SHURAI 1 - SHEEYU BAIBEL (BSI)

Teideiphao Souyu

¹ Ramai nou teideiphao soushu arai hi,

² deiphao hai zhai soumo hie ae sakhaia bubai hie alia hateitei hoa buyu dzüdu pei hisü maitei-a bubaie alia Ramai vei Rakosü dzüpei nou lüa bue.

³ Süthaisü Ramai nou “Ava bulowo” tea kharochi peie, süthaifüa ava nasü paloure.

⁴ Ramai nou ava nahai veia ngaoloue. Süthaisü Ramai nou ava ae azhisü souku peire,

⁵ alia Ramai nou ava nasü hea tea sapeie alia azhi nasü khei tea sapeie. Koukhe talapa shona daore, sünasü teithe arai khanae.

⁶ Ramai nou paoe, “Dzü hinou dzüko palowo alia dzü hinou dzü kukua bulowo,” sünasü sükua buloure.

⁷ Sübüa Ramai nou dzüko soupeie alia dzüko pei hi buyu dzü ae dzüko khenou buyu dzü souku peie.

⁸ Alia Ramai nou dzüko pei nasü tei tea sapeie. Koukhe talapa shona daore, sünasü teithe ahai chenae.

⁹ Alia Ramai nou “Teikhe hinou buyu dzütao hai buh lihi ve jülowo ae deithe palowo,” tea kharochi peie alia sünasü sükuloure.

¹⁰ Ramai nou deithe nasü deiphao tea sapeie ae ve jüa buyu dzü nasü zai tea sapeie. Alia Ramai nou ngaoloua veie toure.

¹¹ Alia Ramai nou “Dei hinou vupou, thoube, süübe, rashibe, ae lah kukuvei tya veishi bulowo,” tea kharochi peie. Alia sünasü sükuloure.

¹² Dei hinou tya kukuyu vupou, thoupfüyu ae shishiyu süübe teitei paopa loue. Alia Ramai nou zhuloua veie toure.

¹³ Koukhe talapa shona daore- sünasü teithe asü chenasüe.

¹⁴ Alia Ramai nou “Hea ae khei souku loure donou tei hisü ava palowo alia sütao nou teile, teithe ae po vei shee soulowo,

¹⁵ alia deiphao hi ava peiloure donou tei hi avana soulowo,” tea kharochi peie alia süthaifüa paloure.

¹⁶ Alia Ramai nou ava adu ahai soupeie; ava adu nasü heaki ae atai nasü kheiki khopeire donoue, Puhnou teivuh-a soupeie.

¹⁷ Alia Ramai nou sütaosü deiphi hi vapeire donou,

¹⁸ heaki ae kheiki panou khopeire donou alia ava ae azhi souku loure donou tei hi popa khaipeire. Alia Ramai nou zhuloua veie toure.

¹⁹ Koukhe talapa shona daore- sünasü teithe adai chenasüe.

²⁰ Alia Ramai nou “Ahrina tya tyali dzü hinou hrülowo ae tei hisü raohou khemai zhaota-a hrülowo,” tea kharochi peie.

²¹ Sükua Ramai nou zai hinou buyu khaona adutya ae lüa tayu hrikhaona hrülai- dzühi hrüyu hrikhaona tya tyali ae shouh pfüyu raohou tya hrülai soupeie. Alia Ramai nou zhuloua veie toure.

²² Alia Ramai nou “Hrikhaona hrülaiye sü shiha peie, ae khatao hisü tya kaapaloua zai phoulowo alia tei raohou kothou deiphao phoulowo” tea puletao hi shiha peie.

²³ Alia koukhe talapa shona daore- sünasü teithe angou chenasüe.

²⁴ Alia Ramai nou “Lah kuku tya thaifüa kikhaorü ae pounou taitayu hrikhaona ae rekhaona hrülai dei hinou palowo” tea kharochi peie. Alia süsü sükuloure.

²⁵ Alia Ramai nou deiphi soukhaona ae pounou taitayu hrülai lah kuku tyasü soupeie. Alia Ramai nou zhuloua veie toure.

²⁶ Süthaisü Ramai nou paoe, “Chuo maiye Etao zhuh rai hinou, Etao raibüa nou soulai khe, alia puletaoye panou khah, raohou, ae hrikhaona, vudai poudai, alia dei hi hrikhaona hrülai pei hi panou kholai.”

²⁷ Sükua Ramai nou lah puh zhurai hinou maiye soupeie, naotu poutu puhnou soupeie.

²⁸ Alia Ramai nou puhaiye shiha peia paoe, “Rashi alao shilowo ae tya kaapaloua deiphao phoulowo alia süsü tukhalowo; alia zai hi khah, tei hi raohou ae dei hi hrikhaona hrülai pei tukhalowo” toure.

²⁹ Alia Ramai nou paoe, “Zhukhaio, dei hi thoushiyu rashibe ae shira shiyu süübe teitei hai neletaoye pa toure donou Enou neletao hi peiwure.”

³⁰ Alia resou khaona ae tei hi raohou ae pounou taitayu hrikhaona alia ssühaiyu hrikhaona, alia vupou teitei Enou puletao vei touso soure donou peiwure. Alia süsü sübüloure.

³¹ Alia Ramai nou lah puhnou soukhai touyu teitei hai zhuposhu khasho-a veishode tea paore. Koukhe talapa shona daore- sünasü teithe arou chena-e.