SHURAI 45 - SHEEYU BAIBEL (BSI)

Josef nou Puh hai thaowe touyu Chinamaitao hi Paongao Peiyu

¹ Josef nou sühi la-a buyu puhvei kilai maitao nghoujü hi puhnou kranüyu nasü shamea louhore, südonou puhnou puletao hrülaiye sü kipa patawo tea kharochi peie. Josef nou puh thaihou jürai maitao hi puh thaowe touyu paongaoyu phaki buh sühi kilai maitao mailia hae.

² Puhnou ra-a krayu pai sü Ejipt mainou süloure alia süna ko khesü veo fühao hia süvere.

³ Josef nou chinamaitao hisü paoe, “E Josef-e; Apuo chua hria buhi homoe?” Ana puh thaihou jürai maitao nou süsü süloukhaie ngaopi loua chila peilou hore.

⁴ Süthaisü Josef nou puletao hi paoe, “Ahi taikoulo.” Ae puletao nou nghiki taikou loure. Süthaisü puhnou puletao hi paoe, “Esü neletao nou Ejipt mai hi zhothou peiyu Josef nasüe.

⁵ Chuo neletao nou Eye haihi zhothou peiyu vanou leveaso moa lah neletao pei hi rarouso, daiolouzü maikhe mai hrirai khailu peiloure donou Ramai nou Eye neletao jünou raia haihi seive peie.

⁶ Teidei haihi tokaayu po ahai baihie. Chua tahta laimoyu ae dou chachi laimoyu po angou buhie.

⁷ Haibüa khupayu zhai hinou neletaoye panou hriloure donou Ramai nou Eye neletao jünou rai-a haihi seihoa baie.

⁸ Südonou Eye haihi seihoyu sü neletao nou moe ana Ramai nou baie. Ramai puhnou Eye veo vei buhdumai pei hinou adukhana panou souloue alia Ejipt teidei teitei sü Eye panou khore donou abah hi thaothou peire.

⁹ “Chuo neletao thashoa dakhaiho Etao puo hisü ne nahpoutu Josef nou haibüa paowe tea paopeio: süolouzü Ramai nou Eye panou Ejipt mai hrülai pei khowo souloure, südonou thashoa ahi velo.

¹⁰ Neletaoye sü Goshen teanou kuyu teidei hisü Eye panou da-a hrülai - ne, nenah maitao, netyao nahtao, nevei zhaotu nghitu, kikhaorü alia nevei abuna teitei koa aphi hinou bulai.

¹¹ Neletao nou Goshen hi bulouzü Enou neletaoye zhulousüe. Ne, ne kikhamai, alia neletao vei kikhaorü teitei panou khüa buyu E jüpa moe, daiolouzü chua tokaare po angou bupuhie.”

¹² Chua Josef nou paopue, “Amü vujünou E hai Josef-e tea paopayu sü neletao nghithou nou ngaore alia Benjamin, nenoua ngaore.

¹³ Ejipt hi Enou khouko kazhou pfüa bue touyu ko ae neletao nou ngaoyu teitei sü apuo hi taho paopeio. Sübüa puhye sü haihi tha-a saveo.”

¹⁴ Süthaisü puhnou puh thaihou Benjamin ye ngu hinou kholoua krare ae Benjamin-a puhye kholoua krare.

¹⁵ Puhnou kra-a puh jürai maitao alili kholoua münou teipeie. Sükuyu thainou chinamaitao sü puhye chih phata hie.

¹⁶ Josef vei thaihou jürai maitao vewe touyu ko sü veo fühao hi süve loukhaie veo ae puhvei peikhomai hrülai-a asashore.

¹⁷ Veo nou Josef hisü haikua paoe, “Ne thaihou jürai maitao rheisüh khesü kou souloua Kanaan hi khaitawo tea paopeio.

¹⁸ Alia puletao puo ae puletao kikhamai hrülaiye saloua haihi dakhai ve buwo. Ejipt hi füdei aveih khanasü puletaoye peilai alia panou tatou haolouhoa bulai.

¹⁹ Puletao chapfü nahmaitao ae puoye haihi savere donou Ejipt hinou rheiluki poloua panou tawo.

²⁰ Kanaan hi puletao vei kini donou tsüchoso, daiolouzü Ejipt haihi füdei aveih khanasü puletao vei panou soulai” tea paore.

²¹ Jakob nahpoutu maitao nou paoyu thaifüa souloue, alia veo nou paoyu büa Josef nou rheiluki ae lududo hi toure todo southou peire.

²² Puhnou puletao mai hrülaiye sabanü chekhe peie, ana puhnou Benjamin ye shahu kaihsü alia sabanü sheetouyu angou peie.

²³ Puhnou puh puoye Ejipt hinou ngaoyu na veitya rheisüh kou kirou seipeie, alia ludu hi toure touso na rheisüh kou kirou thoupeie.

²⁴ Süthaisü puhnou china maitaoye sü seita peire, alia puletao nou tapayu phaki Josef nou “neletao lududo hi züveiso” tea paopeie.

²⁵ Sükua puletao nou Ejipt hinou puletao puo nou buyu Kanaan hisü dakhai tare.

²⁶ Alia puletao nou ve puletao puo Jakob hisü “Josef sü chua hria buhie alia puhnou Ejipt teidei teitei khoa bue” tea paopeiyu nasü chouloua louche louhore.

²⁷ Ana Josef nou puletao hi paopeiyu chipao teitei paopeiyu phaki alia puhye saloure donou rheiluki seive peiyu ngaolou khaie, puhsü levea dopfü buyu hinou chüpu loure.

²⁸ Alia puhnou paoe, “Anah poutu Josef sü chua hria buhi teaho! Süsü Enou khoa buyu nasüe. E thaimo jünou taho puhye zhulai.”