SHURAI 40 - SHEEYU BAIBEL (BSI)

Josef nou Hukha loumai Me Paola Peiyu

¹ Teile khaoli buyu thailo Ejipt hi veo vei zhaohpai khailayu hi peikhowo ae raokhao khaoyu hi peikhowo puhai nou veo nghoujü nou vah soumah peiwure.

² Veo nou puh kilai ahai hisü rarou loua

³ puhaiye sü reihmai peikhowo ki hukha Josef ye pothou khaiyu buh sünahi pothou khaire.

⁴ Puletao nou hukhaki hi teile taoli koa bukouyu kisü, hukhaki hi peikhowo nou Josef ye panou zhure donou puh bah hi thaothou peiwure.

⁵ Teitheli khei veo vei pai khailayu puona ae raokhao khaoyuna puhai maihai kheinou me mure, alia mesü qo takukue.

⁶ Josef nou shonah puhai hi takouyu kisü puhai sü levea bure.

⁷ Puhnou Pharaoh vei kilai nahai hisü noue, “Nehai zhou daisounou leveawe?”

⁸ Puhai nou chila peie, “Ahai nou me tsükhei mue alia buh haihi sü mailia me nasü daidonoue touyu paola peiloure mai hae.” “Me paola peiloure sü Ramai bah hi bumowu? Nehai vei me sü ahi paokhaio” tea Josef nou paore.

⁹ Veo vei pai khailayu nanou puhvei me haikua paore, “Ame kounou darkhabe ali bua ngaoe,

¹⁰ alia sünasü bo asü pfüwe. Darkhabe nanou nghou lahpaloua papa-a thou shiloure.

¹¹ Esü Pharaoh veo vei pai poa bue alia Enou darkha shithou sü poloua veo vei pai hi dzü süthou loua puh bah hi peie.”

¹² Josef nou paoe, “Süna vei qo sü haikue: bo asü nasü teithe asüe.

¹³ Teithe asü thai veo nou neye hukhaki hinou ne mah khaipeia phapeilai alia nevei vahbuh nahisü dakhailou raichoki büa nenou puh pai polah peilai.

¹⁴ Ana nenou haitao veteloure touyu phaki Eye lichopeio, ae avei ko hai veo hia paopeia panou E-a hukhaki haihi nou phaloure donou soukha peio.

¹⁵ Cheche vuzünou Eye Ebriamai dei hinou nüloua baie, alia hai hia Eye hukhaki hi thouzüyu mah lia Enou soumoe.”

¹⁶ Raokhao khaoyu kilai puona nou veo vei pai khaila peiyu navei me hai vei-a paola peikhaie, puhnou Josef hisü paoe, “E-a meli haibüa mue: Esü raokhao sülai asü apei hinou pfülaia bue.

¹⁷ Sülai peikhana hisü Pharaoh donou raokhao tyatyali thou khaitoue, ana teihi raohou khenou sütaosü apei hinou daotoua bue.”

¹⁸ Josef nou haibüa paola peie, “Süna vei qo sü haikue: Sülai asü nasü teithe asüe.

¹⁹ Teithe asü thai veo nou neye pophaloua nepei sü daodelai. Süthaisü ne pfüphao hai poa süübe alihi vaokhai peia panou tei raohou khenou nesou sü panou daotoulai.”

²⁰ Teithe asü zhousü veo vei nayu teithe kou daore, südonou puhnou puhvei vahsoumai hrülaiye vaipeie, alia puhnou puh pai khailayuna ae raokhao khaoyu peikhowo puhaiye vakou sapaloua puhvei kilai kukhe mai hi sakou khaire.

²¹ Puhnou puh pai khailayu nasü raichoki puhvei vahbuh hi pothou khaipu peire,

²² ana Josef nou puhai hi me paola peiyu büa raokhao khaoyu nasü rainou daothare.

²³ Ana veo vei darkha pai polayu nanou Josef ye licho peilou moa ngaiwure.