SHURAI 4 - SHEEYU BAIBEL (BSI)

Kain ae Abel

¹ Chuo Adam nou puh chapfü Ef ye koa züloure alia Ef nou poupfü loua Kain ye naloure alia haibüa paoe, “Mapao vei soukha vanou E mai ali ngaoloue.”

² Süthaia nahpoutu ali Abel teanou honapai nou naloue. Abel hai zhaotu khoe, ae Kain hai tatamai ali soue.

³ Teile phajü touthai Kain nou dou hinou tatalouyu shira pove Mapao ye sheelae,

⁴ alia Abel nou zhaotu toukou arai nahai ae sünavei sou touveih zhatao poa sheelae. Mapao nou Abel ye sü jüpae alia puhvei sheelayu haisü popeie,

⁵ ana Kain ye ngaorae ae puhvei sheelayu nasü popei bare. Süvanou Kain hai raroua pah pfüshou loure.

⁶ Mapao nou Kain hi paoe, “Ne daivanou rarouwe ae nepah daidonou pfüshouwe?

⁷ Nenou kaozü nasü soulouyu thaio, neye popei laimowu? Ana nenou souzü vah soulou more toulouzü, mah nanou ne kikhu phinou neye dah-a bure, mah nanou ne jünou veiloure tea bure, ana nenou mah jünou kolowo.”

⁸ Kain nou puh thaihou Abel ye “Ahai koa douhi taho laikhe” tea kuloue. Alia puhai nou douhi bua bukinou Kain nou puh thaihou Abel ye sü dathare.

⁹ Süthaisü Mapao nou Kain hi paoe, “Ne thaihou Abel daikinou bue?” Puh nou chila peie, “E sümoe, E athaihou ye khoyu maiwu?”

¹⁰ Mapao nou paoe, “Ne daili soupeiwure? Ne thaihou vei zhesü ahi shusoua deiphinou rapao-a bure.

¹¹ Chuwo ne bah nou soupayu ne thaihou vei zhe sünaye teilouyu dei süna hinou neye chaapeire.

¹² Nenou dou tathouyuma neye thou ali-a shipei laimoe; neye panou ki ha-a deiphao hi hrü sühao-a tayu mai soulai.”

¹³ Kain nou Mapao hi paoe, “Ahi tudee peiyu hai Enou pfülou hore.

¹⁴ Zhukhaio chuwo nenou Eye hulaiwure, alia Esü ne nghoujü hinou tutsü talaire, alia deiphao hi ki ha-a hobu haibua tayumai ali soulaire alia Eye vedaoyu mai tara linoua Eye southa bailai.”

¹⁵ Ana Mapao nou puh hi paoe, “Sükulai moe! Mai tara linoua neye dathare toulouzü puh hisü bakha anai khüphoulai.” Süthaisü Mapao nou Kain va hisü shee soukhai peie, sütou more toulouzü puhye ngaolouyu mai tara linou puhye southawulai.

¹⁶ Süthaisü Kain nou Mapao nghoujü nou tapaloua Eden teinghi palo Nod teanou kuyu füdei hisü hotare.

Kain vei Tyaonahtao

¹⁷ Kain nou puh chapfü ye süloure, süthai honapai nou nahpoutu Enok ye naloue. Süthaisü puhnou nuhdu ali soushuloue alia nuhdu süna zhih hai puh nahpoutu Enok zhih hinou saloue.

¹⁸ Enok hinou nahpoutu Irad ngaoloue, ae Irad hai Mahujael puoe, ae Mahujael sü Methushael puoe, ae Methushael sü Lamek puoe.

¹⁹ Alia Lamek nou maipfü ahai naloue. Puh hai zhih sü Adah ae Zillah toue.

²⁰ Adah hinou Jabal naloue. Puhsü kikhaorü kiyu ae sahpao hinou hrüyu tyahrü taovei puopaoe.

²¹ Jabal sü puh thaihoue, puh hai lousoua lana vayu ae shaa houngyu tyahrü taovei puopaoe.

²² Zillah nou Tubal Kain ye napeie. Hu vei baseina veishi hai puhnou soupeie. Naamah hai Tubal Kain vei tupaie.

²³ Lamek nou puh chapfü ahai hi paoe, “Adah ae Zillah, Enou paoyu achi keipei khaio; Lamek chapfü haire, Enou paoyu chi sü keilo: Eye zhi peilai tea buyu ae Eye southalai tea buyu nahlemai ali Enou southare.

²⁴ Kain ye southayu donou mai anai hrirai polai toulouzü, Lamek khü hai mai rainai-nai poyu phae.”

Seth ae Enosh

²⁵ Adam nou puh chapfüye koa buloua nahpoutu ali napuloue. Puh zhih hai Seth tea saloue, daiolouzü Kain nou Abel ye dathayu thao Ramai nou nah poutu ali ahi peie tea maipfü nou paoe.

²⁶ Seth hia nahpoutu ali ngaoloue ae puh zhih hai Enosh tea saloue. Süteile hinou maikhe mainou Ramai zhih kua ratho shure.