SHURAI 18 - SHEEYU BAIBEL (BSI)

Nahpoutu Ali Abraham hi Paohpeiyu

¹ Hea teinai soushoyu hi Abraham nou puhvei sahpao kikhu hinou buyu phaki Mapao nou puhye Mamre hi sheeyu phüsüübe pehao hinou ve daoe.

² Puhnou pei pfüa lakhe zhukhaie, puh nghoujü hinou mai asü la-a buyu zhingaoe. Puhnou puletaoye zhingao loukhaie puletaoye daolai tea tukoure alia deiphi nakouloua,

³ puhnou paoe, “A paopuwo, neletao nou Eye zhuveawe toulouzü aki hi talou chaomoa talata peiso. Neletaoye sheba soupeire donou E haihi bue.

⁴ Neletao phi khüloure donou Enou dzü chita popa peilai, alia süübe haina phinou solowo.

⁵ Eye panou touso chita popa peilo, sübüa panou neletao vei veidu takoupu loure hie chahri-a taloure donou, daiolouzü neletao nou Eye tsükhoua ne kilai aki hi tave loupeie.” Puletao nou chila peie, “Kalo shore, nenou paoyu nasü Etao-a ae toue.”

⁶ Abraham nou thala soua sahpao hi talou Sarah hisü paoe, “Sou veitei tyanou poloua raokhao chita khaokhaio.”

⁷ Süthaisü puhnou zhaokhome hi tuve zhaotu hrübo veiyu ali poloua puh kilai maili hi tha-a vathou khokhaio tea peie.

⁸ Puhnou chonaodzü alia khokhai touyu zhaotu sou poloua puletao hi popa khaipeie. Puletao nou hatoua buyu phaki puhnou süübe süna pe hinou la-a puletaoye vah soupeia bue.

⁹ Süthaisü puletao nou puh hi noue, “Ne chapfü Sarah daiki bue?” “Puh sahpao hi bue” tea puhnou chila peie.

¹⁰ Puletao hi maili nou paoe, “Enou ne hi khouh akü thaisü dakhai vepulai, alia süphaki ne chapfü Sarah nou nahpoutu ali naloulai.” Süphaki Sarah hai puh thailo nou sahpao kikhu hinou pai kei-a bue.

¹¹ Chuo Abraham ae Sarah hai chipai chipao loure alia Sarah nou khouh khouh ta-a buyu zhe nasüa tamore.

¹² Südonou Sarah nou lah nüa “Achapu sü chipaore alia E-a chipaire, sükuyu thai-a kabüa Esü puh koa sabu-sazüyu vakhai laihiwu?”

¹³ Süthaisü Mapao nou Abraham hi paoe, “Daisouyu donou Sarah hai jünüa ‘E chipaiyu thainou kabüa nahmai ngaokhai laige’ tea paowe?

¹⁴ Ramai ye donou daie tateiyu buge? Khouh akü thai Enou ne hi dakhai ve vuzülai, alia sükisü Sarah nou nahpoutu ali naloulai.”

¹⁵ Ana Sarah nou ngaopiyu donou, “E nümoe” tea veiwure. Puh nou paoe, “Ne dai nümo khailai, ne nüwe.”

Abraham nou Sodom donou Paokhayu

¹⁶ Süthaisü puletao nou buh sühinou tapoa Sodom zhingaoyu buh ali hi takoure, alia Abraham nou puletaoye paosa-a tapeie.

¹⁷ Mapao nou lah puh hi haibüa paoe, “Enou daie soulai touyu nasü Abraham hinou pokukhai laimoe.

¹⁸ Abraham vei tounahtao hai dushoyu ae khoushoyu tyahrü ali soulai alia puh vanou tyahrü teiteiye Enou shiha peilai.

¹⁹ Enou puhye dolouyu hai puhye panou puh nah maitao ae puh tyaonahtao hi acheche ae kaozü vah soua Enou paoyu chi züloure donoue. Puletao nou sübüa souloure toulouzü, Enou Abraham hi paokhai touyu teitei sü souche peilai.”

²⁰ Süthaisü Mapao nou Abraham hi paoe, “Sodom ae Gomorrah hi pai keishi shoyu alao bure ae puletao mah hai dushore.

²¹ Enou süa buyu pai haitao hai checheho dawusa touyu takou zhulai hie.”

²² Süthaisü mai ahai sü buh sühinou Sodom hilo taho tare; ana Abraham nou sükia Mapao nghoujü hinou la-a buhie.

²³ Süthaisü Abraham nou Mapao nghiki takouloua noue, “Newo cheche vuzünou acheche mai-a mahmai koa souha bailaiwu?

²⁴ Phalisü nuhdu sühi acheche mai raingou bulouzü, acheche mai raingou vanou nuhdu sünasü khailu peimoa souha bailaiwu?

²⁵ Mahmai ye koa acheche mai-a souhayu, acheche maiye mahmai hi chothou zhopeiyu, haibüyu vahso hai ne hinou doushoa panou bulowo. Deiphao teitei hi Chikuapeio nanou kaozü hinou kupei laimowu?”

²⁶ Mapao nou paoe, “Sodom nuhdu hinou acheche mai raingou bua ngaolouyu thaio, puletao mai raingou vanou Enou nuhdu nasü khailu peilai.”

²⁷ Abraham nou paopue, “E hai hazholia moyu vonai ae naihü baie, ana chua Mapaowo E ne hi chi paopu laihie.

²⁸ Phalisü acheche mai raingou pare hi mai angou chemore toulouzü, mai angou chemoyu donou nuhdu sünasü souha bailaiwu?” Mapao nou chila peie, “Enou nuhdu süna hi mai raidaingou ngaolouyu thaio souha laimoe.”

²⁹ Abraham nou paopue, “Phalisü mai raidai ngaoloua baire toulouzü kakulai?” Puhnou chila peie, “Mai raidai buyu vanou Enou nuhdu nasü souha laimoe.”

³⁰ Süthaia Abraham nou paoe, “Oh Mapaowo! Eye rarou peiso, E chua chi paopu laihie, hakinou nuhdu sühi mai shirou ngaoloua baire toulouzü ne daisoulai?” Puhnou chila peie, “Mai shirou ngaolouyu thaio mai sütao vanou Enou nuhdu sünasü souha laimoe.”

³¹ Süthaia Abraham nou paoe, “Oh Mapaowo! Nehi khuvei shoa chipaoyuma Ahi vamoyu soupeiso. Hakinou mai kai litou ngaoloua baiyu thaio kabülai?” Puhnou paoe, “Mai kaitao donou Enou nuhdu nasü souha laimoe.”

³² Abraham nou paoe, “Oh Mapao! pua E chili paopu laihie, vamoyu soupeiso. Hakinou sühi mai kirou likhei ngaoloua baire toulouzü kabülai?” Mapao nou chila peie, “Mai kirou vanou Enou nuhdu sünasü souha laimoe.”

³³ Mapao nou Abraham hi chi paocheyu thai puhsü tare alia Abraham-a lah ki hi dakhai vere.