaopiso, daiolouzü Esü Ramai moe.

²⁰ Neletao nou ahi hashi soulai tea soue, ana Ramai nou sünasü chu hria buyu mai haitaoye souhri loure donou havei hilo souda thoupeie.

²¹ Südonou halia ngaopiso, Enou neletaoye alia neletao nahmaiye kipeilai.” Sübüa puhnou puh jürai maitao hisü paila aveih nou paopeie alia le souva sapeie.

Josef Thaiyu

²² Josef nou puh puo kikhamai koa Ejipt hinou hrükoue. Puhnou thaitayu phaki puhvei po hai kaihlia kirou pae.

²³ Puh hai Ephraim nahmai maiphao asü chena koute ngaolou hie, alia Manasseh nahpoutu Makhir nahmai-a puh khoubou hinou taopoa nahnahie.

²⁴ Puhnou chinamaitao hisü paoe, “Esü chuo thaita laire, ana Ramai nou neletaoye veikhai timoa salai peilai, alia dei haina hinou sapaloua Abraham, Isaak ae Jakob hi apaopei khaitouyu dei süna hisü neletaoye save thoupeilai.”

²⁵ Süthaisü Josef nou puhmaitao hisü “Ramai nou neletaoye buh sünahi save thoupeiyu kisü, neletao nou avei pfüphao hai poa buh sühi pove khaipeilai” tea chaachou soupeio toure.

²⁶ Sübüa Josef nou po 110 mailoua thaire. Puletao nou puhvei pfüphao sü tahmoyu pou naloua sübvü hisü thouloure.