SHURAI 16 - SHEEYU BAIBEL (BSI)

Hagar ae Ishmael

¹ Abram chapfü Sarai nou puhye nahmai lia napei moe, ana Sarai hai Ejipt maipfü Hagar tea kuyu qila ali bue.

² Südonou Sarai nou Abram hisü paoe, “Zhukhaio Mapao nou Eye nahmai ngaoloure hai khuwure; ne aqilapai hi talou zülo, honapai hinou E-a nahmai ngaoloua malae.” Abram hai Sarai nou paoyu chi züloure.

³ Südonou puhnou Kanaan hi po kirou hrüyu thai, puh chapfü Sarai nou Ejipt pfüpai Hagarye puh chapfü ali souloure donou Abram hi peiwure.

⁴ Puhnou Hagar ye koa züloure, alia honapai nou nahmai hrüloure touyu sülou khaie, khaosou tare ae puh paopaiye sü ngaoba loure.

⁵ Süthaisü Sarai nou Abram hi paoe, “Hagar nou Eye ngaophou moyu hai ne mah vanou baie. Enou aqila pfüpaiye sü ne hi peie alia puhnou nahmai hrüloure touyu sülou khaie puhnou Eye ngaoba tare. Ahai ko hisü Mapao panou chiku peitheo.”

⁶ Ana Abram nou Sarai hi paoe, “Zhukhaio, ne qila pfüpai sü ne bah hi bubaie, puh hisü ne lah nedo soulo.” Süthaisü Sarai nou Hagarye souchoro tare, ae honapai sü puh hinou tutare.

⁷ Mapao vei rakivamai nou Hagar ye Shur hi taloure ludu deiki hinou dzünghou ali buyu hinou ngaoloua,

⁸ puh hi paoe, “Sarai qilapai Hagar, ne daiki nou vewe alia daiki talai?” Honapai nou chila peie, “E avei paopai Sarai hinou tuta-e.”

⁹ Rakivamai nanou paoe, “Nevei paopai hisü dakhai veloua puh khakhe hinou buloua baio.

¹⁰ Enou neye tyaonah chosha louhosoua peilai.

¹¹ Zhukhaio, ne sü poupfüre alia ne nahpoutu ali nalai; nenou puh zhihsü Ishmael tea salo; daiolouzü nenou vea-a krayu paisü Mapao nou süloure.

¹² Ana ne nahpoutu nahai rekou nou rheisüh büa hrülai, puhsü mai hrülai nou bayu soulai alia mai hrülai nou puhye aetou laimoe. Puh hai kityarai mai hrülaiye haia hrülai.”

¹³ Hagar nou lah puhye haibüa nou-e, “E cheche vuzünou Ramai ye zhingaowu alia zhingao louyu thai-a haibüa panou paolai hi tea hria buhiwu?” Südonou puhnou puhye chayu Ramai ye sü “Ne hai zhingaoyu Ramaie” tea kuloue.

¹⁴ Südonou dzükhao nasü “Beerlahairoi” (Eye ngaoyu Ahri navei dzükhao) tea saloue; haina hai Kadesh ae Bered ko hinou bue.

¹⁵ Hagar nou Abram ye nahpoutu ali napeie alia puhnou puh zhih sü Ishmael tea sapeie.

¹⁶ Abram hi Hagar nou Ishmael napeiyu phaki puh hai po raicharou pare.