SHURAI 14 - SHEEYU BAIBEL (BSI)

Abram nou Lotye Vupa Peiyu

¹ Babilonia (Shinar) hi veo Amraphel, Ellasar hi veo Ariok, Elam hi veo Khedorlaomer ae Goüm hi veo Tidal,

² vemai haitao nou Sodom hi veo Bera, Gomorrah hi veo Birsha, Admah hi veo Shinab, Zeboüm hi veo Shemeber alia Bela hi veo haitao angou pei hi reih souvere.

³ Vemai haitao angou nou ve zholoua Siddim deikho (süolouzü Tai Zai) hinou jüloure.

⁴ Po kiahai hai Khedorlaomer khakhe hinou puletao nou hrüe, ana puletao nou po kiasü kousü puh hi reih soutare.

⁵ Po kiadai kousü Khedorlaomer alia puhye koa müpfü zhoyu vemai taonou Ashteroth Karnaim hinou Rephaim, Ham hinou Zuzim, Shareh-kiria thaim deikho hinou Emin,

⁶ alia deichi phi buyu Elparan hi koute hukoua Seir deichi hinou buyu Hormai, haitao teitei hai reih soua poloure.

⁷ Süthaisü puletao nou dakhai poa Enmishpat (süolouzü Kadesh) hi ve-e, alia Amelek mai teidei teitei nou reihsoua veiloure, ae Hazezon-tamer hi hrüa buyu Amormai hia reih veiloue.

⁸ Süthaisü Sodom, Gomorrah, Admah, Zeboüm ae Bela (süolouzü Zoar) hi vemai taonou reihme ali souloua Siddim deikho hinou,

⁹ Elam hi veo Khedorlaomer, Goiim hi veo Tidal, Babilonia hi veo Ariok haitao adaiye reih soulai tea tapare.

¹⁰ Siddim deikho hisü sühbvü alao bue; südonou Sodom ae Gomorrah hi veo hai reih hinou tutalai tea tutae, ana rako shia sühbvü hisü deloure, anou vemai kukhe asü taohai deichi hi tupaloure.

¹¹ Südonou ngaoba mainou Sodom ae Gomorrah hi kini teitei, ae touso natao-a loua nou potare.

¹² Sühisü Abram thaihou nahpoutu Sodom hinou hrüa buyu Lot-a puhvei kini teitei nou koa nüpoa tare.

¹³ Ana maili tupaloua ve ko sükhesü Amor mai ae Mamre teidei hinou sheeyu phüsüübe pehao hi hrüa buyu Ebriamai puona Abram hi paopeie. Mamre ae puh thaihou Eshkol alia Aner mai haitao hai Abram ye müzhoe.

¹⁴ Abram nou puhtyao Lotye nüpoa tare touyu ko sülou khaie, puhvei reihmai 318 saloua Dan hi koute hutae.

¹⁵ Sühinou puhnou puhvei reihmaitao hai meme soua dadeloue, alia kheinou hulou reih kouloue, alia Damaskas reikou buyu Hobah khete hukheloua,

¹⁶ nüpoa tayu kini ae Lot alia puhvei kini, nüpoa tayu naotumai ae hukhaki hi buyu kukhe maitao hrülai hai ludakhai paloua sapo veloue.

Melkizedek nou Abram ye Shiha Peiyu

¹⁷ Kedorlaomer ae veo kukhe maitao pei hi reih koloua khaiveyu thai Sodom hi veo nou puhye Shaveh Deikho (süolouzü veo vei deikho) hinou vedaoe.

¹⁸ Melkizedek, Salem hi veo alia Kukayu Ramai vei napao puhnou raokhao ae darkhadzü pokou Abram ye peie.

¹⁹ Alia puhnou ha peia paoe, “Kukulai Ramai, raki ae deiphao sou-apeio puhye panou Abram ye shiha peitheo!

²⁰ Alia ngaoba maiye ne bah hi pothou peiyu Kukulai Ramai ye paosholo.” Abram nou lukhai louyu kinitao hai zha kirou hinou zha ali puhye peie.

²¹ Sodom hi veo nou Abram hi paoe, “Kinitao veishi nelah polo, ana amaitao louzü ahi lukhai peio.”

²² Abram nou chila peie, “Enou Kukulai Ramai, raki ae deiphao soupeiyu Mapao nghoujü nou chaachou souwe,

²³ süolouzü nevei na aliro Enou polai moe, nevei phikha rai ali koute moa nevei na taralia Enou polai moe, daiolouzü ‘Enou Abram ye kini soupeie’ tea nenou ahi paoshulai.

²⁴ Enou halia polai moe, ana nahle maitao nou toulouyu ae Eye koa satayu Aner, Eshkol ae Mamre puletao vei zha louzü panou polo.”