SHURAI 17 - SHEEYU BAIBEL (BSI)

Vo Souyu Shee Soua Heerodeyu

¹ Abram nou po raiküakü payu phaki, Mapao nou puh hi zhu ngaopeia puh hisü paoe, “E hai Khoukhoulai Ramai nasüe. Achi zülo alia teisa nou kaozü nasü soulo.

² Enou ahai koa vo ali soupeilai, alia neye tounah alao peilai.”

³ Süthaisü Abram nou pei pfüna kouloure ae Ramai nou puh hi paoe,

⁴ “Zhukhaio, Enou ne hi vo haina hai souwe, süolouzü neye panou tyahrü alao vei puo soulai.

⁵ Ne zhih hai Abram tea kupu khailai moe, ana chuthai nou ne zhih sü Abraham tea kulai, daiolouzü Enou neye panou tyahrü alao vei puo soulai.

⁶ Enou ne hi tounah alao peilai, ae neva hinou tyahrü alao panou palai, alia ne hinou vemai palai.

⁷ “Ahai koa vo soukhai touyu nahai, ne hi alia ne thailo nou vere nevei tyaosholea hi koute panou teisa vei soua khailai. E hai nevei alia ne thailo nou velai ne tyaonah maitao vei Ramai soulai.

⁸ Chuchu nenou vakou mai ali soua buyu dei haina alia Kanaan teidei teitei ne hi alia ne tounahtao hi teisa vei panou soure donou peilai, alia E hai puletao vei Ramai Mapao soulai.”

⁹ Ramai nou Abraham hisü paoe, “Ne alia ne thailo nou vere ne tounah hrülai nou avei vo haina hai züvu zülai.

¹⁰ Haihai ne ae ne tounahtao nou züvu zülaiyu avei vo nasüe: Neletao poutumai hrülai nou heerodelai.

¹¹ Neletao vei hee rodelai alia haina nou ahai ko hi vo soukhai touyu shee soulai.

¹² Teithe acha payu nahpoutu hrülai, nevei kikha hinou nayu qila mai-a, mokhaia vakou mai hinou hülouyu mai hrülai nou heerodelai.

¹³ Ne ki hinou nalouyu moa vakou nou hülouyu qila mai hrülai nou heerode khailai. Haina nou teisa vei shee soua vasou hinou Enou vo soukhai touyu nasüe.

¹⁴ Herode moyu poutumai taraliye sü puhvei maitao hinou hulailai, daiolouzü puhnou avei vo soukhai touyu nahai zübare.”

¹⁵ Ramai nou Abraham hi paoe, “Ne chapfü zhih sü Sarai tea kupu laimore, chuthai nou puh zhih sü Sarah tea kutalai.

¹⁶ Enou puhye shiha peilai alia puh hinou nahpoutu ali ne hi peilai. Enou puhye shiha peilai alia puhye sü panou tyahrü khemai vei pfü soulai, alia puh hinou vemai hrükoulai.”

¹⁷ Süthaisü Abraham nou pei pfüna kouloua nüre ae puh lah haibüa tsüchoe, “Po kaih payu mai ali hinou nahmai hrülousü hiwu? Alia po raikü payu Sarah nou nahmai nalousü hiwu?”

¹⁸ Abraham nou Ramai hi paoe, “Ishmael panou akikaa thaoloua baio.”

¹⁹ Ramai nou paoe, “Moe, ne chapfü Sarah hinou nahpoutu ali ne hi peilai, alia puh zhih sü Isaak tea salo. Avei vo nahai puh hi ae puhvei tyaonah hrülai hi teisa vei soua khailai.

²⁰ Ishmael ye donou nenou khoyu nasü Enou süwe, Enou puhye shiha peilai alia puhye tounah alao peilai, alia puhye panou veo nahpoutu kiahai vei puo soulai ae puh tounah panou tyahrü aduli soulai.

²¹ Ana avei vo nasü daohkou, chu teile phaki Sarah nou nalaiyu nahpoutu Isaak hinou soukhailai.”

²² Abraham hi chi paocheyu thai puh hinou Ramai hai tare.

²³ Süzhou teithe hinou Abraham nou Ishmael, puh kikha hinou nalouyu ae vakoumai hinou hülouyu qila maitao alia puh kikha hi buyu poutumai hrülai saloua puletao hee sü Ramai nou puh hi paoyu thaifüa heerodere.

²⁴ Abraham nou puhvei vasou rodeyu phaki puh hai po raiküakü pare,

²⁵ alia puh nahpoutu Ishmael hai po kiasü pare.

²⁶ Süzhou teithe hinou Abraham ae puh nahpoutu Ishmael,

²⁷ alia puh kikha hinou buyu poutumai hrülai, puh kikha hinou nalouyu ae vakoumai hinou hülouyu qila mai hrülai hai puhye koa heerode-e.