SHURAI 29 - SHEEYU BAIBEL (BSI)

Jakob nou Laban Ki hi Veyu

¹ Süthaisü Jakob nou puhvei veidu nasü tapoa teinghi palo mai deihi hore.

² Puhnou tapoa kouyu phaki, dou pe hinou dzükhao ali bua süna nghiki sü zhaokhome asü buyu puhnou zhingaoe. Dzükhao süna hinou zhaotuye dzü peiwe alia süna mü hisü chuh duli nou hokhai toue.

³ Zhaokhome teitei vejü louyu thainou, zhaokho mainou chuh nasü dzükhao mü hinou houpeia panou zhaotu khesü dzü kelouwe, sükua kelou cheyu thaisü chuh nasü podakhai thou mü hokhai baiwe.

⁴ Jakob nou zhaokho maitao hi noue, “Samai taore, neletao daiki nou vewe?” Puletao nou “Haran hinou ve-e” tea chila peie.

⁵ Puhnou puletao hisü “Neletao Nahor nahpoutu Laban ye sühomoe?” tea noue. Puletao nou “Süwe” tea chila peie.

⁶ Puhnou puletao hisü paoe, “Puhsü vei-a buho moge?” alia puletao nou “Vei-a bue, alia zhukhaio puh nahpai Rachel-a zhaotu hupoa laire” tea paoe.

⁷ Jakob nou paoe, “Chusü hea baihie, zhaotu taoye hupoa ve hi thouyu teile mohie, panou dzü keloua pou tourao.”

⁸ Ana puletao nou paoe, “Zhaokhome teitei nou haihi vejülou mojü ae chuh nasü houpalou mojü soulou shie, sübüyu thainou zhaotu khesü panou dzü kelai.”

⁹ Jakob nou chipao-a bukinou Rachel sü puh puo vei zhaokhome hupoa dzükhao hisü koure.

¹⁰ Jakob nou puh pfü pou Laban nahpai Rachel ae puh pfü pou Laban vei zhaokhome ngaolou khaie, puhnou takou dzükhao mü hi khakhai touyu chuh nasü houpawua puh pfüpou Laban vei zhaotu khesü panou dzü keloure.

¹¹ Süthaisü Jakob nou Rachel ye münou teiloua shusoua krare.

¹² Puhnou Rachel hisü “E nepuo kikha maie, Rebeka nahpoutu” tea paopeie. Alia sühinou Rachel nou tuve puh puo hi paopeie.

¹³ Laban nou puh tupai nahpoutu Jakob ko sü süloukhaie, puhnou tuho puhye daolai tea tare, puhye ve kholoua münou teiloua puh ki hi save loure. Jakob nou vepayu ko veishi Laban hi paongao peie.

¹⁴ Laban nou puh hi paoe, “Ovai, cheche vuzüa ne sü avei kezhe ali baie.” Jakob nou sühi khouh ali bue.

Jakob nou Rachel ae Leah Naloure donou Laban Vah Souyu

¹⁵ Süthaisü Laban nou Jakob hi paoe, “Ne akityarai mailie teanou hamako nou avah soupeilou hoe. Paokhaio ne zho kazhou polai?”

¹⁶ Laban hai nahnaotu ahai bue, atsüpai nou Leah ae nahnapai nou Rachel tea kuwe.

¹⁷ Leah nghithou hai nghirei-e, ana Rachel nou zhurao-a vei-e ae hüa hüveisho-e.

¹⁸ Jakob nou Rachelye leshie, südonou puhnou paoe, “Eye panou Rachelye nalai toulouzü ne vah po anai soupeilai.”

¹⁹ Laban nou chila peie, “Mai kukheli ki khaipeiyu jüo ne hi peiyu-a veipu hie; Ahi koa buwo.”

²⁰ Südonou Jakob nou Rachelye naloure donou po anai vah souwe, ae süsü puhye donou teile jüta büa baie, daiolouzü puhnou honapaiye leshie.

²¹ Süthaisü Jakob nou Laban hi paoe, “Teile sü chuo chere, ne nahpaiye sü ahi peio.”

²² Südonou Laban nou mai hrülaiye kuloua tovai ali vaipeie.

²³ Ana süzhou kheisü Laban nou puh nahpai Rachel thao Leahye nou saloua Jakob ye pei baire, ae Jakob nou Leah sü puh chapfü soua poloure.

²⁴ (Laban nou puh qilapai Zilpah hai puh nahpai Leah hi panou puh vah soukhare donou peie.)

²⁵ Thainesho shohna sü Jakob nou Leah baire touyu süloua Laban hi tave paoe, “Ne daisou haibüa ahi souwe? Rachelye nare donou E nevah soumowu? Ne daisou nou Eye lawe?”

²⁶ Laban nou chila peie, “E nuh haihi vei zhai nou anapai nou tsüpai jünou nghita raiyu zhaimoe.

²⁷ Zhouvu shanghi souyu vei nüh haina hapta panou cheraio, süthaisü nenou pudakhai po anai avah soupeilai toulouzü Rachel-a neye peilai.”

²⁸ Jakob nou süsü aetoure, alia shinghiyu nüh nüche loukhaie, Laban nou puh nahpai Rachel-a puh chapfü soure donou puh hi peiwure.

²⁹ Laban nou puh qilapai Bilha hai puh nahpai Rachel hi peie.

³⁰ Südonou Jakob nou Rachel-a puh chapfü soua poloure, alia puhnou Leah jünou Rachelye leshipu hie. Süthaisü puhnou po anai dakhai Laban vah soue.

Jakob Nahmaitao

³¹ Leahye leshi peimore touyu Ramai nou ngaoloua Leah panou nahmai hrüloue, ana Rachelye sü panou nahapfü soure.

³² Leah nou nahmai hrüloua nahpoutu ali naloue, alia puh zhih sü Reuben tea saloue, daiolouzü honapai nou paoe, “Mapao nou avei veayu sü zhupeie, chuo akhapu nou Eye leshi peishulai.”

³³ Leah nou nahmai hrüda khailoua nahpoutu ali naloue. Puhnou paoe, “Eye leshi peimoe touyu Mapao nou ngaoloua nahpoutu haina-a puhnou Eye peie.” Südonou puh zhih sü Simeon tea saloue.

³⁴ Pua dakhai Leah nou nahmai hrüloua nahpoutu ali naloue. Puhnou paoe, “Chuo achimai nou ahi nghipu shulai, daiolouzü Enou puhye nahpoutu asü napeire.” Südonou puh zhih sü Levi tea sapeie.

³⁵ Haithai-a dakhai nah hrüloua nahpoutuli naloue. Puhnou paoe, “Zhouvuo Enou Ramai ye paosholai.” Südonou honapai nou puh zhih sü Judah tea sapeie. Süthaisü honapai nou nahmai napu more.