SHURAI 38 - SHEEYU BAIBEL (BSI)

Judah ae Tamar

¹ Süpha teile hi Judah nou puh thaihou jürai maitao thao-a Adullam nuhdu hi Hirah tea kuyu maina hisü ho butare.

² Sühinou Judah nou Kanaan maipu Shua nahpai ve daoloua naloure.

³ Honapai nou nahpoutu ali naloue alia puh zhih sü Er tea saloue.

⁴ Honapai nou nahmai hrüpuloua nahpoutu ali napupeie alia sünasü Onan tea zhih sapeie.

⁵ Pua nahpoutu ali naloua puh zhih sü Shelah tea saloue. Nahtou süna nayu phaki Judah hai Achzib hinou bue.

⁶ Judah nou puh nahpoutu atsükhana Er ye donou chapfü ali phoupeie, puh zhih sü Tamar toue.

⁷ Ana Er nou hrü ashi hinou hrüyu donou Mapao nou puhvei hrirai potare.

⁸ Süthaisü Judah nou Er thaihou Onan hisü paoe, “Ne jürai chapfü hisü talou züloua thaihou maili nou souzütao thaifüa soukhaio, sükua ne jürai panou tounah ngaolo.”

⁹ Ana Onan nou tounah haisü puhvei tounah soulai moe touyu süloukhaie, puhnou puh jürai chapfü sazüyu phaki panou nahmai hrümore do souloure.

¹⁰ Puhnou souyu vahso haisü Mapao nou aetou more, südonou puh-a Ramai nou southare.

¹¹ Süthaisü Judah nou puh mou Tamar hisü paoe, “Anah poutu Shelah dupaloumo koute ne nepuo kihi dakhaiho rikhai-a buwo.” Daiolouzü puh nahpoutu Shelah-a puh jürai mai büa thaire Judah nou ngaopi loure. Südonou Tamar sü lah puh puo ki hi dakhai tare.

¹² Teile jütou thaisü, Judah chapfüa thaitare alia puhnou dopfüyu teile cheyu thai, puhsa Adullam puona Hirah koa puhvei zhaotumai saiyu buh Timnah hisü hotare.

¹³ Mai kamai-a nou Tamar hisü paore, “Ne paoh-a zhaotumai saire donou Timnah hi talai toue.”

¹⁴ Tamar nou rikhai maivei sabanü laolaiwua pahosah nou pah holoua Timnah hi taloure ludu hi buyu Enaim nuhdu robomü hinou chobua buloure, daiolouzü Shelah hai khepare touyu puhnou süwe, ana puhye sü panou honaki vemo hie.

¹⁵ Judah nou honapaiye zhingaolou khaie, puh hai pahosa nou hoa buyu thaifüa khakhapfü phare tea choloure.

¹⁶ Judah nou nghiki takou loua “Muh kizho polai?” tea noure, daiolouzü honapai hai puh tyao Tamar-e touyu puhnou sümoe. Naotupai nou paoe, “Koa züyu muh ne dai peilai?”

¹⁷ Puhnou chila peie, “Enou neye nghitu ali seive peilai.” Honapai nou paoe, “Süsü aetouwe, ana nenou nghitu seive peimojü, Eye dainou banda khai peilai?”

¹⁸ Puhnou paoe, “E neye dai nanou banda-a khai peilai?” Puhnou chila peie, “Nevei bahtoukha ae sünavei rai alia ne bah hinou buyu süpo haitao khaipeio.” Sütaosü puhnou honapai hisü peire, süthaisü puhai koa züre, alia honapai nou nahmai hrüloure.

¹⁹ Süthaisü Tamar nou lah kihi dakhai veloua pahosa nasü laolaiwua rikhai maivei sabanü bahnao loure.

²⁰ Judah nou nghitu panou poloua puhvei natao sü naotupai hinou lukhai loure donou puhnou puhsa Hirahye seitare, ana honapaiye sü phouhare.

²¹ Puhnou Enaim nuh mai hi noue, “Khakhapfü dupe haihi buyu nasü daiki vetare?” “Haihi khakhapfü mailia hae” tea chila peire.

²² Südonou puhnou dakhai ve Judah hisü paoe, “Naotupaiye sü phouhare, alia nuh sühi buyu mainou haihi khakhapfü mailia hae tea paowe.”

²³ Judah nou paoe, “Pailaio, natao sü panou puhye polo. Mainou sülou louzü ahaiye konü shulai. Enou puhye peire donou nghitu seitae, ana nenou honapaiye phouhare, daisou loulai.”

²⁴ Khouh asü thaisü, mainou Judah hisü paore, “Ne mou Tamar sü khakha-a nahmai hrüloure she.” Judah nou “Puhye vakou daopa loua mei deithawo” tea paore.

²⁵ Puhye sükua vakou daopayu phaki honapai nou puh paoh hisü “Esü na haitao vei paopu nah hrüwe. Na haitao hai thaoveie touyu zhutou touloua shilo - bahtoukha, sünavei rai alia süpo haitao hai” tea chi paosei tare.

²⁶ Judah nou sütaosü puhveie tea sheeloure alia puhnou paoe, “Honapai-a ajünou kaore, daiolouzü Enou honapaiye anah poutu Shelah ki khaipei more.” Alia puhnou süthaisü honapaiye sazüpu more.

²⁷ Honapai nou nah nare teile veyu phaki puh sü nahbei nalai touyu süloure.

²⁸ Nah nakouyu phaki nahtou ali bahsü vakou thaipare, alia nah sa-a napeiyu painou nahtou süna baosü pharai aho alinou khiloua “Haina nou naraie” toure.

²⁹ Ana nahtou nasü khaidakhe loure, sükua puh thaihou nou nakou rai loure. Süthaisü nah sa-a napeiyu painou paoe, “Ne haibüa nebo pfüphe kouhloue” südonou puh zhih sü Perez (pfüphe louyu) tea sapeie.

³⁰ Süthainou puh jürai nasü bah hi pharai horayu ali khipfüa nakoure, südonou puh zhih sü Zerah tea sapeie.