SHURAI 2 - SHEEYU BAIBEL (BSI)

¹ Sübüa tei ae deiphao alia sühi buyu ha teitei nou souchere.

² Alia teithe anai zhousü Puhnou soure souchewua soupu moa asore.

³ Alia Ramai nou teithe anai nasü shiha peie alia soushee peie daiolouzü süzhou teithe hai teideiphao souchewure.

⁴ Raki ae deiphao soushurai ko sü haitaoe. Ramai Mapao nou teideiphao souyu kisü,

Eden Kipei

⁵ deiphao hi süübe hrümo hie ae vupou paopa mohie- daiolouzü Ramai Mapao nou deiphao hi panou teirü koumo hie ae dei nasü mailinoua tahpeire hahie;

⁶ ana deikhe hinou dzü paloua teirü kouhpeie.

⁷ Süthaisü Ramai Mapao nou dei hinou nai poloua maiye soupeie, alia puh nghou qulu hisü ahri ssü houthou peie ae sübüa maisü hrikhaona ali souloue.

⁸ Alia Ramai Mapao nou teinghi palo Eden hi kipei ali soukhai peie; ae puhnou soukhai touyu mai nasü sühi pove khaipeie.

⁹ Ramai Mapao nou ngaovei shoyu ae touvei shoyu rashibe tya tyali hai dei hinou panou paopa loue. Ahri süübe ae aveih ashi sükulouyu süübe hai kipei toutsü hisü bue.

¹⁰ Rei ali Eden kipei hinou kipei dzü züloure donou küpa peie, alia sühinou rei adai soua küratae.

¹¹ Rei araina zhih hai Pishon toue; alia sünanou Havilah dei teitei hi kütawe;

¹² ae dei süna hisü sana, mutei chuh, dellium ae onyx haitya-a bue.

¹³ Rei ahai chena zhihsü Gihon toue; hainanou Kush teidei teitei kühaowe.

¹⁴ Rei asü chena zhih hai Tigris touwe; haina hai Assiria teinghi palo kütawe. Alia adai chenasü Euphrat touwe.

¹⁵ Ramai Mapao nou mai naye sü Eden kipei hi panou tah tahtoua ae khopeire donou sühi poa khai peie.

¹⁶ Süthaisü Ramai Mapao nou mai hisü kharochi peia paoe, “Kipei hi süübe buyu tarali hinoua nenou rashi tounü nasü toua bailai;

¹⁷ ana aveih ashi sükuloure süübe nahisü nenou rashi haitou laimoe, süna toulouyu teithe nou ne thai bailai.”

¹⁸ Süthaisü Ramai Mapao nou “Maina hai puh likhu buyu veimore, südonou puhye donou thaobüyu soukha peire mai ali Enou soupeilai” tea paore.

¹⁹ Sükua dei hinou nai poloua soukhaona ae teihi raohou khemai souloua sütaoye panou zhih sapeire donou maina hi pove khaipeie, alia hrikhaona taoye mai nanou zhih sapeiyu nasü süna zhih soure.

²⁰ Sükua mai nanou kikhaorü, teihi raohou ae resou khaona hrülai zhih hai sapeie; ana sütao hinou puhye donou thaobüa soukha peiloure ngaolou moe.

²¹ Süthaisü Ramai Mapao nou mai nasü panou zhai shishoa zhiloure ae puhnou zhia buyu kinou puhvei turao ali phaloua süna thaosü vasou nou pothou hopeire.

²² Alia mai nahinou popa louyu turao nou Ramai Mapao nou naotumai ali souloua sünapai sü mai nahi pove khaipeie.

²³ Süthaisü mai nanou paoe, “Haisü rao-a araoe ae vasou-a ava soue; Puhsü naotumai tea kulai daiolouzü puhsü maina hinou popaloua baie.”

²⁴ Südonou maina nou lah puh pfüpuoye thaowua puh chapfü hi ve hrütawe ae sübüa puhaisü vahsou ali soutae.

²⁵ Alia poutuna ae naotupai haisü baitoua bubaie, ana puh haisü hao moe.