SHURAI 33 - SHEEYU BAIBEL (BSI)

Jakob nou Esau ye Ve Daoyu

¹ Jakob nou puh pa pfüa lapa zhukhaie Esau sü puhmai kaihdai tao sa-a takouyu zhingaore. Südonou puhnou puhnah maitaoye sü Leah, Rachel ae qilapai ahai hi zhipeire.

² Puhnou qilapai ahai ae puhai nahmaitaoye sü poa palo khailoue. Süthaina hisü Leah ae puhnah maitao alia Rachel ae Josef ye süthailo akhai hi khailoure.

³ Puhnou puletao jünou raia tapoa puh jürai nghiki takou loumo koute deiphi peipfüa nakouloua avu anai khurüe.

⁴ Ana Esau nou takou puhye te hinou kholoua münou teire, alia puhai maihai kheinou krare.

⁵ Esau nou naotu maitao ae nahmaitao zhingao loukhaie puhnou noue, “Neye koa salaiyu mai haitao hai thaoe?” Jakob nou paoe, “Ramai nou leshi shoa ne kilai Eye peikhai touyu nahmaitaoe.”

⁶ Süthaisü qilapai ahai ae puhai nahmaitao takouloua peipfü nakou khurüe.

⁷ Sübüa Leah ae puhnah maitao alia kou akhai hisü Josef ae Rachel nou takou peipfü nakou loua khurüwe.

⁸ Esau nou paoe, “Me taoli raia Eye takou daoyu taosü daisou mai khaie?” Jakob nou chila peie, “Ajürai nou Eye leshi zhuvea peire donou souwe.”

⁹ Ana Esau nou paoe, “Athaihouna, avei-a alao bue, lah nevei taosü poa ne hi khailoua baio.”

¹⁰ Jakob nou paoe, “Moe, nenou Eye zhuvea leshiwe toulouzü Enou peiyu natao popeio. Cheche vuzünou ne zhuh ngaolouyu hai Ramai zhuh ngaolouyu khihaore, nenou Eye haizhou koute zhuvea leshi peie.

¹¹ Enou neye donou poveyu sapeina haitao hai popeio, daiolouzü Ramai nou Eye leshi shopeia kini alao peie.” Jakob nou paokhai khaiyu vanou Esau nou ae tea peikhai touyu natao sü poloure.

¹² Süthaisü Esau nou paoe, “Etao veidu tashu laikhe. Enou nejü raia tapeilai.”

¹³ Jakob nou puh hi chila peie, “Ajüraina, nenou süwe süolouzü nahmai hai khouko hae, ae kikhaorütao donou E tsüchomo louhoe. Haitao hai teithe likhia tha-a hutapei louzü teitei nou thaikhai bailai.

¹⁴ Ne ajü raia tabaio, E-a thalou süsa tha-a kikhaorütao ae nahmaitao sa-a nenou buyu Edom hisü veloumo koute talai.”

¹⁵ Esau nou paoe, “Sütoulouzü avei mai taoli ne hi khaipei laiho?” Ana Jakob nou chila peie, “Sükumoa veie, ajürai nou Eye zhuvea leshi peina likhei jüpa baie.”

¹⁶ Südonou Esau nou süzhou teithe nou Seir tea kuyu Edom hi khaitare.

¹⁷ Ana Jakob nou Sukkoth hi talou sühinou ki soupaloua puhvei kikhaorütao panou bailoue. Südonou buh sünasü Sukkoth tea zhih saloue.

¹⁸ Puhnou Paddan-aram hinou tapoa Kanaan maivei teidei Shekem nuhdu hi kaozhou ashi daomoa veteloue alia nuhdu sünaphi dou ali hinou sahpao haoloua bure.

¹⁹ Puhnou dou sünasü Shekem puo Hamor tyaonah mai hinou sha kaihli peia hüloue.

²⁰ Puhnou buh sühinou sheelabuh ali soupaloue, ae sünasü El-Elohe Israel (Israel maivei Ramai) tea kuloue.