SHURAI 41 - SHEEYU BAIBEL (BSI)

Josef nou Veo vei Me Paola Peiyu

¹ Po ahai thailo Pharaoh veo hai teitheli mekou nou Nail rei pe hinou la-a bua mue.

² Rei sühisü nou hrübo veishoyu chokü anai ngaopa hiphao hinou pou toua bue.

³ Süthaisü choke kukhe hrüshi khaokhaoyu anai-a rei pe hinou pa araitao phihi nou ngao-a bue.

⁴ Hrüshi khaokhaoyu choke anai taonou hrübo veishoyu choke anai taoye kai-a zhaoloure. Süthaisü Pharaoh sü kaishure.

⁵ Puhnou zhi dakhailou me kukheli mupu khaie. Thoube veishoyu rouko anai sü routhoufü ali hinou paopae.

⁶ Süthaisü teikhai teiro ashinou ve soushi khaitouyu thou loumoa thoubah taoyu rouko anai-a füli hinou paopae ngaoe.

⁷ Thoubah buyu rouko taonou thouche roukotao sü kai-a zhaoloure. Pharaoh nou kaihshuloua haisü mekou baie tea süloure.

⁸ Shohnasü kushu puhsü levea shore, südonou Ejipt hi larü rümai ae tsüsümai hrülai kuloua puhvei me sü paongaore ana maili noua puhvei me sü paola peilou hore.

⁹ Süthaisü veo pai polayu nanou veo hisü paoe, “Enou vah soumah khaitouyu nasü zhou Enou ne hi paopa laire.

¹⁰ Nenou Eye ae raokhao khaoyu peichana hi raroua ahaiye reihmai peikhowo ki hukha hi pothou peie.

¹¹ Zhoukheili ahai nou me chükhi mue alia me sü qo kukue.

¹² Reihmai peikhowo vei qila Ebriamai ali Eye koa bue. Ahai vei me sü puh hi paongao peie alia sütao vei qo sü puhnou paola peie.

¹³ Puhnou paola peiyu bütoua Eye sü avahbuh hi pothou dakhai peie alia raokhao khaoyu peichana louzü rai nou daothare.”

¹⁴ Veo nou mai seiho Josef ye sü hukhaki hinou thashoa kupoa vere. Puhnou mümai sai-a sabanü daloua veo hisü talou daore.

¹⁵ Veo nou puh hisü paoe, “Enou meli mue ana sünavei qo sü maili noua ahi paola peilou hore. Me muyu vei qo hai ne paola veishoe tea Enou süe.”

¹⁶ Josef nou veo hisü chila peie, “Veowo, Enou paola peilou hoe, ana Ramai nou ne hisü kaozü hinou paola peilai.”

¹⁷ Süthaisü veo nou Josef hi puhvei me sü haibüwe tea paore, “Amekou nou Esü Nail reipe hinou la-a bue,

¹⁸ ae hrübo veishoyu choke anai rei hinou ngaopa pou toua bue.

¹⁹ Süthaisü hrüshi khaokhaoyu choke kukhe anai-a ngaopakhaie. Enou Ejipt teidei hi sütao büa hrüshiyu choke ali-a ngaokhai mohie.

²⁰ Chokü hrüshi khaokhaoyu sütao nou choke hrübo veitao sü kai-a zhaoloure,

²¹ ana maili noua choke sütao nou hrübo veishoyu choke anai zhaoloure touyu sülou hoe, daiolouzü choke sütao hai chua leh khihao-a hrüki khaokhao-a bubaie. Süthaisü Esü kaishure.

²² Pua Enou zhilouyu phaki, meli mu dakhaie alia amekou sünou routhoufü ali hinou rouko anai thou veishoa paopae.

²³ Süthaisü teikhai teiro ashinou vuhwua thoubah taoyu rouko anai paopa-a ngaoe.

²⁴ Ana thoubah taoyu taonou touche taosü kai-a zhaoloure. Avei mesü larü rümai ae tsüsü maitao hi paongaoe ana puletao maili noua sütao vei qo sü ahi paola peilou hore.”

²⁵ Süthaisü Josef nou veo hisü paoe, “Nevei me ahai khinou qo zhoa baie, Ramai nou soulaiyu vah taosü ne hi paongaowe.

²⁶ Choke hrübo veiyu anai hai po anai paowe, alia rouko anai hai-a po anai paoa baie. Haihaisü qo raia baie.

²⁷ Na-a payu choke hrükikhao khaoyutao ae teikhai teiro ashi nou dai-a thoubah tao-a buyu rouko anai taosü po anai tokaa laiyue.

²⁸ Enou ne hi paoyu büa Ramai nou soure vahtao sü ne hi pongaowe.

²⁹ Ejipt teidei hisü po anai topha sholai.

³⁰ Süna thailo hai po anai tokaalai, alia savashoa tophayu po anai taosü ngai-a bailai, daiolouzü tokaayu sünanou teidei nasü soushi showulai.

³¹ Tokaa velai sünanou shiyu hai teile ali hi vashoa tophayu nasü ngai bailai.

³² Nenou me mu dakhaiyu nasü Ramai nou souvu zülai tea teile dadewure alia sünasü teile jüta thai palai touyu pongaowe.

³³ “Chuo südonou tsüsüyu ae tsüpfüyu maiye doloua teidei haina panou kholo.

³⁴ Peipha peire buhdumai kukhe maia nenou doloua po anai hi thou valaiyu zha angou hinou zha ali poa jükhailo.

³⁵ Tophayu po anai hinou thoudzü teitei pojüloua sütaosü panou kholo.

³⁶ Thoudzü taosü Ejipt hi vedaore takaayu po anai taohi poa zhipeire donou pokhailo. Sükulouzü maikhe mai khütha laimoe.”

Josef panou Ejipt hi Teidei Khowo Souyu

³⁷ Veo alia puhvei kilai maitao nou Josef nou paoyu sü kaore tea poloure.

³⁸ Veo nou kilai maitao hisü paoe, “Ramai rako nou koa buyu Josef haina büa maikukhe Etao hrohi ngaolou hoe.”

³⁹ Südonou veo nou Josef hi paoe, “Ramai nou haitao teitei ne hi ngaopeie, südonou nejü nou hasüyu ae tsüveiyu maikukhe ngaolou hoe.

⁴⁰ Neye panou ateidei kholai alia avei mai hrülai nou nevei kharochi zülai, avei vebuh hi E likhinou ne jünou dua bailai.

⁴¹ Zhukhaio, Enou neye panou Ejipt teidei teitei hi peikhowo soure donou dopeiwure.”

⁴² Süthaisü veo nou puhvei sheesaoyu bahtoukha nasü phaloua Josef bahtou hi thoupeire, alia jüjüsa zao ali puhye zaopeie alia sana tou ali pokou puh tehi toupeie.

⁴³ Veo vei rheiluki ahai chena hi panou ngaopa buloure alia reihmaitao nou puhjü railoua “Ludu vaipeio! Nakou khoukhülo” tea rihsha-a tae. Sükua Josef ye sü Ejipt teidei khore donou dopeire.

⁴⁴ Süthaisü veo nou puh hi paoe, “E Pharaoh veowe - Ejipt teidei hi maili-a panou nedo loumoa bakha khalai moe ae phika kalai moe.”

⁴⁵ Veo nou Josef ye sü Zaphenath Paneah tea Ejipt mai zhih nou sapeire alia Heliopolis nuhdu hi napao Potiphera nahpai Asenath sü puhki khapeire.

⁴⁶ Josef nou Ejipt hi veo vei vah talou souyu kisü puh hai po shirou pare. Puhnou veo vei vahbu thaokhaia Ejipt teidei teitei taho sühao zhutare.

⁴⁷ Tophayu po anai hisü chamou alao veia valoue,

⁴⁸ alia sütao teitei sü Josef nou khaloua nuhdu hinou pojü khailoue. Nuhlih kisü dou buyu buh-buh hi thou pojü khailoue.

⁴⁹ Thou sü poulea rei hi vaonai büa chosha louhoa Josef nou pojü khailoure.

⁵⁰ Tokaayu teile ve mojünou Josef ye sü nahpoutu ahai Asenath nou napeie.

⁵¹ Josef nou paoe, “Ramai nou Eye panou avei veahoyu teitei ae apuo kikhamai hrülaiye ngailoue.” Südonou puh nahpoutu narai na zhih sü Manasseh tea sapeie.

⁵² Puh nahpoutu ahai chena zhih sü Ephraim tea saloue, daiolouzü Ramai nou Eye veahoa buyu teidei hinou nahmai peie.

⁵³ Ejipt teidei hi po anai vashoa tophayu teile sü akhai soure.

⁵⁴ Alia tokaa laiyu po anai nasü Josef nou paoyu büa chuo takou daore. Teidei kukhe teitei hia tokaa shore ana Ejipt teidei hiolouzü thoudzü hamoe.

⁵⁵ Ejipt mainou toure halouyu kisü veo hinou ve thou peio tea khore, ana veo nou Josef hinou kholo alia puhnou paoyu büa soulo tea paopeie.

⁵⁶ Teidei teitei hisü tokaayu hai shishoa veyu phaki Josef nou thouki teitei sü houpeia Ejipt mai hrülai hisü zhopeie.

⁵⁷ Buh liki tokaa shishoyu thaifüa deiphao holo hailo hrüyu mai hrülai nou tave Josef hinou thou hüpfüe.