SHURAI 13 - SHEEYU BAIBEL (BSI)

Abram ae Lot Ratayu

¹ Südonou Abram nou puh chapfü, puhvei buyu kini teitei alia Lotye koa Ejipt hinou reikou Negeb hi takhe tare.

² Abram hai kikhaorü, shahu ae sana alao koyu mailie.

³ Puhnou Negeb hinou tapupoa Bethel hi koue, alia Bethel ae Ai ko hi puhnou raichoki sahpao haoloua

⁴ rathobuh ali soukhai touyu hisü ve-e, alia sühinou puhnou ratho loue.

⁵ Puhye koa tayu Lot-a zhaotu, nghitu ae sahpao bue.

⁶ Südonou puhai khinou kikhaorü alao buyu thaifüa koa bulai touyuma kikhaorüye panou pou toure dei hai tailere.

⁷ Südonou Abram ae Lot vei kikhaorü khoyu maitao hai züva-a baire. Süphaki dei süna hisü Kanaan mai ae Periz mai nou hrüa buhie.

⁸ Süthaisü Abram nou Lot hi paoe, “Ahai ko hi ae ahai vei kikhaorü khomai ko hi panou züveiyu palai mokhe, daiolouzü ahaisü kikhamai ali baie.

⁹ Ahai koa bunüyuma soulou shire, südonou buh kukua buta baishe. Nenou bakha nalo polai toulouzü Enou zhoulova talai, mokhaia nenou bakha zhoulova polai toulouzü Enou nalova talai.”

¹⁰ Lot nou puh nghi heshu zhukhaie, Jordan deikho teitei hai Mapao vei kipei büa ae Ejipt teidei büa dzü veishoa buyu puhnou zhingaoloue. Haihai Mapao nou Sodom ae Gomarrah souha mojüe.

¹¹ Südonou Lot nou Jordan deikho teitei puh zha soua doloure, südonou puhnou teinghi palova tare; sübüa puh haisü ratare.

¹² Abram nou Kanaan teidei hi hrütare, alia Lot nou deikho hi buyu nuhdutao hinou bure alia puh vei ki sü Sodom nghia souloure.

¹³ Sodom hi maitao hai maishi shoe alia Mapao nghoujü nou mah soushoyu maie.

Abram nou Hebron hi kouh tayu

¹⁴ Lot nou tayu thai, Mapao nou Abram hisü paoe, “Ne nghithou heshu reilo, khelo, palo, thailo zhukhaio.

¹⁵ Daiolouzü nenou zhingaoa buyu dei teitei hai neye ae nevei tyaonahtao hi peilai.

¹⁶ Nevei tyaonah taosü panou vonai zhoua hrülai, maita linou vonai hai cholousüe toulouzü nevei tyaonah maitao haia cholousüe.

¹⁷ Tashuloua dei haina vei sa-jha teitei sühao-a zhuta khaio, daiolouzü hai teitei nou neye peilai.”

¹⁸ Südonou Abram nou puh vei sahpao sü hrada khailoua Hebron hi sheeyu Phüsüübe buyu Mamre hilo taho bure, ae sühinou Mapao ye thore rathobuh ali soushu loure.