SHURAI 31 - SHEEYU BAIBEL (BSI)

Jakob nou Laban hinou Tutayu

¹ Laban nahpoutu taonou haibüa pha-a buyu Jakob nou süloure: “Jakob nou Etao puo vei kini teitei poloure alia puhvei kini teitei hai Epuo hinou ngaoloua baie.”

² Ae Laban-a raichoki büa puhye leshi moyu hai Jakob nou zhingao loure.

³ Süthaisü Mapao nou Jakob hi paoe, “Ne nepuo nuh hi ae ne kikha mai hi dakhai tawo, Enou neye koa salai peilai.”

⁴ Südonou Jakob nou Rachel ae Leahye sü puhnou zhaotu ae nghitu khome khaibuh hi kusa-a veloure.

⁵ Alia puhnou puhai hisü paoe, “Nehai puo Laban hai raichoki büa Eye leshi moyu Enou zhingaoloure, ana apuo vei Ramai nou Eye koa salai peiwe.

⁶ Akhouko veishi nou poa E nehai puo kuvah soupeie touyu nehai-a süwe.

⁷ Sütou khai-a nehai puo nou Eye la-a nou avei zhosü avu kirou poa soudalai peie, ana puhye panou Eye soushiwure hai Ramai nou ae toupei moe.

⁸ Puhnou kikhaorü chadaoyu teitei nevei zho soulo” tea paokhaie, khome teitei nou chadao pfüre. Puhnou “Chah vaivai souyu teitei nevei soulo” tea paokhaie, khome teitei nou chah vaivai pfükhai toure.

⁹ Sükua Ramai nou nehai puo vei kikhaorü teitei sü poloua Eye peie.

¹⁰ “Kikhaorü taonou pyayu teile phaki Enou zhiho mekou nou nghitu de pyayu teitei sü chah daopfüyu, vaivai souyu ae chah dousasayu khaikho nou zhingao.

¹¹ Süphaki Mapao vei rakivamai nou Eye ‘Jakob’ tea kuwe. Enou ‘Oe! E haihi bue’ tea khepeie.

¹² Ae puhnou paoe, ‘Nepei pfüla loua zhukhaio, nghitu pyayu teitei sü vaivai souwe, chah daopfüwe, alia chah daosasawe; daiolouzü Laban nou ne hi souyu veishi Enou ngaoloure.

¹³ E hai neye Bethel hinou kouh zhu ngaopeiyu Ramai, nenou buh sühinou chaachou souloua chuh ali theadzü naloua shukhai touyu nasüe. Südonou chuo kusholoua buh haina thaowua lah ne nabuh hi khaitawo.’ ”

¹⁴ Rachel ae Leah nou puh hisü chila peie, “Ahai nou Epuo ki hinou ngaoloure moa kikaa thaolaiyu daie bue?

¹⁵ Puhnou ahai-a shetumai ali büa chopei baimowu? Puhnou ahaiye zholoure, ae süna vei muh-a poa touloure.

¹⁶ Ramai nou Epuo hinou poa tayu kini veishi Etao vei baie, alia Etao nahmai vei baie. Südonou chuo Ramai nou ne hi dai paowe süsü soulo.”

¹⁷ Südonou Jakob nou na tuloua ae puh chapfü ahai ae puhnah maitaoye sü saloua racho phaohi popa khailoure.

¹⁸ Alia puhvei kikhaorü teitei huloua Paddan-aram nuh hinou puh puo Isaak vei nuh Kanaan hi holai tea tare.

¹⁹ Laban nou zhaotumai sailai tea tare, alia sübüa puh puo ha-a bukinou Rachel nou puh puo vei kikha hi khaiyu bashara nasü vaoloure.

²⁰ Ae Jakob nou puh talaire touyu hai Aramean puona Laban ye panou sümoa tuchü tare.

²¹ Puhvei buyu na veishi poloua tha-a tutare, ae puhnou Euphratis rei kacholoua Gilead deichi hilo taopa laire tea bure.

Laban nou Jakob ye Thaihu Tayu

²² Teithe asü thainou Jakob hai tutare tea Laban hi ve paopeie.

²³ Puhnou puhvei maitao saloua Jakob ye thaihu tae, alia teithe anai zhounou kou Gilead deichitao nuh hinou khe thai ngouloue.

²⁴ Ana Ramai nou Aramean puona Laban hi süzhou khei zhiho mekou nou ve “Ne Jakob hi chishi lia paolai moe touyu sülo” tea paore.

²⁵ Jakob nou deichi hinou sahpao haoloua bure alia Laban-a puhvei maitao koa Gilead deichi nuh hinou fühao souloua bure.

²⁶ Laban nou Jakob hi paoe, “Ne daisou nou Eye laloua ae anah naotupai ahaiye sü reih hinou nüpoa tayu mai büa satawe?

²⁷ Daivanou ne Eye lawe ae ahi paomoa khi-a tutawe? Nenou ahi paosüa tayu thaio nevei ludu hisü sa-a ralea soupoa lou soua toubvü da-a ae shabe houpoa paota peilou veie.

²⁸ Ne daidonou haibüa panou Eye anahpai ahai hisü ae atyao maitao hisü ratalai chi ali-a paolou mowe? Haibüa souyu haisü voyu vah baie.

²⁹ Enou neye soushi peilou süyu khouko abah hi bue, ana dokhei nepuo vei Ramai nou ahi ve haibüa paore, ‘Ne Jakob hi chilashi lia paolai moe touyu sülo.’

³⁰ Ne nepuo ki hi venü shoyu donou haibüa tutare touyu Enou süwe, ana ne dai sounou avei kikhahi khaitouyu bashara nasü potage?”

³¹ Jakob nou Laban hi haibüa chila peie, “Enou ngaopi loure, daiolouzü nenou ahi nou ne nahpai ahaiye sü saolou shulai tea choloure.

³² Ana mai tarali hinou nevei bashara nasü ngaolouyu thaio, puhye sü panou hrilai moe. Avei maitao nghoujü nou nevei na taralia bulouzü polo.” Rachel nou bashara nasü vaoloure touyu hai Jakob nou sümoe.

³³ Laban nou Jakob vei sahpao hi, Leah vei sahpao hi ae qilapai ahai vei sahpao hi talou phoure, ana puhnou halia ngaolou moe. Süthaisü puhnou Rachel vei sahpao hi talou zhure.

³⁴ Rachel nou bashara nasü poa rachophao khaiyu lekhabvü hi thouloua süna pei hinou chobu loure. Laban nou sahpao teitei hi phoutae ana puhnou ngaolou moe.

³⁵ Rachel nou puh puo hisü “E khouh khouh vei zhe tayu teile velouyu donou kushu lalou shire, apuo ne vamoyu soupeiso” tea paoloure. Laban nou kikha veishi phouyuma bashara nasü ngaolou more.

³⁶ Süthaisü Jakob nou rarou loure alia Laban hisü haibüa paoe, “Enou thaovei bayu soure? Daimah soupeia ne athai hutawe?

³⁷ Nenou avei na veishi phoure ana nevei na daili ngaoloue? Nevei maitao ae amaitao nghoujü popakhaio, puletaoye panou ahai kohi thaonou kaoyu chiku peilai.

³⁸ Enou ne hi buyu hai po kai pare, nevei zhaotu ae nghitu teutu toupei bamoe, alia Enou nevei zhaokhome hinou zhaotu ali koute-a toulou moe.

³⁹ Rekhaona nou nütou louyuma süna thaosü ne hi paomoa Enou khapeiwe. Heaki nou moa kheinou hatayu hai-a süna thaosü Enou khapeiwe.

⁴⁰ Enou veashoa teile poulo hai heaki teinai dei-a ae kheiki seithoua zhithou louhoyu nou teile asoloe.

⁴¹ Sükua Enou po kai hai ne hi bue. Po kiadai sü ne nahpai ahaiye naloure donou ne kuvah soue, ae po arou sü nevei kikhaorü khoe. Enou sübüa ne vah soupeiyu avei vahshih hai avu kirou nenou podakou podakhe peie.

⁴² Hakinou apuo Ramai, Abraham ae Isaak Ramai nou Eye koa salai peimoyu thaio, nenou Eye raichoki nou bah sakhaia seita peilaire. Ana Ramai nou avei veayu ae Enou vah souyu süpeia dokhei neye tukha peie.”

Jakob ae Laban nou Ae-ao tea Chiphade Louyu

⁴³ Süthaisü Laban nou Jakob hi chila peie, “Nah naotu khesü anah-e, puletao nahmai khesü aveie, kikhaorü khome taosü aveie, alia nenou zhingaoa buyu hai teitei-a aveie. Ana Enou zhou anahpai ahai ae puhai nou napei khaitouyu nahmaitao ye sa-a dakhai loure donou halia soulou hore.

⁴⁴ Südonou chuo ahai kohi chaachou ali souloua baishe, ae süsü panou ahai kohi shakhi ali soua bulou laikhe.”

⁴⁵ Südonou Jakob nou chuh ali licholoure donou shohla loure.

⁴⁶ Ae puhnou puhvei maitao hisü “Chuh pove haihi jükhaio” tea kharochi peie. Puletao nou chuh pove khopa khailoue alia süna pehao hinou puletao nou tovai ali vaizho loue.

⁴⁷ Laban nou buh sünasü Jegar-sahadutha (Licho loure chukho) tea kuloue, ana Jakob nou sünasü Galead tea zhih saloue.

⁴⁸ Laban nou paoe, “Chukho haina nou ahai kohi shaki soulai.” Südonou buh hainasü puhnou Galead,

⁴⁹ alia Mizpah chuh tea kuloue, daiolouzü Laban nou paoe, “Ahai nou tarata-a buyuma Mapao nou zhua bue.

⁵⁰ Hakinou nenou anahpai ahaiye souvea louzü mokhaia nenou naotu kukhe liye nalouzü, Enou ngaomoyuma Ramai nou neye zhingaoa bue touyu licholo.”

⁵¹ Laban nou Jakob hi paoe, “Enou ahai kohi khokhai touyu chukho ae chuh shohla khaitouyu nasü zhukhaio.

⁵² Chukho ae chuh shohkhai touyu haina nou ahai kohi shakie. Enou chukho haina talakou neye dailai moe, alia ne-a chukho haina jünou talapa Eye daiso.

⁵³ Abraham Ramai, ae Nahor Ramai ye panou ahai kohi chikulai.” Süthaisü Jakob nou puh puo Isaak nou thoyu Ramai zhih sa-a chou peie.

⁵⁴ Süthaisü puhnou hrikhaona ali dathaloua deichi hinou poa sheelae, ae puhvei maitao kuloua vaizhoe. Alia puletao nou hatou louyu thai, süzhou kheisü deichi sünahi bure.

⁵⁵ Thainesho shohna sü Laban nou shuloua puh tyaomaitao ae puh nahpai ahaiye sü münou mupeie alia hapeire, ae süthaisü puhnou kilova dakhai vere donou buh sühinou puletao sü ratare.