SHURAI 46 - SHEEYU BAIBEL (BSI)

Jakob alia Puh Kikha Maitao nou Ejipt hi Tayu

¹ Jakob nou puhvei buyu na teitei tupfüloua tare, alia puhnou Beersheba hi koulouyu kisü, puhnou puh puo Isaak Ramai ye sühinou posheela peie.

² Ramai nou süzhou khei puhye “Jakob, Jakob” tea kuloure. Alia Jakob nou “Oe, E haihi bue” tea chila peie.

³ Süthaisü Puhnou paoe, “E Ramaie, ne puo vei Ramaie, ne Ejipt hi tare ngaopiso, daiolouzü Enou neye sühinou tyahrü aduli soupeilai.

⁴ Enou neye koa Ejipt hi sa-a tapeilai alia Enou neye sü buh haihi sa-a dakhai ve peilai. Josef bah hinou neye panou veishoa thailoulai.”

⁵ Jakob nou Beersheba hinou tapare, alia puh nahmaitao nou puhye, puletao chapfü ae nahmaitao hrülaiye sü Ejipt hinou veo nou seive peiyu rheiluki hisü thouloure.

⁶ Puletao vei kikhaorü ae Kanaan hinou ngaolouyu na teitei pfüa Ejipt hi hotare. Jakob nou puh tyaosholea hrülai,

⁷ puh nahpoutu maitao, puh tyaonah maitao, ae puh nah naotumai hrülai saloua Ejipt hi kouhtare.

⁸ Israel maitao nou Ejipt hi tayu puletao zhih sü Jakob nahpoutu naraio Reuben,

⁹ alia Reuben nahpoutu maitao: Hanokh, Pallu, Hezron, Karmi.

¹⁰ Simeon ae puh nahpoututao: Jemuel, Jamin, Ohad, Jachin, Zohar, ae Kanaan maipfüpai nahpoutu:

¹¹ Levi ae puh nahpoutu maitao: Gershon, Kohath ae Merari.

¹² Judah ae puh nahpoututao: Shelah, Perez, ae Zerah (Judah nahpoutu Er ae Onan hai Kanaan hinou thaire). Perez nahpoutu ahai: Hezron ae Hamul.

¹³ Issakar ae puh nahpoutu Tola, Puah, Jashub ae Shimron.

¹⁴ Zebulun ae puh nahpoutu maitao: Sered, Elon ae Jahleel.

¹⁵ nahpoutu haitao hai nah naotupai Dinah koa Leah nou Mesopotamia hinou Jakob hi napeiyu maitaoe. Leah hinou naveyu tyaonah maitao hrülai sü shiasüe.

¹⁶ Gad ae puh nahpoutu maitao: Zephon, Haggi, Shuni, Ezbon, Eri, Arod, ae Arili.

¹⁷ Asher ae puh nahpoutu maitao: Imnah, Ishvah, Ishvi, Beriah, ae puletao tupai Serah. Beriah nahpoutu ahai: Heber ae Malkhiel.

¹⁸ Mai kiarou haitao hai Laban nou puh nahpai Leah hi peiyu qilapai Zilpah hinou nalouyu Jakob nahmaitaoe.

¹⁹ Jakob chapfü Rachel nou napeiyu nahpoutu ahaisü Josef ae Benjamin-e.

²⁰ Ejipt hinou Josef ye Heliopolis hi napao Potiphera nahpai Asenah nou napeiyu nahpoutu ahaisü Manasseh ae Ephraim-e.

²¹ Benjamin nahpoutu maitao: Bela, Beker, Ashbel, Gera, Naaman, Ehi, Rosh, Muppim, Huppim ae Ard.

²² Mai haitao kiadai hai Rachel hinou veyu Jakob vei tyaonah maitaoe.

²³ Dan ae puh nahpoutu Hushim.

²⁴ Naphtali ae puh nahpoutu Jahzeel, Guni, Jezer, ae Shillem.

²⁵ Mai haitao anai hai Laban nou puh nahpai Rachel hi peiyu qila pfüpai Bilhah hinou veyu Jakob nahmai taoe.

²⁶ Puh nahpoutu maitao vei chapfü loumoa Jakob tyaonah maitao khaikho nou Ejipt hi louyu sü mai rairoua-roue.

²⁷ Ejipt hinou Josef nou nahpoutu ahai naloue. Jakob kikhamai taonou Ejipt hi ve hrüyu mai hrülai hai mai rainai-e.

Jakob ae Puh Kikhamai nou Ejipt hinou Ve Hrüyu

²⁸ Jakob nou puhye Goshen hinou ve daopeio tea paore donou Judah sü raia Josef hi seitare. Puletao nou Goshen hi velouyu phaki,

²⁹ Josef nou rheiluki soudaloua puh puoye daore donou tare. Puhai puonah nou ve daolouyu kisü Josef nou kou puo ngu kholoua phasoli krare.

³⁰ Jakob nou Josef hisü paoe, “Chuo E thai-a nükhüre, daiolouzü E nezhuh ve ngaoloure alia ne chua hrihie touyu süloure.”

³¹ Süthaisü Josef nou puh thaihou jürai maitao hi ae puh puo kikha maitao hisü paoe, “Kanaan hi buyu athaihou jürai maitao ae apuo kikha maitao hai ahi vere tea E taho veo hi paopei laihie.

³² Neletao hai zhaotu kia zhaokhoyu mai baie alia kikhaorü ae na teitei nou koa haihi veloure tea Enou puh hi paopeilai.

³³ Veo nou neletaoye kuloua neletao daivah souyu maie tea noulouzü,

³⁴ ne kilai Etao sü tai-a bukinou Epuo-paoh büa kikhaorü khoa hrüpayu maie tea paolo. Sükulouzü puhnou neletaoye panou Goshen hisü buwulai.” Josef nou haibüa paoyu hai daivanoue toulouzü Ejipt mainou kikhaorü khoyu maiye jüpa moe.